ރިއާސީ ލޯންޗް ގޮއްވާލި މައްސަލަ އާއި ހިބަޅިދޫން ހަތިޔާރު ހޯދުމަށް ހިންގި އޮޕަރެޝަނާއި، މުލިއާގެ ކައިރިން ފެނުނު ގޮވާ ޒާތުގެ އެތި ހޯދުމުގައި ޖިންނީންގެ އެހީ ހޯދިކަމަށް ފުލުހުން ބަލަމުންދާ މައްސަލައެއްގައި ހައްޔަރުކޮށްފައިވާ ސިހުރު ހަދާ މީހަކު ބުނެފިއެވެ.
ފިނިފެންމާ ލޯންޗުކޮޅުގެ ތަހުގީގަށް ހއ. ހޯރަފުށީ، އޯރާ، އަހުމަދު މަމްދޫހު ލައްވާ ސިހުރު ހަދައިގެން އެ މައްސަލަ އާއި ގުޅުން ހުރި މައުލޫމާތު ހޯދާފައިވެ އެވެ. ތަހުގީގަށް މަމްދޫހު ލައްވާ ޖިންނި ބޭނުން ކުރުވައިގެން މައުލޫމާތު ހޯދުމަށް ފަހު މުލިއާގެ ކައިރީގައި ބޮމެއް ބޭއްވި މައްސަލައިގެ ތުހުމަތުގައި މަމްދޫހު ހައްޔަރު ކޮށްފައިވާއިރު އޭނާގެ މައްޗަށް ވަނީ ޓެރަރިޒަމުގެ ދައުވާ ވެސް އުފުލާފަ އެވެ.
މުލިއާގެ ކައިރީ ބޮމެއް ބޭއްވި މައްސަލާގެ ތަހުގީގަށް މަމްދޫހު ދިން ބަޔާނުގައި ބުނެފައިވާ ގޮތުގައި ޖިންނި ބޭނުން ކޮށްގެން މައްސަލަ އާއި ގުޅުން ހުރި މައުލޫމާތު ހޯދުމަށް އޭނާގެ ގާތުގައި އެދުނީ ޗީފް އޮފް ޑިފެންސް ފޯސް މޭޖާ ޖެނެރަލް އަހުމަދު ޝިޔާމު އެވެ. އަދި ޝިޔާމް އޭނާ ގާތުގައި އެކަމަށް އެދުނީ ރައީސް އަބްދުﷲ ޔާމީންގެ އެދިވަޑައިގަތުމުގެ މަތިން ކަމަށް ވެސް ބުނެފައިވެ އެވެ.
މަމްދޫހު ބުނެފައިވާ ގޮތުގައި ޖިންނި ބޭނުން ކޮށްގެން މައުލޫމާތު ހޯދުމަށް ޝިޔާމް އޭނާ އަށް ފައިސާ ވެސް ހުށަހެޅި އެވެ. ނަމަވެސް އެކަހަލަ ކަންތައްތަކަކީ ފައިސާ އަށް އޭނާ ކޮށްދޭ ކަންތައްތަކަށް ނުވާތީ ފައިސާ ނަގާފައިނުވާނެ ކަމަށް ބުނެފައިވެ އެވެ.
އެއަށް ފަހު، އެމްއެންޑީއެފްގެ ތެރޭގައި ހައްޔަރުކޮށްފައި ތިބި ސިފައިންގެ މައުލޫމާތާއި، މާލެ ތެރޭގައި އެއްވެސް ހަތިޔާރެއް ގެންގުޅޭނަމަ އެފަދަ ކަންތައްތައް ބަލައިދިނުމަށް ޝިޔާމް އެދިފައިވާ ކަމަށާއި ޖިންނި ގެނެސްގެން އެކަންކަން ބަލައި ދިނުމަށް ތަކުރާރުކޮށް އެދެމުން ދިޔަ ކަމަށް މަމްދޫހު ބުނެފައިވެ އެވެ.
މަމްދޫހު ބުނެފައި ވަނީ ޖިންނި ގެނެސްގެން ސުވާލުކުރުމަށް ތަނެއް ބޭނުންވާނެ ކަމަށް ޝިޔާމްގެ ގާތުގައި އެދުމުން ޕޯސްޓަލް ބިލްޑިން ކައިރީގައި ހަދަމުން ދިޔަ އިމާރާތެއް ހަމަޖައްސައިދިން ކަމަށެވެ. އެއަށް ފަހު ޖިންނި ސޫރަތާއި އާޔަތުލް ކުރްސި އާއި ސޫރަތުލް ފާތިހާ އާއި އިހްލާސް، ފަލަގް، ނާސި ތިން ފަހަރު ކިޔެވުމަށް ފަހު ތ. ތިމަރަފުށީ، ވިލާ، ޒިހާން އަހުމަދުގެ (މުލިއާގެ ކައިރީގައި ބޮމެއް ބޭއްވި މައްސަލާގައި ހައްޔަރުކޮށްފައިވާ މީހެއް) ހަށިގަނޑަށް ޖިންނި އެއް ވެއްދި ކަމަށް އޭނާ ބުނެފައިވެ އެވެ.
