ޒަހަމްތަކަކާއި އެކު މަގުމައްޗަށް އެއްލާލާފައި އޮތް ޒުވާން ކުއްޖަކު ހިތަދޫން ފެނިއްޖެއެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި ހިތަދޫ އާގަލާ ފިހާރަ ކުރިމަތީ އޮންނަ ހަނި ގޯޅިގަނޑުގެ ތެރެއިން ޒަހަމް ތަކަކާއި އެކު ފެނިފައިވަނީ ހިތަދޫ، އަލިމަސްވަދީ، އިރުޝާމް، ނަމަކަށް ކިޔާ ކުއްޖެކެވެ.
އެކުއްޖާ އަކީ ހިތަދޫ ޝަރަފުއްދީން ސްކޫލްގެ ގްރޭޑް 10އެއްގައި ކިޔަވަމުންދާ ކުއްޖެއްކަމަށް މައުލޫމާތު ލިބެއެވެ.
ހިތަދޫ ރީޖަނަލް ހޮސްޕިޓަލް ސަރަހައްދުގައި ހުރި މީހަކު "އައްޑޫލައިވް"އަށް ބުނީ އިރުޝާމް ގެނައީ ފުލުހުންގެ ވެހިކަލެއްގައި ކަމަށާއި، ގެނައި އިރުވެސް އޮތީ ހޭނެތިފައި ކަމަށެވެ.
އިރުޝާމްގެ ބޮލަށް ދަނގަޑުބުރިއެއް ކަހަލަ އެއްޗަކުން ހަމަލާ ދީފައިވާ ކަމަށްވެސް އޭނާ ބުންޏެވެ.
އިރުޝާމްއަށް ހިތަދޫ ރީޖަނަލް ހޮސްޕިޓަލްގެ އިމަޖެންސީ ރޫމްގައި ފަރުވާ ދެމުން އަންނަ އިރު އަދި މާބޮޑު ތަފްސީލެއް ހޮސްޕިޓަލުން ވަނީ ލިބޭ ގޮތް ނުވެފައެވެ.
ފުލުހުން ވަނީ އިރުޝާމް ފެނުނު ގޯޅި ބަންދުކޮށް ތަހްގީގު ފަށާފައެވެ.
މިދިޔަ ބުދަ ދުވަހު ހިތަދޫގެ ވިޔަފާރިވެރިއަކު އަނިޔާވެރިގޮތަކަށް މަރާލާފައިވާ އިރު އިއްޔެ ވަނީ ޓެކްސީ ޑްރައިވަރަކަށް ތޫނު އެއްޗަކުން ހަމަލާދޭން މަސައްކަތް ކޮށް އޭނާގެ ބޮލާއި އަތުގެ ދެ ތަނެއްގައި ދަތް އަޅާފައެވެ.