ރާއްޖޭގެ އެންމެ ތައުލީމީ، ހުނަރުވެރި މަސައްކަތްތެރި އަންހެނުން ތިބީ އައްޑޫގައެވެ. މިއީ ރާއްޖެއަށް މަޝްހޫރު ވާހަކައެކެވެ. މި ވާހަކަ ތާރީހީ ލިޔުއްވުންތެރިންގެ ގަލަމުން ކިތަންމެ ފުރިހަމަކޮށްވެސް ވަނީ ލިޔުއްވާފައެވެ. އޭރުވެސް މިހާރުވެސް އައްޑޫ އަންހެން ކަބަލުންނަކީ ރާއްޖެއަށް ނަމޫނާ ބައެކެވެ.
އައްޑޫ އަންހެން ކަނބަލުންގެ ތެރެއިން ފާހަގަކޮށްލެވޭ ހިދްމަތްތަކެއް ކުރައްވަމުން ގެންދަވާ ފަރާތްތަކުގެ އަގު ވަޒަން ކުރުމުގެ ގޮތުން އައްޑޫ އަންހެނުންގެ ތަރައްޤީއަށް މަސައްކަތް ކުރާ ކޮމެޓީން މިވަނީ ހާއްސަ އެވޯޑެއް ތައާރަފްކޮށްފައެވެ.
އައްޑޫބަހުން އަންހެން ބޭކަބަލުންގެ ތެރެއިން ވަކި ހާއްސަ ފަންތީގެ ބޭކަނބަލުންނަށް ހާއްސަ ކުރެވިފައިވާ "ކަނބައިދި" އެވޯޑަކީ މިއަހަރު އަލަށް ފަށައިގަންނަ އެވޯޑެކެވެ. މި އެވޯޑަށް ކުރިމަތި ލުމުގެ ފުރުސަތު މިމަހުގެ 25 ވަނަ ދުވަހުން ފެށިގެން ހުޅުވާލާފައިވާ އިރު އަންނަ މަހުގެ 3 ވަނަ ދުވަހާއި ހަމައަށް ނަން ފޮނުވޭނެ ކަމަށް އައްޑޫ އަންހެނުންގެ ތަރައްޤީއަށް މަސައްކަތް ކުރާ ކޮމެޓީން ބުނެއެވެ.
މި ހާއްސަ އެވޯޑަށް 10 ދާއިރާއަކުން ކުރިމަތިލެވޭނެ ގޮތަށް ވަނީ ހަމަޖައްސާފައެވެ. އެއީ މަސްވެރިކަން، ދަނޑުވެރިކަން، އަތްތެރި މަސައްކަތް، ތައުލީމް، ސިއްދީ، ކުޅިވަރު، އިޖުތިމާއީ، ލިއުންތެރިކަން، ވިޔަފާރި އަދި ދަރުމަވެރިންގެ ދާއިރާ އެެވެ.
އަންނަ މަހުގެ 12 ވަނަ ދުވަހުގެ ރޭ ޝަރަފުއްދީން ސްކޫލްގެ ހޯލުގައި ބާއްވާ ހާއްސަ ރަސްމިއްޔާތެއްގައި މި އެވޮދް ދެވިގެން ދާއިރު، މި އެވޯޑަށް އަމިއްލަ ގޮތުން ނުވަތަ އެހެން މީހަކަށްވެސް ނަން ހުށަހެޅިދާނެއެވެ.
މިނިވަން ހާއްސަ ޖަޖް ކޮމެޓީއަކުން ވަނަ ހޮވާ އިރު މިއަހަރު 30 ފަރާތަކަށް އެވޯޑް ދިނުމަށް ވަނީ ނިންމާފައެވެ.
އައްޑޫ އަންހެނުންގެ ކޮމެޓީގެ "ކަނބައިދި އެވޯޑް" ހާސިލް ކުރުމަށް، އައްޑޫގައި މިވަގުތު އަގުހުރި މަސައްކަތް ކުރައްވަމުންދާ ފަރާތްތަކުގެ ނަން ހުށަހެޅުން ވަރަށް މުހިއްމެވެ. މި އަގުހުރި ރަނުގެ ފުރުސަތު ނަގާ ނުލައްވާށެވެ.
ތިޔައީ މި ސިޓީގެ ފަހްރުވެރި "އަންހެން ކަނބަލުންނެވެ".