ކުރީގެ ޑިފެންސް މިނިސްޓަރ ކާނަލް ރިޓަޔާޑް މުހައްމަދު ނާޒިމްގެ ކުރީގެ ޑްރައިވަރު ސާޖެންޓް މުހައްމަދު ރިއްފަތު މިރޭ ކުއްލިގޮތަކަށް ނިޔާވެއްްޖެއެވެ.
މައުލޫމާތު ލިބިފައިވާ ގޮތުގައި ސާޖެންޓް ރިއްފަތު ނިޔާވެފައިވަނީ މިރޭ އިޝާ ނަމާދުން ފޭބިތާ ކުޑައިރުކޮޅެއްގެ ތެރޭގައި އެމްއެންޑީއެފް ސަދަން އޭރިއާގައި ހުއްޓާ މެއަށް ތަދެެއް އަރައިގެން ވެއްޓި ފަރުވާ ދެމުން ދަނިކޮށެވެ.
"އިޝާ ނަމާދުން ފޭބުމަށް ފަހު، މެއަށް ތަދުވާ ވާހަކަ ބުނި އޭގެ ފަހުން ކުއްލި ގޮތަކަށް ވެއްޓުނީ" ސަދަން އޭރިއާގެ އޮފިޝަލަކު ބުންޏެވެ.
ސާޖެންޓް ރިއްފަތު ވެއްޓުމާއި އެކު ފަރުވާ ދިނުމަށް ސ. ފޭދޫ ސިއްހީ މަރުކަޒަށް ގެންދިއުމަށް ފަހު އިތުރު ފަރުވާއަށް ހިތަދޫ ރީޖަނަލް ހޮސްޕިޓަލަށް ގެންދެވުނުވެ. މައުލޫމާތު ލިބޭ ގޮތުގައި ރިއްފަތު ނިޔާވީ ހިތަދޫ ރީޖަނަލް ހޮސްޕިޓަލަށް ގެންދިޔަ މަގުމަތީގައެވެ.
މަރްހޫމް ސާޖެންޓް ރިއްފަތަކީ މިހާރު 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ޑިފެންސް މިނިސްޓަރ ކާނަލް ނާޒިމްގެ ފަރާތުން ހައިކޯޓުގައި ކުރިއަށް ގެންދާ އިސްތިއުނާފް މައްސަލާގައި ނާޒިމް އާއި އެއްކޮޅަށް ހެކިބަސް ދެއްވާފައިވާ ބޭފުޅެކެވެ.
އެގޮތުން ނާޒިމްގެ ޑްރައިވަރަކަށް ހުންނެވި ދުވަސްވަރު، ނާޒިމް އާއި އެކު ގިނަ ވަގުތު ހޭދަ ކުރައްވާ ކަމަށާއި، އެމަނިކުފާންގެ ލެޕްޓޮޕް ދަބަސް އަބަދުވެސް އުފުލަނީ ރިއްފަތުކަމަށް އޭނާ ވަނީ ހައި ކޯޓުގައި ހެކިބަސް ދީފައެވެ. އަދި ނާޒިމްގެ ދަބަހުގައި ފިސްތޯލައެއް ނެތްކަމަށް ހެކިބަސް ދީފައިވެއެވެ.