އައްޑޫ ކޮންވެންޝަން ސެންޓަރުގެ ގޮޑި ސިޔާސީ އެއްވެސް ހަރަކާތެއްގައި ބޭނުން ނުކުރާ ކަމަށް ބުނެ ހައުސިން މިނިސްޓަރ ޑރ. މުހައްމަދު މުއިއްޒު މިއަދުގެ ރައްޔިތުންގެ މަޖިލީހުގެ ޖަލްސާގައި އިތުރުފުޅު ހައްދަވައިފިއެވެ.
އައްޑޫ މީދޫ ދާއިރާގެ މެމްބަރު އެމްޑީޕީގެ މެމްބަރު ރޮޒެއިނާ އާދަމް، ރައްޔިތުންގެ މަޖިލީހުގެ ޖަލްސާގައި ކުރެއްވި ސުވާލަށް ޖަވާބު ދެއްވަމުން މުއިއްޒު ވިދާޅުވީ އީސީސީގައި ހުރި ގޮނޑިތައް މާލެ އަށް ގެނައީ، ރާއްޖޭގެ މިނިވަންކަމަށް 50 އަހަރު ފުރުމާ ބޭއްވި ޖަލްސާތަކުގައި ބޭނުން ކުރުމަށް ކަމަށެވެ. އަދި އޭގެ ފަހުން އެ ގޮޑި އައްޑޫއަށް ފޮނުވުމާއި ގުޅޭ ގޮތުން ގޮތެއް ނުނިންމަވާ ކަމަށެވެ.
މުއިއްޒު ވިދާޅުވީ އެ ގޮޑިތައް އެއްވެސްގޮތަކަށް ސަރުކާރުން ނަހަމަ ގޮތުގައި ބޭނުން ނުކުރާ ކަމަށާއި، ސިޔާސީ އެއްވެސް ހަފްލާއަކަށް ގޮޑި ބޭނުން ކޮށްފައި ނުވާ ކަމަށެވެ.
ޑރ. މުއިއްޒު މި ގޮތަށް ވިދާޅުވި އިރު ސަރުކާރުން ބާއްވާ ގިނަ ހަފްލާ ތަކާއި، ޕީޕީއެމް އެކި ޖަލްސާތަކުގައި އީސީސީގެ ގޮޑި ބޭނުން ކުރާ ތަން ދިވެހި ރައްޔިތުންނަށް ފެނެއެވެ.
އެގޮތުން މި މަހުގެ 7 ވަނަ ދުވަހުގެ ރޭ މާލޭ ހުޅަގު ފަރާތުގައި ހެދި "ރަސްފަންނު" ހުޅުވުމުގެ ރަސްމިއްޔާތުގައި ވެސް ބޭނުން ކޮށްފައިވަނީ އީސީސީގެ ގޮޑިއެވެ.
މިއަދުގެ ޖަލްސާގައި މުއިއްޒު ވިދާޅުވީ މިނިވަން 50 އާއި ދިމާކޮށް 850 ގޮޑި މާލެ ގެނެސްފައިވާ ކަމަށެވެ.