ރައީސް އަބްދުﷲ ޔާމީން އަކީ ރާއްޖޭގެ ތާރީޚުގައި މިހާތަނަށް ވެރިކަން ނުކުރާ ފަދަ "ގަޓު" ހުރި ރައީސެކެވެ. އެފަދަ ދެވަނައެއް ނެތް އިޤްތިސާދީ މާހިރެކެވެ. ޙިކްމަތު ޢަމަލީ ބޭނުން ކުރައްވައިގެން ނިންމުންތައް ނިންމަވާ އިންސާފަށް ލޯބި ކުރައްވާ ލީޑަރެކެވެ. ޝަރުޢީ ދާއިރާއަށް ނުފޫޒު ނުފޯރުވާ، ކޮރަޕްޝަންގެ ޢަމަލުތަކަށް ނޫނެކޭ ވިދާޅުވާން ކެރިވަޑައިގަންނަވާ ލީޑަރެކެވެ.
މިއީ ސަރުކާރަށް ތާޢީދުކުރާ ފަރާތްތަކުން އެމަނިކުފާނު ސިފަކުރާ ގޮތެވެ. ކޮންމެ ދުވަހަކު ޓްވިޓާ އާއި ފޭސްބުކްގައި "ޝުކުރިއްޔާ ރައީސް ޔާމީން" ލިޔަމުން ގެންދަނީ މިއިން ކޮންމެވެސް ސިފައެއްގެ ވެރިއެއް ކަމަށް ބުނެއެވެ.
ދިވެހިރާއްޖޭގައި ބޭއްވި ވާދަވެރި އިންތިޙާބެއް ކާމިޔާބުކޮށް ރައީސް އަބްދުﷲ ޔާމީން ވެރިކަމަށް ވަޑައިގަތީ ކޯލިޝަނެއްގެ ތެރެއިންނެވެ. ނަމަވެސް ވެރިކަމަށް ތިން އަހަރު ވުމުގެ ކުރިން ކޯލިޝަން އެހުރިހާ ފަރާތްތަކުން ސަރުކާރާއި ދެކޮޅަށް މިވަނީ ނިކުމެފައެވެ. ސަބަބަކީ، ރާއްޖޭގެ އެހެން ސިޔާސީ ފަރާތްތަކުން ރައީސް ޔާމީންގެ "ގަޓު" ފެނިފައި ބިރު ގަންނަނީ ތޯއެވެ؟ ނުވަތަ އެމަނިކުފާނުގެ "ގަޓު" ދައްކަވައި ސިޔާސީ ފަރާތްތައް ބިރު ގަންނަވަނީ ތޯއެވެ؟
ރައީސް އަބްދުﷲ ޔާމީންގެ ވެރިކަމުގެ 3 އަހަރު ނިމިގެންދާއިރު އެމަނިކުފާނުގެ ނުފޫޒުން ވާދަވެރި ސިޔާސީ ހުރިހާ ފަރާތްތަކެއް ޖަލަށް ލުމަކީ ރައީސް ޔާމީންގެ "ގަޓު" ހުރި ވަރު ހާމަވެގެންދާ ކަމެކެވެ. ކުރީގެ ރައީސް މުހައްމަދު ނަޝީދު އާއި ކާނަލް ނާޒިމް އަދި ޝެއިޚް އިމްރާން އަބްދުﷲ ފަދަ ސިޔާސީ ލީޑަރުން ޖަލަށް ލުމަށް ފަހު "ގަޓު" ރައީސް ކުރައްވާ ކަމަކީ ވެރިކަމުގައި ބަގުޑި ބެއްދުން ފިޔަވައި ކޮންކަމެއްތޯއެވެ؟
އިޤްތިސާދީ މާހިރެއް ކަމުގައި ވިދާޅުވާއިރު އެމަނިކުފާނުގެ ވެރިކަމަށް 3 އަހަރު ވެގެން ދާއިރު ޤާއިމްކުރަން ބުނި އެސްއީޒެޑްގެ ދަށުން މަންފާއެއް ނުކުރެއެވެ. އެސްއީޒެޑްގެ މައިގޭޓުތަކަށް ވާނެ ކަމަށް ބުނި ސަރަހައްދުތަކުން ފެންނަނީ ނާއުއްމީދު ވެފައިވާ ރައްޔިތުންނެވެ. ފެންނަނީ ހުރިހާ ރައްޔިތުން މާލެ ސަރަހައްދަށް ޖަމާކުރުމުގެ ސިޔާސަތެއް ގެންގުޅުއްވާ މަންޒަރެވެ.
ޙިކްމަތު ޢަމަލީ ބޭނުން ކުރައްވައިގެން ނިންމުންތައް ނިންމަވާ އިންސާފަށް ލޯބި ކުރައްވާ ލީޑަރެއް ކަމަށް ވިދާޅުވާ އިރު ސިޔާސީ ލީޑަރުންނާއި މެދު ކުރައްވާނެ ދަޢުވާ ކަނޑައަޅުއްވަނީ އަމިއްލައަށް ބޭނުންފުޅުވާ ގޮތަށެވެ.
އަދާލަތު ޕާޓީގެ ރައީސް ޝެއިޚް އިމްރާންގެ މައްޗަށް ކުރަންޖެހޭނީ ޖިނާޢީ ދައުވާ އެއް ކަމަށް ވިދާޅުވިތާ މަދު ދުވަސްކޮޅެއްގެ ތެރޭގައި އެމަނިކުފާނުގެ މައްޗަށް ޓެރަރިޒަމްގެ ދަޢުވާ އުފުލުމަކީ އޭގެ ސާފު ހެއްކެކެވެ.
ކޮރަޕްޝަންގެ ޢަމަލުތަކަށް ނޫނެކޭ ވިދާޅުވާން ކެރިވަޑައިގަންނަވާ ކަމަށް ވިދާޅުވި ބޭފުޅާ އަމިއްލައަށް އެމްއެމްޕީއާރްސީގެ ކޮރަޕްޝަންގެ ފައިސާ ބޭނުންކުރެވިފައި އޮވެދާނެ ކަމަށް ވިދާޅުވީ އިއްޔެއެވެ.
ޝަރުޢީ ދާއިރާއަށް ނުފޫޒު ނުފޯރުވާނެ ކަމަށް ވިދާޅުވާ އިރު ބައެއް މައްސަލަތައް ކޯޓު ތަކުގައި "ޕާކް" ކޮށްފައި އެހުންނަނީ ކާކުގެ ނުފޫޒުން ކަން ނޭނގޭ ކުޑަކުއްޖަކު ވެސް މިރާއްޖޭގައި ނުހުންނާނެއެވެ.
މިހުރިހާ ކަމަކާއި އެކު ވެސް ބައެއް މީހުންނަށް ރައީސް ޔާމީން އަކީ އަދިވެސް "ގަޓު" ހުރި ރައީސެވެ.