ރައީސް ނަޝީދުގެ ސަރުކާރުގައި 400 އެއްހާ ރަށް ރިސޯޓް ހެދުމަށް ގަވާއިދާއި ހިލާފަށް ދީފައިވާ ކަމަށް ޕީޕީއެމްފގެ ނޫސް ކޮންފަރެންސެއްގައި ބުނެވުނީ އޭރުގެ ޓޫރިޒަމް މިނިސްޓަރ އަހްމަދު އަދީބް ދެއްވި މައުލޫމާތުގެ މައްޗަށް ބިނާކޮށް ކަމަށާއި، ފަހުން ހަގީގަތް އެގުނު އިރު 10 ރަށްވެސް ދޫކޮށްފައި ނުވާ ކަމަށް ސަރުކާރަށް ފާޅުގައި ފާޑު ކިޔަމުން އަންނަ ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް ވިދާޅުވެއްޖެއެވެ.
ރާއްޖެ ޓީވީގެ "ސިޔާސީ މަޝްވަރާ" ޕްރޮގްރާމްގައި ވާހަކަ ދައްކަވަމުން މަހްލޫފް ވިދާޅުވީ ރައީސް ނަޝީދުގެ ސަރުކާރުން ގަވާއިދާއި ހިލާފަށް ރަށްތައް ދޫކުރި ކަމަށް ބުނީ ލިބުނު މައުލޫމާތު ގޯސް ވެގެން ކަމަށާއި، މިހާރު އެކަން ބެލުމުން، 10 ވަރަކަށް ރަށްވެސް ދޫކޮށްފައި ނެތްކަން އެނގޭކަމަށެވެ.
"އޭރު ޓޫރިޒަމް މިނިސްޓަރު ދެއްވި މައުލޫމާތެއް އެއީ، އެކަމަކު ފަހުން އެނގުނީ އެ އަދަދަުތަކަކީ އަސްލު އެމްޑީޕީ ސަރުކާރުން އިއްލާން ކުރެއްވި ކޮންމެ ވެސް ސީއެސްއާރް ހަރަކާތަކަށް ލިބުނު ޕްރޮޕޯސަލްގެ އަދަދުކަން. އެ ޕްރޮގްރާމްގައި ރިސޯޓެއް ހަދަން ރަށެެއް ލިބުނީމާ، ކޮންމެ ވެސް ރަށެއްގެ ނަރުދަމާއެއް، ބަނަދަރެއް ހަދަން އެގޮތަށް 400 އެއްހާ ފަރާތްތަކުން ޕްރޮޕޯސަލް ފޮނުވީ، އެދަދު އަޅުގަނޑުމެންނަށް މިކިޔަނީ ރިސޯޓް ހަދަން ދިން ރަށުގެ އަދަދޭ ކިޔައިގެން. އެވަރަށް ހީއެއް ނުވޭ ރިސޯޓް ހަދާނެ ރަށް ރާއްޖޭގައި ހުރިހެން" މަހްލޫފް ވިދާޅުވިއެވެ.
މަހްލޫފް ވިދާޅުވީ އޮޑިޓް ރިޕޯޓްގައި ހުރީ އެއްވެސް ހާލެއްގައި މިނިސްޓަރަކު ވަގަށް ނެގި ފައިސާތަކެއް ނޫން ކަމަށެވެ.
އެގޮތުން ޔޫތު މިނިސްޓްރީގެ އޮޑިޓް ރިޕޯޓްގައި 270 މިލިއަން އޮތުމަކީ އެފައިސާ ޔޫތު މިނިސްޓަރު ހަސަން ލަޠީފް ކާލި ވާހަކައެއް ނޫން ކަމަށެވެ.
ނަމަވެސް ރައީސް އަބްދުﷲ ޔާމީންގެ ވެރިކަމުގައި ގިނަ ރަށްތަކެއް ދޫކޮށްފައިވާއިރު އެ ރަށްތައް ދޫކުރުމަށް ފަހު އަމިއްލަ ފަރާތްތަކުގެ އެކައުންޓްތަކަށް ފައިސާ ޖަމާކޮށްފައިވާ ކަމަށް އެމްއެމްޕީއާރުސީގެ އޮޑިޓްރިޕޯޓްގައި ބުނެފައިވެއެވެ.
މަހްލޫފް ވިދާޅުވީ އެމްޑީޕީގެ ސަރުކާރާއި، ރައީސް މައުމޫންގެ ސަރުކާރުގައި ވެސް ކަރަޕްޝަންގެ ކަންކަން އޮތް ކަމަށާއި ނަމަވެސް އެދެބޭފުޅުންގެ އެކައުންޓްތަކަށް ފައިސާ ޖަމާކުރި ވާހަކައެއް ނުދައްކާ ކަމަށެވެ. ނަމަވެސް މިހާރުގެ މައްސަލައަކީ ރިސޯޓް ހަދަން ރަށްތައް ދޫކުރުމަށް ފަހު އަމިއްލަ އެކައުންޓަށް ފައިސާ ޖަމާކޮށްފައި އޮތުން ކަމަށެވެ.