އިއްޔެ ހެނދުނު އަނިޔާވެރި ގޮތަކަށް މަރާލާފައި އޮތްވައި ފެނުނު ހިތަދޫގެ ވިޔަފާރިވެރިޔާ، އަލްމަރްޙޫމް އަލީ ޢަބްދުﷲ އާއި ބެހޭގޮތުން ދޮގު ވާހަކަ ނުދެއްކުމަށް ޝެއިޚް މުޙައްމަދު އަނީލް އިލްތިމާސް ކޮށްފިއެވެ.
ޝެއިޚް މުޙައްމަދު އަނީލް ވަނީ މައްޔިތާ އާއި ބެހޭގޮތުން ދޮގު ވާހަކަ ނުދެއްކުމަށާއި އަދި މައްޔިތާ އާއި ބެހޭ ގޮތުން ހެޔޮ އަދި ރަގަޅު ވާހަކަ ދެއްކުމަށް ގޮވާލާފައެވެ.
ޝެއިޚް އަނީލްގެ ފޭސްބުކްގައި ލިޔުއްވާފައި ވާ ގޮތުގައި، ރަސޫލާ صـلّى الله علـيـه وسـلّم ވެސް ވަނީ މުސްލިމުންގެ ތެރެއިން މަރުވެފައިވާ މީހުންގެ ގެޔޮ ކަންތަކުގައި ނޫނީ ޒިކުރު ނުކުރަން އަމުރު ކުރައްވާފައެވެ.
" އަޅުގަނޑުގެ އަވަށްޓެރިއެއް ކަމަށް ވާތީ އަޅުގަނޑު ވަރަށް ގިނައިން ދެކެ ފަރިތަ ބޭފުޅެއް ކަމަށްވާ ޢަލީ އަކީ އަބަދުވެސް މިސްކިތަށް ގޮސް އައިސް ހަދާ ޢަޚެކެވެ. ފަތިސް ނަމާދުގެ ޖަމާޢަތަކީ، އާންމުކޮށް މީހުން މަދު ޖަމާޢަތަކަށް ވިޔަސް އާންމުކޮށް އެ ޖަމާޢަތުން ވެސް އަލީ ފެނެއެވެ. މިފަދަ ހިތާމަވެރި ދަނޑިވަޅެއްގައި އަލީ އާއި ބެހޭގޮތުން ހިތުހުރި ނުވަތަ އަޑު އިވޭހާ ވާހަކައެއް ނުދެއްކުމަށާއި، މިދަނޑިވަޅުގައި އަލީ އަށް ހެޔޮ ރަޙްމަތަށާއި އާއިލާއަށް ކެތްތެރިކަމަށް އެދި ދުޢާ ކުރެއްވުމަށް އައްޑޫގެ ލޮބުވެތި ރައްޔިތުންނަށް ގޮވާލަމެވެ."
މައުލޫމާތު ލިބިފައިވާ ގޮތުގައި އަލީ އަބްދުﷲ އަކީ، ޝެއިޚް އަނީލްގެ އަވަށްޓެރިއެކެވެ. އަލީގެ ހަށިގަނޑު ހޮސްޕިޓަލަށް ގެންދިޔަ ގަޑީގައި އެސަރަހައްދަށް ދިޔުމުން މައްޔިތާ އާއި ބެހޭ ގޮތުން އެކި ވާހަކަ ތައް ދެއްކި އަޑު އަހި ކަމަށާއި އެފަދައިން ކަންތައް ނުކުރުމަށް ވެސް ޝެއިޚް އަނީލް ވަނީ ގޮވާލާފައެވެ.
'އައްޑޫލައިވް' އާއި ވާހަކަ ދެއްކި އައްޑޫގެ ގިނަ ވިޔަފާރިވެރިން ވެސް ބުނި ގޮތުގައި އަލީ އަކީ، ވަރަށް މަޑުމައިތިރި އަދި މީހުންނާއި ގުޅޭ މީހެއް ކަމަށެވެ.
އަލީ އަބްދުﷲ މަރާލި މައްސަލަ ތަހުގީގު ކުރުމަށް ފުލުހުންގެ ޓީމެއް އައްޑޫގައި ހަރަކާތްތެރިވަމުން އަންނަ އިރު މިހާތަނަށް އަދި އެއްވެސް މީހަކު ހައްޔަރުކުރި ކަމެއް ފުލުހުން ހާމަކޮށްފައެއް ނުވެއެވެ.