ރޭ ހިތަދޫގައި މީހަކަށް ތޫނު އެއްޗަކުން ހަމަލާ ދޭން މަސައްކަތް ކުރުމަށްފަހު އޭނާގެ އަތު އަޅައި ޒަހަމްތަކެއް ކުރި މީހަކު ފިލައިފިއެވެ.
"އައްޑޫލައިވް"އަށް މައުލޫމާތު ދެމުން އަނިޔާ ލިބުނު މުހައްމަދު ބުނީ އޭނާއަށް ރޭވެސް އާއްމު ކޮށް ފޯނު ކުރާ ފަރާތަކުން ޓެކްސީއެއް ހޯދުމަށް ގާތްގަޑަކަށް ޜޭ 9:30 ހާ އިރު ގުޅުމުން ހިތަދޫ ބޮޑުމަގުގައި ހުންނަ ޗެކްމާކް ފިހާރަ ކުރިމަތީ ގޯޅިއަަށް ވަދެ ކާރު މަޑު ކުރިތަނާ ހެން ކާރުގެ ފަހަތު ދޮރު ހުޅުވާލުމަށްފަހު ވަން މީހަކު ވަޅި އެއް ނަގައި އޭނާއަށް ހަމަލަދޭން އުޅުނުކަމަށެވެ. އެގޮތަށް އޭނާ ހަމަލާ ދޭން އުޅުމުން އޭނާގެ އަތުގައި ހިފުމުން އަތުގެ ދެ ތަނަކާއި، ބޮލުގެ ބައެއްގައި ދަށް އެޅުމަށްފަހު ވަޅި ދޫކޮށް ކާރުން ފުންމާލައި ފިލާފައި ވާ ކަމަށެވެ.
މިހާދިސާ ހިތަދޫ ޕޮލިސް ސްޓޭޝަނަށް ހުށަހަޅާފައިވާ އިރު މިހާދިސާގައި މީހަކު ހައްޔަރު ކުރި ކަމެއް އެނގިފައި ނުވެއެވެ.
މި ދުވަސްކޮޅު އައްޑޫގައި ތަފާތު ކުށް ތައް ގިނަ ވެފައިވާ އިރު ، މިމަހުގެ 2 ވަނަ ދުވަހު ވަނީ އަނިޔާވެރި ގޮތަކަށް ހިތަދޫގެ ވިޔަފާރިވެރިއަކު މަރާލާފައެވެ.
މިމައްސަލަ ފުލުހުންގެ ފޮރެންސިކް ޓީމަކުން ތަހްގީގު ކުރަމުން އަންނަ އިރު މިހާތަނަށް މި މައްސަލަ އާއި ގުޅިގެން މީހަކު ހައްޔަރުކޮށްފައި ނުވެއެވެ.