تَعَلَّمُوْا العَرَبِيَّةَ فَإِنَّهَا مِنْ دِيْنِكُمْ ތިޔަބައިމީހުން އަރަބިބަސް އުގެނޭށެވެ! ފަހެ، ހަމަކަށަވަރުން އެއީ ތިޔަބައިމީހުންގެ ދީނުގެ ތެރެއިންވާ ކަމެކެވެ.
ދުނިޔެވީ ހަޔާތަކީ އިންސާނާއަށް ﷲ ދެއްވާފައިވާ ވަރަށްބޮޑު ނިއުމަތެކެވެ. މި ނިއުމަތް ފައިދާ ކުރުވަނި ކަންތައްތަކުގައި އަދި ހަމަ ގެއްލުމާއި ހަލާކުގެ ކަންތައްތަކުގައި ވެސް ބޭނުންކުރެވިދާނެއެވެ. ނުބައި ކަންތައްތަކުން މިންޖުވެ ރަގަޅު ކަންތައް ޚިޔާރު ކުރުމަށްޓަކައި މިދެބައި ވަކިކުރަން ކޮންމެ އިންސާނަކަށް އެގުމަކީ ނުހަނު ބޭނުންތެރިކަމެކެވެ. ހިދާޔަތު ކިޔަނީ މިފަރަގު ކުރުމަށެވެ.
ހިދާޔަތު ލިބިގަނެވޭނީ ހަމައެކަނި ޚާލިގުވަންތަ ﷲ ގެ ހަޟުރަތުންކަމީ ޔަގީންވެ ކަށަވަރުކަމެކެވެ. ﷲ ސުބުހާނަހޫ ވަތަޢާލާ ނަބީންނާއި ރަސޫލުން ދުނިޔެއަށް ފޮނުއްވީ މި މަގުސަދު ފުރިހަމަ ކުރެއްވުމަށެވެ. އާދެ! ހިދާޔަތާއި ތެދުމަގު ދެއްކެވުމަށެވެ. އާދަމުގެފާނުން ފެށިގެން އެކި ޒަމާންތަކުގައި އެކި ގައުމުތަކަށް ނަބީންނާއި ރަސޫލުން ފޮނުއްވިއެވެ. އަދިﷲ ސުބުހާނަހޫ ވަތައާލާ ނަބީންނާއި ރަސޫލުންނަށް ވަޙީ ބާވައިލެއްވުމުގައި އިންސާނުންނަށް ލުއި ފަސޭގޮތްތަކަށް ވަރަށް ބޮޑަށް ބައްލަވައި ލައްވާފައިވެއެވެ.
އެބޭކަލުންގެ ރިސާލަތު އިންސާނުންނަށް ވިސްނައި ދެއްވުމަށާއި އަދި އިންސާނުން އެރިސާލަތު ވިސްނައި ގަތުމަށްޓަކައި އިންސާނާއަށް ބަސްމޮށުންތެރިކަން ނުހަނު ބޭނުންތެރިއެވެ. މިސަބަބަށްޓަކައި އިންސާނުންނަށް ބަސްމޮށުންތެރިކަން ﷲ ދެއްވިއެވެ. އެގޮތުން ހިދާޔަތު ނުވަތަ ހެވާއި ނުބައި ދަނެގަތުމަށް ފަސޭހައަކަށް ވެގެން ދިޔައެވެ. ދުނިޔެވީ ހަޔާތުގައި ތިމާގެ ނަފުސު ނުބައި ކަންތައްތަކުން ސަލާމަތްކޮށް ހެޔޮކަންތައްތަކުގައި ހޭދަކޮށްފި މީހަކީ ކާމިޔާބު ލިބިގެންވާ މީހެއްކަން ކަށަވަރެވެ.
