ކޮންމެ އަހަރަކަށް ވެސް ދައުލަތުގެ ބަޖެޓު ފާސްކުރާއިރު އަތޮޅު ތެރޭގައި ހިންގާނެ ބޮޑެތި މަޝްރޫޢުތަކުގެ ވާހަކަ ސަރުކާރުތަކުން ދައްކަން ފަށައެވެ. ނަމަވެސް އަހަރު ނިމިގެން ޖެހިގެން އަންނަ އަހަރުގެ ބަޖެޓު ފާސްކުރަން ޖެހުމާއި ހަމައަށް ވެސް އެއްކަލަ މަޝްރޫޢުތައް ފަށައި ނުގަނެވެއެވެ.
ސަބަބަކީ ކޮބައިތޯއެވެ؟ ބަޖެޓު ތާށިވަނީއެވެ. ލިބޭނެ ކަމަށް ލަފާކުރި އާމްދަނީ ނުލިބުނީއެވެ. ލޯނު ހަމަނުޖެހުނީއެވެ. ނުވަތަ ކޮންމެވެސް މައްސަލައެއް ދިމާވީއެވެ. މި ގޮތުގައި އުޒުރު ދައްކައި ސަރުކާރުތަކުން އަތޮޅު ތެރޭގެ ރައްޔިތުންނަށް "ދޯކާ" ދެމުން ގެންދާތާ މިވަނީ އެތައް އަހަރެއް ފާއިތުވެގެން ގޮސްފައެވެ.
މިހާރުގެ ސަރުކާރަކީ ވެސް އޭގެ ލާ މަސީލު ނަމޫނާއެކެވެ. ވެރިކަމަށް އައުމުގެ ކުރީގައި ރާއްޖޭގެ އެކި ސަރަހައްދުތަކުގައި އިޤްތިސާދީ ސަރަހައްދުތައް ޤާއިމްކުރާނެ ވާހަކަ ދެއްކިއެވެ. ކޮންމެ އަތޮޅެއްގައި ވެސް ހުޅުމާލެ އެއް އޮންނާނެ ކަމަށް ބުނެ ހުވަފެން ދެއްކިއެވެ.
އައްޑޫގެ ރައްޔިތުންނަށް މިހާރުގެ ސަރުކާރުން ދިން އެންމެ ބޮޑު ޔަޤީން ކަމަކީ، 100 އެނދުގެ ހޮސްޕިޓަލެއް އަޅާނެ ކަމުގެ ޔަޤީންކަމެވެ. ނަމަވެސް މިހާރު ހޮސްޕިޓަލާއި ބެހޭގޮތުން ސުވާލުކޮށްފި ނަމަ އައްޑޫގެ ގިނަ ރައްޔިތުން ބުނާ ވާހަކަ އަކީ، "ޕީޕީއެމް ސަރުކާރުގައި އައްޑޫ ހޮސްޕިޓަލް އާއި ބެހޭގޮތުން 100 ބަހަނާ ޔަޤީން" ކަމަށެވެ.
ސަރުކާރުން އެންމެ ފަހުން ހާމަކޮށްފައިވާ ގޮތުގައި ހޮސްޕިޓަލް އެޅުމަށް ލިބިފައިވާ ލޯނު އެހީ އަކީ ހޮސްޕިޓަލެއް އެޅުމަށް އެކަށީގެންވާ ވަރުގެ އަދަދެއް ނޫނެވެ. އެހެން ކަމުން ސަރުކާރުން ގަސްތު ކުރަނީ، ސާކް ސަމިޓަށް އައްޑޫގައި ބިނާކުރި އީސީސީ ހޮސްޕިޓަލަކަށް ބަދަލުކުރުމަށެވެ. ހިތާމައަކީ، އިޤްތިސާދީ މާހިރެއްގެ ސަރުކާރަށް އެކަން ވިސްނިވަޑައިގަތީ ވެރިކަމަށް 3 އަހަރު ވީފަހުން ކަމެވެ.
މައްސަލައެއް ނެތް ތާއެވެ. އައްޑޫ މީހުން އެވާހަކަ ވެސް ޤަބޫލުކޮށްފިއެވެ. ކެތްތެރިކަމާއި އެކުގައެވެ. ހޮސްޕިޓަލެއް އަޅާދޭނެ ކަމަށް ބުނެ ސަރުކާރުތަކުން ދައްކާ ބަހަނާތައް އަޑުއަހަމުން ގެންދާތާ މިއީ 16 ވަނަ އަހަރެވެ.
ނަމަވެސް އައްޑޫ ރައްޔިތުން ދެކެމުން އަންނަ 100 އެނދުގެ ހޮސްޕިޓަލްގެ ހުވަފެނަށް މިވީ "ސްވީޓް ސިކްސްޓީން" އެއް ނޫނެވެ. ސަރުކާރުން އުއްމީދީ 16 އެކޭ ބުންޏަސް އެވާހަކަ އައްޑޫ މީހުން ޤަބޫލުކުރާނީ ކިހިނެތް ހެއްޔެވެ.
ބަޖެޓު ތާށިވެގެން، ލޯނު ހަމަ ނުޖެހިގެން، އަދި ޤައުމު ފަޤީރުވެގެން އައްޑޫގައި 100 އެނދުގެ ހޮސްޕިޓަލެއް ނޭޅުނު ނަމަވެސް ވެރިރަށް މާލޭގައި ހުންނަ އައިޖީއެމްއެޗް ހޮސްޕިޓަލުގައި އާ އިމާރާތެއް އަޅަން ޖެހުމުން ކުއްލިއަކަށް ސަރުކާރުގެ ބަޖެޓު ތިޔާގި ވެއްޖެއެވެ.
އައްޑޫގައި ހޮސްޕިޓަލް އެޅުމަށް ބޭނުންވާ ފައިސާ ނުލިބި އައިޖީއެމްއެޗްގައި 25 ބުރީގެ އިމާރާތެއް އަޅަން 140 މިލިއަން ޑޮލަރު ސަރުކާރަށް ލިބުނީ ކިހިނެތް ހެއްޔެވެ؟
އެއީ ދާދިފަހުން އެތައް މިލިއަން ޑޮލަރެއް ޚަރަދުކޮށްގެން ހެދި ރަސްފަންނަށް ލެއްގި 140 މިލިއަން ޑޮލަރު ހެއްޔެވެ؟ ނުވަތަ ރަސްފަންނަށް ލެއްގި މާވަހަރެއް ވިއްކައިގެން ލިބުނު ފައިސާ ހެއްޔެވެ؟ ނުވަތަ ކޮންމެވެސް ވިޔަފާރި ވެރިޔަކު ރައީސް އަބްދުﷲ ޔާމީން އަށް ޞަދަޤާތުގެ ގޮތުގައި ދެއްވި ފައިސާ ހެއްޔެވެ؟
ކޮންމެ ގޮތަކަށް ސަރުކާރަށް ލިބުނު ފައިސާ ކަމުގައި ވީ ނަމަވެސް ހާމަވެގެންދާ ކަމަކީ، އަތޮޅު ތެރޭގެ މަޝްރޫޢުތައް ހިންގަން ޖެހުމުން ލާރި ނެތްކަމަށް ބުނެ ސަރުކާރުން ދައްކަނީ ހަޤީޤަތާއި ޚިލާފް ވާހަކަތަކެއް ކަމެވެ. ފައިސާ ލިބޭނެ ގޮތްތައް ވެސް އެބަހުއްޓެވެ. ސަރުކާރުގައި ނެތީ އިޚްލާސްތެރިކަމެވެ.