މިމަހުގެ 24 ވަނަ ދުވަހު ބޭއްވި ރައްޔިތުންގެ މަޖިލިސްގެ ޖަލްސާގައި އައްޑޫ މީދޫ ދާއިރާގެ މެމްބަރު ރޮޒެއިނާ އާދަމްގެ މޫނަށް ޕީޕީއެމް ޕާލިމެންޓްރީ ގްރޫޕްގެ ލީޑަރު "އަގަ ދޮވުނު" ފެން ބުރުއްސާފައިވާތީ، ރޮޒޭ ނިހާން މެޑިކަލް ރިޕޯޓް ހޯދުމަށް ކޯޓަށް ހުށަހެޅުމަށް މަސައްކަތް ކުރަމުން ދަނިކޮށް، ނިހާން ޓެސްޓް ހަދައި ޓެސްޓް ރިޕޯޓް އާއްމުކޮށްފިއެވެ.
ދާދި ފަހުން ނިހާން ފުއްޕާމޭގެ ބައްޔަކަށް ފަރުވާ ހޯދާފައިވާތީ، ނިހާންގެ ގައިން ގައިން ގަޔަށް އަރާ ބައްޔެއް ހުރިތޯ ބެލުމަށް ބޭނުންކަމަށް ބުނެ ރޮޒޭ ވަނީ ޓްވީޓް ކޮށްފައެވެ. އެހެންވެ ނިހާން މީގެ ކުރިންވަނީ ރޮޒޭ އާއި އެކު އައިޖީއެމްއެޗްއަށް ގޮސް ޓެސްޓް ހެދުމަށް ބޭނުން ކަމަށް ބުނެފައެވެ.
ނަމަވެސް ރޮޒޭ ފަހުން ބުނީ އޭނާ ބޭނުންވަނީ އޭޑީކޭއިން ނިހާން ޓެސްޓް ހެދުމަށްކަމަށެވެ. މިގޮތަށް ރޮޒޭ ބުނެފައިވަނިކޮށް ނިހާން ވަނީ އަމިއްލަ ގޮތުން މިއަދު ހެނދުނު އޭޑީކޭއަށް ގޮސް ޓެސްޓް ހަދައި ނަތީޖާ ސޯޝަލް މީޑީއާ މެދުވެރިކޮށް ހިއްސާ ކޮށްފައެވެ.
ރޮޒޭގެ މޫނަށް ނިހާން ފެން ޖެހި މައްސަލަ އެކި ފަރާތްތަކުން ދަނީ ކުށްވެރި ކުރަމުންނެވެ، ނަމަވެސް ޕީޕީއެމްގެ ބައެއް މެމްބަރުން ވަނީ ނިހާންގެ އެ އަމަލް ދިފާއުކޮށް ވާހަކަ ދައްކާފައެވެ.