ކޮންމެ އިންސާނަކީ ކޮންމެވެސް ބަހެއް އެގޭނެ މީހެކެވެ. އެބަސް އޭނައަށް ރަގަޅަށް އެގެންވެސް ޖެހެއެވެ. އެބަހަށް މިކިޔަނީ މާދަރީބަހެވެ. ތަފާތު އެހެނިހެން އިލްމުތައް އުގެނެންޖެހެނީ އެމީހެއްގެ މާދަރީ ބަހުންނެވެ. ތިމާގެ މާދަރީ ބަސްފިޔަވައި އެހެން ބަސްތައްވެސް އުގެނުން ރަގަޅީ މާދަރީ ބަހުންނެވެ. ފައިދާވެސް ބޮޑީ މިގޮތުގައިކަން ތަޖުރިބާތަކުން ދައްކައެވެ.
މިއަދު ދުނިޔޭގައި ހަތްބިލިއަނަށްވުރެ ގިނަ މީހުން ދިރިއުޅެމުންދާއިރު މިބައިމީހުންގެ ތެރޭގައި ހަހާހަށްވުރެ ގިނަ ބަހުން ވާހަކަ ދައްކައެވެ. ކޮންމެ ގައުމަކަށް ކޮންމެ ގަބީލާއަކަށް އަދި ކޮންމެ ވަންހައަކަށް ވެސް އެބައެއްގެ މާދަރީ ބަހަކީ ވަރަށް މުހިއްމު އެއްޗެކެވެ. އެބައެއްގެ މާދަރީބަހާއި ނުލައި އެބައެއްގެ ޘަގާފަތާއި އާދަކާތައް އަދި ތަހުޒީބާއި ދީން އުގެނި އަދި އަންނަންއޮތް ޖީލުތަކަށް އެކަންތައް ރަގަޅު ގޮތުގައި ވާސިލު ކޮށްދިނުމަކީ ވަރަށް ދަތިއުދަގޫ ކަމެކެވެ. އަހަރެމެން އެންމެހައި ދިވެހިންގެ ދީނަކީ އިސްލާމް ދީނެވެ. އަހަރެމެންގެ މާދަރީ ބަހަކީ ދިވެހިބަސްކަމުގައި ވިޔަސް މުސްލިމެއްގެ ހައިސިއްޔަތުން އަހަރެމެން އަރަބިބަހަށް ލޯބިކޮށް އެބަސް އުގެނުން އެއީ ކޮންމެ ދިވެއްސެއްގެ މައްޗަށް ލާޒިމު ކަމެކެވެ.
ޝައްކެއްނެތް ގޮތުގައި ޢަރަބި ބަސް އުނގެނުމަކީ ދީނުގެ ތެރެއިންވާ ކަމެކެވެ. މިލިޔުމުގެ ސުރުޚީގައި ބަޔާންކުރެވިފައި އެވަނީ ޢުމަރުގެފާނުންގެ ބަސްފުޅެކެވެ. "تَعَلَّمُوْا العَرَبِيَّةَ فَإنَّهَا مِنْ دِيْنِكُم "ތިޔަބައިމީހުން އަރަބިބަސް އުގެނޭށެވެ!
ފަހެ، ހަމަކަށަވަރުން އެއީ ތިޔަބައިމީހުންގެ ދީނުގެ ތެރެއިންވާ ކަމެކެވެ. އަދި "އިބުނު ތައިމިއްޔާ ވިދާޅުވެފައިވާ ބަސްފުޅެއްގެ މާނައިގައި ވެއެވެ. "ޢަރަތްބާއި، ޢަރަބި ތަޢުލީމު އުނގެނުމަކީ ކިފާޔަތުގެ ފަރުޟެކެވެ. ޢަރަބި ބަހުންނޫނީ ދީނުގެ އިލްމު ދެނެއެއް ނުގަނެވޭނެއެވެ. "ޢަރަބިބަހަކީ ކީރިތި ޤުރުއާނުގެ ބަހެވެ. އެއީ އަހަރެމެންގެ މާތް ނަބިއްޔާ މުޙައްމަދު ޞައްލަﷲ އަލައިހި ވަސައްލަމަ އެބަހަކުން ވާހަކަދެއްކެވި ބަހެވެ. ﷲ ތަޢާލާގެ ފޮތާއި އަދި ރަސޫލުﷲ ޞައްލަﷲ އަލައިހި ވަސައްލަމަގެ ސުންނަތް ބަޔާންވެގެން އައި ބަހަކީ ޢަރަބި ބަހެވެ.
