މި މަހުގެ 2 ވަނަ ދުވަހު އިރު އެރީ ކުއްލި ސިހުމަކާއި އެކުއެވެ. ހިތަދޫ "ޓޫވޭވް" ފިހާރައިގެ ވެރިޔާ، އަލީ އަބްދުﷲ ގެއްލިގެން ހޯދަމުންދާ ވާހަކައެވެ. އަލީ ގެއްލިގެން ފުލުހުންނަށް ރިޕޯޓް ކުރިތާ ބައިގަޑި އިރު ނުވަނީސް ދެން އިވުނީ އަނިޔާވެރި ގޮތަަކަށް އަލީ މަރާލުމަށްފަހު، ހިތަދޫ ސްކޫލްގެ ފުރަގަހުގައި އޮތް އޮޅަކަށް އެއްލާލާފައިވަނިކޮށް ފެނުނު ވާހަކައެވެ.
އެއާއި އެކު ރައްޔިތުންގެ މެދުގައި ބޮޑު ބިރުވެރިކަމެއް އުފެދިގެން ދިޔައެވެ. އަލީ އެހާ ރަހުމް ކުޑަކޮތަކަށް މަރާލީ ކީއްވެ ހެއްޔެވެ؟ މީ ކޮންބަޔަކު ކޮން ބޭނުމެއްގައި ކުރި ކަމެއް ހެއްޔެވެ؟ އަދިވެސް މި ސުވާލްތަކަށް ޖަވާބެއް ނުލިބެއެވެ.
ހުރިހާ ރައްޔިތުން ވެސް އިންތިޒާރު ކުރަމުން ދަނީ އަލީގެ މަރުގެ ހަގީގަތް ފުލުހުން ހާމަ ކުރަން ދެނެވެ. ފުލުހުންގެ ހާއްސަ ޓީމަކުން މައްސަލަ ތަހްގީގު ކުރަމުން އަންނަ އިރު އަދި އެމަރާއި ގުޅިގެން ފުލުހުން އެއްވެސް ވާހަކައެއް ނުދައްކައެވެ.
އަލީގެ މަރުގެ މައްސަލާގައި ފުލުހުންނަށް ލިބުނީ ކިހާ ކުރިއެރުމެއްކަން އަދި ނޭގެއެވެ. ނަމަވެސް މިކަމުގައި ހަބަރެއް ނެތިދާ ކޮންމެ ދުވަހަކީ ރައްޔިތުންގެ ތެރޭގައި ބިރުވެރިކަން ބޮޑުވެގެންދާ ކަމެކެވެ. ދެން މަރާލާނީ ކާކު ހެއްޔެވެ؟ އެބަޔަކު ކޮބާ ހެއްޔެވެ؟
މި ސުވާލުތައް ހިތުތެރޭގައި އުފެދި ޖަވާބެއް ނުލިބި އުޅެނިކޮށް ރޭ ހިތަދޫގެ ޓެކްސީ ޑްރައިވަރަކަށް މިވަނީ ތޫނު އެއްޗަކުން ހަމަލާދޭން މަސައްކަތް ކޮށްފައެވެ.
ހިތަދޫ ބޮޑު މަގުގައި ހުންނަ ޗެކްމާކް ކުރިމަތީގައި އޮންނަ "އަނދިރި" ގޯޅިތެރެއަށް ޓެކްސީއެއް ގެނެސް އޭގެ ޑްރައިވަރަށް ހަމަލާދޭން މަސައްކަތް ކުރުމަށްފަހު، އޭނާގެ އަތުގެ ދެ ތަނަކަށާއި، ބޮލުގައި ދަތްއެޅުމަށްފަހު އެމީހަކު ވަނީ ފިލާފައެވެ. އެއާއި އެކު އަނެއްކާވެސް ބިރުވެރިކަން މިވަނީ އިންތިހާއަށް ބޮޑުވެފައެވެ.
އައްޑޫގެ މަލަމަތި މިވަނީ ނާމާންވެފައެވެ. ބައެއް ރައްޔިތުން ބުނާ ގޮތުން ކުށްވެރިން ތިބީ މުޖްތަމައަށް ދޫކޮށްލެވިފައެވެ. އެމީހުންނަށް ގާނޫނުގެ ތެރެއިން ފުރިހަމަ ރައްކާތެރިކަން އެބައޮތެވެ. އެހެންވެ އެބަޔަކު ކުށްތަކަށް އަރައި ގަތުމަށް ފަސް ނުޖެހެއެވެ.
މިގައުމުގައި ބުނާ ކަހަލައެވެ. ވައްކަން ކުރުމާއި، ފޭރުމާއި، މީހުން މެރުމަކީ ހުއްދަކަމެކެވެ. އެކަމަކު ހިޔާލް ފަޅު ކުރުމާއި، އެއްވެ އުޅުމާއި، އާއްމު ތަންތަނުގައި ފޮޓޯ ނެގުމަކީ ގާނޫނީ ގޮތުން މަނާ ކަންކަމެވެ. އެފަދަ ފަރާތްތައް ބަންދުކޮށް ހުކުމް އައުން ހާދަހާވާ އަވަހެވެ.
އައްޑޫގައި އަމާން މާހައުލެއް ގާއިމް ކޮށްދިނުމަކީ، މި ރައްޔިތުންގެ އެންމެ ބޮޑު އުއްމީދެވެ. އަޅުގަޑުމެންގެ އަޙުން، އުޙުތުންނަށް އަނިޔާ ލިބުމަކަށް ނޭދެމެވެ.
އައްޑޫގެ ރައްޔިތުން މިހާރު މިތިބަ ބިރުވެރިކަމުން، އަމާން އައްސޭރިއަކަށް ގެނެސްދެވެން އޮތީ ގާނޫނު ހިފެހެއްޓިގެންނެވެ. ގާނޫނުގެ ވެރިކަން އެންމެނަށް ހަމަހަމައަށް ލިިބިދީގެންނެވެ. ރައްޔިތުންގެ ފަރާތުން ޒިއްމާއާއި ހަާލުވެ ތިބި ފަރާތްތަކުގެ ފުރިހަމަ ޒިއްމާ ބަރާބަރަށް އަދާކުރެވިގެންނެވެ.