ކްރިމިނަލް ކޯޓުގެ އިސް ގާޒީގެ ފޮޓޯއެއް ނެގުމަކީ މިހާރު ކުށަކަށްވާ ހިސާބަށް ގޮސްފިއެވެ. މިދިޔަ ފެބްރުއަރީ މަހުގެ 20 ވަނަ ދުވަހުގެ ވަގުތެއްގައި ބާރީގެ ފޮޓޯއެއް ނެގިކަމަށް ބުނެ ގައުމީ ޓީމްގެ ކެޕްޓަން އައްސަދު އަލީ (އަޑުބަރޭ) ވަނީ ހައްޔަރުކޮށް ކްރިމިނަލް ކޯޓުން މުއްދަތު ޖަހާފައެވެ.
އަޑުބަރޭ ހައްޔަރު ކުރުމުގެ ކުރިން ގާޒީ ބާރީ، ފުލުސް ކަމިޝްނާ އަރީފްއަށް ފޮނުއްވި ސިޓީގައި ބުނެފައިވަނީ ކޯޓުގެ ހުރުމަތް ރައްކާތެރިކުރުމާ ބެހޭ ގަވައިދުގެ ދަށުން ނުވަތަ އެހެން ގާނޫނެއްގެ ދަށުން ވިޔަސް އެ މީހާއާ މެދު ފިޔަވަޅު އަޅައިދިނުމަށެވެ. ބާރީގެ ސިޓީ ފޮނުވި ފަހުން އެރޭ ދަންވަރު އަޑުބަރޭ ވަނީ ހައްޔަރުކޮށްފައެވެ.
އޭގެ ފަހުން އިއްޔެ ބާރީގެ ފޮޓޯއެއް ނެގި މައްސަލާގައި ރާއްޖޭގެ 3 ނޫހެއް ކްރިމިނަލް ކޯޓަށް ނުވައްދަން މިވަނީ ނިންމާފައެވެ.
ހަވީރު ނޫހުން އިއްޔެ ނެގި ބާރީގެ ފޮޓޯ ކްރިމިނަލް ކޯޓުގެ މުވައްޒަފަކު ޑިލީޓް ކުރުވިފަހުން އެފޮޓޯ މިހާރުވަނީ ސޯޝަލް މީޑިއާގައި ވައިރަލްވެފައެވެ.
ރައީސް ނަޝީދު އާއި ކާނަލް ނާޒިމް އަދި އަދާލަތު ޕާޓީގެ ރައީސް ޝެއިހް އިމްރާންއަށް ފެންނަން ހުރި ހެއްކާއި ދެކޮޅަށް ހުކުމް ކުރައްވާފައިވާ ބާރީގެ ފޮޓޯ އެކި ފަރާތްތަކުން ޝޯޝަލް މީޑިއާގައި ޝެއާ ކުރަމުން އަންނަ އިރު ގިނަ ބައެއްގެ ނުރުހުން ބާރީ އަށް ވަނީ އަމާޒުވެފައެވެ.
ސޯޝަލް މީޑިއާގައި ދައުރުވަމުންދާ ފޮޓޯގައި ބާރީ ސިނގިރޭޓެއް ހިއްޕަވައިގެން ފޯނުން "ސެލްފީ"އެއް ނަންގަވަން އުޅުއްވާ ކަހަަލަ މަންޒަރެއް ސިފަވެއެވެ.
ކްރިމިނަލް ކޯޓަށް ރާއްޖޭގެ ތިން ނޫހެއްގެ ނޫސްވެރިން ނުވައްދަން ނިންމުމާއި ގުޅިގެން މީޑިއާ ކައުންސިލުން މިވަނި ކަންބޮޑުވުން ހާމަކޮށްފައެވެ. އެ ކައުންސިލުން ބުނީ މިއަމަލަކީ ނޫސްވެރިންގެ މަސައްކަތް ހުއްޓުވުމަށް ކުރި ކަމެއް ކަމަށެވެ.