ސ. ފޭދޫ ބިން ހިއްކުމުގެ މަޝްރޫއުގެ ފުރަތަމަ ފިޔަވަހީގެ މަސައްކަތް ފަށައިފިއެވެ.
ނެދަލެންޑްސްގެ ވައްނޫރު ޕްރައިވެޓް ލިމިޓެޑް އާއި ހަވާލުކޮށްގެން ކުރިއަށްދާ މި މަސައްކަތުގައި މިހާރު ފަށާފައިވަނީ ބިން ހިއްކުމުގެ ކުރިން ހަދަން ޖެހޭ ބަންޑްވޯލްގެ މަސައްކަތެވެ. އެކުންފުނިން ބުނީ މޫސުން ގޯސް ނުވެ މަސައްކަތް ކުރިއަށް ގެންދެވޭނަމަ ހަތަރު ހަފްތާ ތެރޭގައި މަސައްކަތް ނިންމާލެވޭނެ ކަމަށެވެ.
ފޭދޫ ބިން ހިއްކުމާއި ގުޅޭ ގޮތުން ހައުސިން މިނިސްޓްރީގެ ކޯޑިނޭޓަރ މުހައްމަދު ފައިސަލް ބުނީ ބަންޑްވޯލްގެ މަސައްކަތް ނިމޭ ތަނަށް ކޮންނަ ބޯޓު ފޭދޫއަށް އަންނާނެ ކަމަށެވެ. އަދި ހަފްތާއެއްހާ ދުވަހުގެ ތެެރޭގައި ބިން ހިއްކާ ނިމޭނެ ކަމަށެވެ.
ފައިސަލް ބުނީ ފޭދޫގެ ބިން ހިއްކާ ނިމޭއިރު 64 ހެޓަރުގެ ބިން ހިއްކޭނެ ކަމަށެވެ. އަދި ބިން ހިއްކުމަށްފަހު ހިއްކި ތަނުގެ ރިވެޓްމަންޓް ޖެހުމަށް ނިންމާަފައިވާ އިރު މި މަސައްކަތް ވެސް ކުރާނީ ވަންނޫރު ޕްރައިވެޓް ލިމިޓެޑްއިން ނެވެ.
ފޭދޫ އަކީ އައްޑޫގެ ރަށްތަކުގެ ތެރެއިން ބިމުގެ ދަތިކަން އެންމެ ބޮޑު އެއްރަށެވެ.