ދިވެހިރާއްޖެއަކީ ސައްތައިންސައްތަ އިސްލާމީ ގައުމެކެވެ. އެހެންކަމުން މިގައުމުގައި އިގިރޭސިބަހަށްވުރެ ބޮޑަށް ނުވަތަ އެބަހާ އެއްވަރަށް އަރަބިބަސް އަހަރުމެންގެ ދަރިންނަށް އެގެންނުޖެހޭތޯއެވެ؟ ތިމާމެންގެ ދަރިންގެ ދެދުނިޔޭގެ ހަޔާތްބާއްޖަވެރި ކުރަން ބޭނުންނަމަ ކޮންމެ ބެލެނިވެރިޔަކުވެސް މިކަމަށް އިޖާބަދޭށެވެ. މީގެ އަހަރުތަކެއްކުރިން ޒަމާނީތައުލީމުގެ ތެރެއިން ރާއްޖޭގެ ސްކޫލްތަކުގައި އަރަބިބަސް މާއްދާއްއެއްގެ ގޮތުގައި ކިޔަވައިދޭންފެށުމަކީ ހެޔޮފާލެއްކަމުގައި ގަބޫލުކުރަންޖެހެއެވެ.
އަދި މިއަށްވުރެ އުފާވެރިކަމަކީ މާލެ ފިޔަވައި ރާއްޖޭގެ އުތުރާއި ދެކުނުގައި އާދެ ހދ. ކުޅުދުއްފުއްޓާއި އައްޑޫސިޓީ ހިތަދޫ ނޫރާނީސްކޫލްގައި ޒަމާނީ ތައުލީމު އަރަބިބަހުން ނުވަތަ އަރަބިމީޑިއަމަށް ކިޔަވައިދޭން ފެށުމެވެ. އަތޮޅުތަކުގައި އެންމެ ފުރަތަމަ އަރަބިމީޑިއަމް ސްކޫލެއްގެ ގޮތުގައި ހަމަޖެހިގެން ދިޔައީ ހިތަދޫ ނޫރާނީ ސްކޫލެވެ. ކުރިމަގުގައި ނޫރާނީ ސްކޫލަކީ ގްރޭޑް އެކަކުން ގްރޭޑް ބާރައަށް މިސަރަހައްދުގެ ދަރިންނަށް ޒަމާނީ ތައުލީމު އަރަބިބަހުން ހާސިލްކުރުމަށް ލިބުނު ރަނުގެ ފުރުސަތެކެވެ.
ފުރުސަތުގެ ބޭނުން ހެޔުގޮތުގައި ހިފުމަކީ ބުއްދިވެރިކަމެކެވެ. މީގެ ތިރީހަކަށް އަހަރު ކުރިން މާލޭގައި ވަނީ އަރަބިމީޑިއަމަށް ކިޔަވައިދޭން ފަށާފައެވެ. އަލްމަދުރަސަތުލް އަރަބިއްޔާ ގައެވެ. އޭގެ ނަތީޖާ ވަރަށްވެސް ރަގަޅުކަމުގައި ދަންނަވަންޖެހެއެވެ. ދެދުނިޔޭގެ ހަޔާތް ކާމިޔާބު ކުރަން އެދޭމީހާ، އަރަބި ތައުލީމު ހާސިލު ކުރުމަކީ ލާޒިމު ކަމެއްކަމުގައި ދެންނެވުމަކީ ކުށަކަށް ނުވާނެކަން ކަށަވަރެވެ.