ކަރަޕްޝަންގެ ދައުވާކޮށް އައްޑޫގެ މޭޔަރ އަބްދުﷲ ސޯދިގް (ސޯބެ)އަށް ފުރައްސާރަ ނުކުރުމަށް ސަރުކާރަށް މިއަދު އެމްޑީޕީން ގޮވާލައިފިއެވެ.
އެމްޑީޕީން މިގޮތަށް ގޮވާލާފައިވަނީ 17 ވަނަ ސާކް ސަމިޓާއި ދިމާކޮށް ކޮންވެންޝަން ސެންޓަރުގެ ޑިޒައިން މަސައްކަތްތަކާއި އާޓް ވޯކްގެ ހުރިހާ މަސައްކަތެއް މަހަކު 15،000ރ. ދޭ ގޮތަށް 2011 ވަނަ އަހަރު ކައުންސިލުން ކުންފުންޏަކާއި އިއްލާން ކުރުމެއް ނެތި ހަވާލުކޮށް އެކުންފުންޏަކަށް 369،000ރ. ދޫކޮށްފައިވާ ކަމަށް އެންޓި ކަރަޕްޝަން ކަމިޝަނުން (އޭސީސީ) ތަހްގީގު ކޮށް މައްސަލަ ޕްރޮސެކިއުޓަރ ޖެނެރަލް އޮފީހަށް ފޮނުވުމާއި ގުޅިގެންނެވެ.
އެމްޑީޕީން ބުނީ ސޯބޭގެ މައްޗަށް ކޮރަޕްޝަންގެ ތުހުމަތު ކުރެވޭކަމަށް ބުނެ ޕީޖީއަށް ފޮނުވީ ކަނޑައެޅިގެން ބިރު ދެއްކުމަށާއި އެއީ ސަރުކާރުން ކުރާ ފުރައްސާރައެއް ކަމަށެވެ.
އެމްޑީޕީއިން މިއަދު ނެރުނު ނޫސްބަޔާނެއްގައި ބުނީ، ސާކް ސަމިޓު ބޭއްވުމަށް ސަރުކާރުން އިމާރާތްކުރި އައްޑޫ ކޮންވެންޝަން ސެންޓަރުގެ އިންޓީރިއާ ޑިޒައިން ކުރުމަށް އެންމެ ހެޔޮ އަގުގައި ހޯދުނު އާޓްވާކްތަކެއް ބޭނުންނުކޮށް ބަހައްޓާފައިވާކަމަށް ބުނާ ބުނުމުގެ ފުރިހަމަ ޒިންމާ އެމްޑީޕީ ސަރުކާރަށްފަހު ގާއިމުކުރި ސަރުކާރުތަކުން ނަންގަން ޖެހޭނެ ކަމަށެވެ.
"ފެބްރުއަރީ 2012 ގައި އެމްޑީޕީ ސަރުކާރު ވައްޓާލިއިރު އައްޑޫ ކޮންވެންޝަން ސެންޓަރު ތަރައްގީކުރުމަށް ކުރެވިފައިވާ ހުރިހާ މަސައްކަތްތައް ބާތިލް ކުރުމަށްފަހު ކޮންވެންޝަން ސެންޓަރުގެ ހުރިހާ ކަމެއް ސަރުކާރުގެ ބެއްލުވުމުގެ ދަށަށް ގެންނަވައި އެ ކޮންވެންޝަން ސެންޓަރަކީ އައްޑޫ ސިޓީ ކައުންސިލްގެ އެއްވެސް ބާރެއް ނުހިނގާ ތަނެއްގެ ގޮތުގައި ހެއްދެވިއެވެ. އެއަށްފަހު ދައުލަތުން ބޮޑެތި ހަޚަރަދުކޮށްފައިވާ އައްޑޫ ކޮންވެންޝަން ސެންޓަރު ވީރާނާ ވުމަށް ދޫކޮށްލާފައިވާކަން ކަންބޮޑުވުމާއެކު ފާހަގަ ކުރަމެވެ." އެމްޑީޕީގެ ބަޔާނުގައިވެ އެވެ.
"މިދަނޑިވަޅުގައި އައްޑޫ ސިޓީ މޭޔަރުގެ މައްޗަށް މިފަދަ ތުހުމަތެއްކުރައްވައި އަސާސެއް ނެތް ދައުވާއެއް އުފުއްލަވައި، ބޭއިންސާފުން ޝަރީއަތް ހިންގެވުމަށް ކުރެވޭ މަސައްކަތަކީ ކަނޑައެޅިގެން އެމަނިކުފާނަށާއި އައްޑޫ ސިޓީގެ ރައްޔިތުންނަށް ބިރުދެއްކެވުމަށާއި، އައްޑޫ ހޮސްޕިޓަލާއި ކޮންވެންޝަން ސެންޓަރާ ގުޅޭ ގޮތުން މި ސަރުކާރުން ހިންގަވާ ބޮޑު ޖަރީމާ ފޮރުވުމަށް ކުރާ މަސައްކަތެއް ކަމުގައި ގަބޫލުކުރެވެއެވެ." ބަޔާނުގައިވެ އެވެ