ދައުލަތުން 88 މިލިއަން ޑޮލަރު ނެގި މީހަކު 18 ޑޮލަރަށް ދޭ ތާސްބައެއް އަޅުގަނޑަށް ދިން ވާހަކަ އެމްޑީޕީން ދެއްކުމަކީ ބޮޑު ޖޯކެއް ކަމަށް ރައީސް އަބްދުﷲ ޔާމީން މިއަދު ވިދާޅުވެއްޖެއެވެ.
ހއ.އުތީމު ރައްޔިތުންނާއި ބައްދަލުކުރައްވާ މިއަދު ދެއްކެވި ވާހަކަފުޅުގައި ރައީސް ޔާމީން ވިދާޅުވީ އެންމެ 18 ޑޮލަރުގެ ތާސްބައެއް އެމަނިކުފާނު ގެންގުޅޭ ވާހަކަ އެމްޑީޕީން ބޮޑު ކޮށްގެން ދެއްކުމަކީ ބޮޑު ޖޯކެއް ކަމަށެވެ.
ރައީސް ޔާމީން ރަން ތާސްބައެއްގެ ވާހަކައެއް ދެއްކެވި އިރު އެމަނިކުފާންގެ އުފަންދުވަހުގެ ހަދިޔާއަކަށް ކުރީގެ ނައިބް ރައީސް އަހްމަދު އަދީބް ރަން ތާސްބައެއް ދެއްވިކަމަށް އިދިކޮޅު އެމްޑީޕީން ވަނީ ބުނެފައެވެ.
އެމްއެމްޕީއާރްސީގެ ބޮޑު ކޮރަޕްޝަންގެ ތުހުމަތުގައި ހުންނެވި އަދީބް ރައީސް ޔާމީންގެ އުފަންދުވަހަށް ރަން ތާސްބައެއް ދެއްވި ކަމަށް ބުނާއިރު އެމަނިކުފާންގެ އަނބިކަނބަލުން މެޑަމް ފާތުމަތު އިބްރާހީމްގެ އުފަން ދުވަހުގެ ހަދިޔާއަކަށް 80،000 ޑޮލަރުގެ އަގުބޮޑު ބީއެމްޑަބްލިޔު ކާރަކާއި 100،000 ޑޮލަރުގެ އަގުހުރި އަލިމަސްޖެހި އަނގޮޓިއެއް އަދީބު ދެއްވާފައި ވެއެވެ.
ރައީސް ޔާމީން މިއަހަރުގެ ފެބްރުއަރީ 24 ވަނަ ދުވަހު އއ. ތޮއްޑޫގައި ވިދާޅުވީ "އަނބިމީހާވެސް ފިރިމީހާ ގާތު ފައިސާ ހޯދީ ކިހިނެއްތޯ ނާހާ ކަމަށެވެ".
ރައީސް ޔާމީން މިހާރު ގެންދަވަނީ ރައްޔިތުންނާއި ބައްދަލު ކުރާ ގިނަ ހަފްލާ ތަކުގައި، އިދިކޮޅު ފަރާތްތަކުން ދައްކަވާ ވާހަކަތަކަށް "ރުންކުރު" ގޮތަކަށް ޖަވާބު ދެއްވަމުންނެވެ.