އެއަށް ފަހު ޒިހާންގެ ނިތްކުރީގައި އަތް ލައިގެން ހުރި ކަމަށާއި އޭރު އޭނާގެ ހަށިގަނޑަށް ޖިންނި ވަދެފައި ހުރި ކަމަށް މަމްދޫހު ބުނެފައިވެ އެވެ. ޒިހާންގެ ހަށިގަނޑަށް ޖިންނި ވެއްދުމަށް ފަހު ޝިޔާމް އަށް ސުވާލުކުރުމުގެ ފުރުސަތު ދިން ކަމަށާއި ޝިޔާމް ސުވާލު ކުރީ އެމްއެންޑީއެފް އިން ބަންދުކޮށްފައިވާ މީހުންނަކީ ލޯންޗު ގޮއްވާލުމުގައި ބައިވެރިވި ބައެއްތޯ އާއި އަހުމަދު ފަޔާޒް (ޕާޕާ) އެކަމުގައި ހިމެނޭ ތޯ ކަމަށް އޭނާ ބުނެފައިވެއެވެ. އޭނާ ބުނީ އެމްއެންޑީއެފްގެ ތެރޭގައި ބަންދުކޮށްފައި ތިބި މީހުންނާއި ޕާޕާގެ ބައިިވެރިވުން އެކަމުގައި އޮތްތޯ ސުވާލު ކުރުމުން ޒިހާންގެ ހަށިގަނޑުގައި ހުރި ޖިންނި އާއެކޭ ބުނެފައިވާ ކަމަށެެވެ. އަދި އޭރުގެ ނައިބު ރައީސްގެ ބައިވެރިވުން އޮތްތޯ ސުވާލުކުރުން ފުރަތަމަ ފަހަރު އާއެކޭ ބުނި ނަމަވެސް ދެވަނަ ފަހަރު ސުވާލުކުރުމުން ނޫނެކޭ ބުނެފައިވާ ކަަމަށެވެ.
އޭގެ ފަހުން އެހެން ރެއެއްގައި ވެސް ޒިހާންގެ ހަށިގަނޑަށް ޖިންނި ވެއްދުމަށް ފަހު ޝިޔާމް ސުވާލު ކޮށްފައިވާ ކަަަމަށް އޭނާ ބުނެފައިވާއިރު އެ ރޭ ސުވާލު ކޮށްފައިވަނީ ރާއްޖޭގައި ކުރިން ވެރިކަން ކޮށްފައި ތިބި ބޭފުޅުންގެ ބައިވެރިވުން ބޮން ގޮއްވުމުގައި އޮތްތޯ އެވެ. އެގޮތުން ދިގު މުއްދަތެއް ވަންދެން ރާއްޖޭގައި ވެރިކަން ކުރި މީހެއްގެ ބައިވެރިވުން އޮތްތޯ އެހުމުން ނަމެއް ނާންނަ ކަމަށް ޖިންނި ބުނުމުން ވަކިވަކިން ރައީސުންގެ ވާހަކަ އަހަމުން ދިޔަ ކަމަށެވެ.
އެގޮތުން ކުރީގެ ރައީސް މުހައްމަދު ނަޝީދުގެ ވާހަކަ އެހުމުން ނޫނެކޭ ބުނެފައިވާ ކަމަށާއި އަދި ދިގު މުއްދަތެއް ވަންދެން ވެރިކަން ކުރެއްވި މީހެއްގެ އަތެއްވޭތޯ ސުވާލު ކުރުމުން ޖިންނި އާއެކޭ ބުނެފައިވާ ކަމަށް މަމްދޫހު ބަޔާން ދީފައިވެ އެވެ.
މަމްދޫހު ބުނެފައި ވަނީ އެއަށް ފަހު ޝިޔާމް އޭނާ އާއި ބައްދަލުކޮށް ރާއްޖޭގެ އެކި ހިސާބުތަކުގައި ހަތިޔާރު ގެންގުޅޭ ކަމުގެ މައުލޫމާތު ލިބިފައިވާ ކަަމަށާއި އެތަކެތި ހުރި ތަންތަން ހޯދައި ދިނުމަށް އެދިފައިވާ ކަމަށެވެ. މުޅި ރާއްޖެ އެގޮތަށް ބެލުން ފަސޭހަ ކަމަކަށް ނުވާނެތީ ޝައްކުކުރެވޭ ރަށްތައް ގެެނެސްދިނުމަށް އެދުމުން ބ. ހިބަޅިދޫ އާއި ބޮޑުކާށިހުރާ އާއި އިތުރު ރަށެއްެގެ ފޮޓޯ ޝިޔާމް ގެނެސްދިން ކަމަށް އޭނާ ބުނެފައިވެ އެވެ.
