ސްޕެނިޝް ލަލީގާ ގައި މެޑްރިޑް ޑާބީ އެތްލެޓިކޯ ކާމިޔާބުކޮށް ރިއަލް ރިއަލް ގެ ކުރީގައި ހަތަރު ޕޮއިންޓުގެ ތަފާތެއް ހޯދައިފިއެވެ.
ރިއަލްގެ ދަނޑުގައި ކުޅުނު މިމެޗު އެތްލެޓިކޯ އިން ކާމިޔާބުކޮށްފައިވަނީ 0-1 ގެ ނަތީޖާ އަކުންނެވެ.
މެޗުގެ ފުރަތަމަ ހާފު ލަނޑެއް ނުޖެހި ނިމިފައިވާއިރު މެޗުގެ ހަމައެކަނި ގޯލު 53 ވަނަ މިނެޓުގައި ކާމިޔާބުކޮށްފައިވަނީ އެންޓޯނިއޯ ގްރީޒްމެންއެވެ.
އާދައިގެ މަތިން މިމެޗުގައިވެސް ދެޓީމު ދެމެދުގައި ގިނައަދަދެއްގެ ހަމަނުޖެހުން އުފެދި ކާޑުތައް ފެނިގެންގޮސްފައިވެއެވެ.
ރިއަލް މެޑްރިޑް ގެ ތިން ކުޅުންތެރިންނަށް ރެފްރީ ރީނދޫ ކާޑު ދައްކާފައިވާއިރު އެތްލެޓިކޯގެ ހަތަރު ކުޅުންތެރިންނަށް ވަނީ ރީނދޫ ކާޑު ދައްކާފައެވެ.
މިމެޗުން ބަލިވެ ރިއަލް އަށް ވަނީ މިސީޒަނުގެ ލަލީގާ ލިބުމުގެ ފުރުސަތު ވަރަށް ބޮޑަށް ހަނިވެފައެވެ. އެއްވަނައިގައި އޮތް ބާސެލޯނާއާ ދެމެދު 9 ޕޮއިންޓުގެ ފަރަގެއް އުފެދިފައިވާއިރު ރިއަލް ވަނީ ބާސާ އަަށް ވުރެ އެއްމެޗު އިތުރަށް ކުޅެފައެވެ.
މިރޭ ސެވިއާ އާ ދެކޮޅަށް ބާސާ ނިކުންނައިރު މިރޭ މެޗުން މޮޅުވެއްޖެނަމަ ދެވަނައިގައި އޮތް އެތްލެޓިކޯ އާ ދެމެދު 8 ޕޮއިންޓުގެ ފަރަގެއް އުފެދި ތިންވަނައިގައި އޮތް ރިއަލް މެޑްރިޑް އާ ދެމެދު 12 ޕޮއިންޓު އޮންނާނެއެވެ.
ނަމަވެސް ބާސާގެ ކޯޗު ލުއިސް އެންރީކޭ ބުނެފައިވަނީ އަދި ތަށި ލިބުނީ ކަމަށް ދެކުމަކީ މޮޔަ ކަމެއް ކަމަށެވެ. އަދި ތަށި ހޯދުމަށް އޭނާގެ ޓީމު ބުރަ މަސައްކަތް ކުރަން ޖެހޭ ކަމަށާއި ތަށި ހޯދުމަށް އެންމެ ފިޔަވަޅެއް ވެސް ބާސާ ފަހަތަށް ނުޖެހޭނެ ކަމަށް އެންރީކޭ ވަނީ ސަޕޯޓަރުންނަށް ޔަގީންކަން ދީފައެވެ.