ޝިޔާމް ގެނެސްދިން ރަށްތަކާއި ބެހޭ ގޮތުން ބަލަންޖެހޭ ބެލުންތައް ބެލުމަށް ފަހު އެންމެ ބޮޑަށް ޝައްކު ކުރެވެނީ ހިބަޅިދޫ ކަމަށް ޝިޔާމް ގާތުގައި ބުނި ކަމަށާއި ޖެހިގެން އައި ދުވަހު ހިބަޅިދޫ އިން ހަތިޔާރު ފެނިއްޖެ ކަމަށް ޝިޔާމް ދެންނެވި ކަމަށް އޭނާ ބުނެފައިވެ އެވެ. އެ ރަށުގައި އިތުރު ހަތިޔާރު ހުރިތޯ ބަލައިދިނުމަށް އެދުމުން މާލޭގައި ހުރެ އެކަން ކުރަން ފަސޭހަނުވާނެ ކަމަށް ބުނުމުން ސިފައިންގެ އެސްއެފް ޔުނިފޯމެއް ލަައްވައިގެން ހިބަޅިދޫ އަށް ގެންދިޔަ ކަމަށް އޭނާ ބުނެފައިވެ އެވެ. އަދި އޭނާ އާއެކު ދޫނިދޫގައި ހައްޔަރުކޮށްފައި ހުރި މީހެއް ވެސް އެރަށަށް ގެންދިޔަ ކަމަށް ބުނެފައިވެ އެވެ.
މީގެ އިތުރުން އޭނާގެ ހަށިގަނޑަށް ޖިންނި ވައްދައިގެން މައުލޫމާތު ހޯދުމަށް އެދުނު ކަމަށާއި އޭނާ ކަނުބަނދެ ހިބަޅިދޫ ގޮނޑުދޮށުގައި ބޭންދުމަށް ފަހު އެނގޭ މައުލޫމާތުތައް ހިއްސާ ކުރުމަށް އެމީހުންނާއެކު އެރަށަށް ދިޔަ ހަސަން ޝާހިދު (ޝާޑު ސޯ) އެންގި ކަމަށް ބުނެފައިވެ އެވެ. ނަމަވެސް އެއްވެސް މައުލޫމާތެއް އެކަމާއި ގުޅިގެން ނޭނގޭ ކަމަށް ބުނުމުން އޭނާ އިށީނދެގެން އިން ގޮނޑި ވަށާ ބޮޅެއް އެޅުމަށް ފަހު އޭނާގެ ކަކުލުގައި އަތް ޖައްސައިގެން އިނދެ މީހުން ސިއްރުން ފޮރުވާފައި ހުންނަ ކަންކަން އެމީހުންގެ ފަރާތުން ކިޔައިދިނުމަށް އެދި އަލަމްތަރަ ސޫރަތް 98 ފަހަރު ކިޔެވުމަށް ފަހު ތަހުގީގުކުރާ ފުލުހުންނާއި އޭނާ ހަވާލުކުރި ކަމަށް ވެސް ބުނެފައިވެއެވެ.
އަދި ފުލުހުން އޭނާ އާއި ސުވާލުކުރުމުން ކުށަށް އިއުތިރާފުވި ކަމަށާއި އެހެެނިހެން ކަންތައްތައް ވެސް ކިޔައިދީފައިވާ ކަމަށް މަމްދޫހު ބުނެފައިވެ އެވެ.
އެއަށް ފަހު މާލެ ތެރޭގައި ގޮވާ ޒާތުގެ އެއްޗެހި ގެންގުޅޭ ކަމަށް ޝައްކުކުރެވޭ ކަމަށާއި އެކަން ބަލައި ދިނުމަށް ޝިޔާމް އެދިވަޑައިގެންނެވި ކަމަށް އޭނާ ބުނެފައިވެ އެވެ. އެކަން ބަލަމުންދަނިކޮށް ރައީސް ދަތުރު ކުރައްވާ މަގުގައި ގޮވާ އެއްޗެއް ބާއްވާފައި އޮތް ކަމަށް މައުލޫމާތު ލިބިފައިވާ ކަމަށް ޝިޔާމް ވިދާޅުވި ކަމަށާއި އަދި ރައީސް ދަތުރުކުރައްވާ މަގުތައް ޝިޔާމް ދެއްކެވި ކަމަށް އޭނާ ބުނެފައިވެ އެވެ.
އެއަށް ފަހު ގެއަށް ގޮސް ބަލަން ޖެހޭ ބެލުންތައް ބެލުމަށް ހާޖަތުގެ ދެރަކުއަތުގެ ނަމާދުކޮށް ކިޔަވަންޖެހޭ ސޫރަތްތަކާއި ދަލީލުތައް ކިޔެވުމަށް ފަހު އެކަމަށް ވަގުތު ހުސް ކުރި ކަމަށާއި އެއީ އެ ކިޔެވުންތައް ކިޔެވުމުން ހިތަށް އަންނަ ތަނަކީ އެ ބޮން އޮވެދާނެތަނެއް ކަަމަށް ލަފާކުރެވޭނެ ކަމަށް އޭނާ ބުނެފައިވެ އެވެ.
އަދި މުލިއާގެ ސަރަަހައްދުގައި ޕާކްކޮށްފައި ހުރި ވެހިކަލްތައް ކައިރީ ހުރެ ކިޔެވެލިތައް ކިޔަވަމުން ދަނިކޮށް ޕިކަޕެއްގެ ބެޓަރީމަތީ އެއްޗެއް އޮތްވާ ފެނުނު ކަމަށާއި އެ ބަލާލިއިރު ނަރުތަކެއް ފެނުމުން ސިފައިންގެ ތެރެއިން އޭނާ އާއި ހަވާލުވެ ތިބި މީހުންނަށް އެކަން އެންގި ކަމަށް އޭނާ ބުނެފައިވެއެވެ. އަދި އެއީ ބޮމެއް ކަން އެނގުނީ ސިފައިން ހަރަކާތްތެރިވުމުން ކަމަށާއި މާފަންނު ސްޓޭޑިއަމް އަށް އެ ބޮން ގެންދިޔައިރު ސިފައިންނާއެކު އެތަނުގައި ހަރަކާތްތެރިވި ކަމަށް އޭނާ ބުނެފައިވެ އެވެ.
އަދި ޝާޑް ސޯ އާއިއެކު ގެއަށް ދިޔަ މަގުމަތީގައި ޝާޑް ސޯ އަށް ފޯނު ކޯލަކަށް ފަހު "އަނެއްކާވެސް އެ ސީން ކުޅޭށޭ މިޖެހެނީ، ކިހިނެތްހޭ މިއޮތް ވިއްސާރާގައި އެފަދަ ކަމެއް ކުރާނީ،" ބުނި ކަމަށް އޭނާ ފުލުހުންގެ ތަހުގީގަށް ދިން ބަޔާނުގައި ބުނެފައިވެ އެވެ. އަދި އޭގެ ފަހުން ވީ ކަންތައްތައް ނޭނގޭ ކަމަށާއި ނަމަވެސް އެ ސަރަހައްދުގެ ވީޑިއޯ ފޫޓޭޖް އޭނާ އަށް ދެއްކި ކަމަށް ބުނެފައިވެއެވެ.
މީގެ އިތުރުން އޭނާގެ ބަޔާނުގައި ބުނެފައިވަނީ މުލިއާގެ ކައިރީގައި ބޮމެއް ބޭއްވުމުގައި ބައިވެރިވެފައިނުވާނެ ކަމަށާއި އަދި މައްސަލާގައި ދެން ހިމެނޭ މީހުންނާއި ގުޅިގެން އެފަދަ ކަމެއް ރާވާފައި ވެސް ނުވާނެ ކަމަށެވެ. އޭނާ ބުނެފައި ވަނީ އެ ސަރަހައްދުގައި އޭނާ ހަރަކާތްތެރިވީ ޝިޔާމްގެ އެދިވަޑައިގަތުމުގެ މަތިން ބޮން ހޯދުމަށް ކަމަށެވެ.
މުލިއާގެ ކައިރީގައި ބޮން ބޭއްވި މައްސަލަ އާއި ގުޅިގެން މަމްދޫހާއި ޒިހާނާއި މުހައްމަދު އުބައިދު އަދި ތަލްއަތުގެ މައްޗަށް ވަނީ ޓެރަރިޒަމުގެ ދައުވާ ކޮށްފަ އެވެ. އެ މައްސަލާގެ ފުރަތަަމަ އަޑުއެހުން ހޯމަ ދުވަހު ކްރިމިނަލް ކޯޓުގައި ބާއްވާފައިވާއިރު އެ އަޑުއެހުން ވަނީ ސިއްރުކޮށްފަ އެވެ.