" އެހެން މީހުންނާއި ނިބެހި މަޑުން ތިބޭ ފެހޭ އެހެކަސް މިޔެއި ނިބެހޭ ހެއް"
" މަޑުން ތިބޭ ނަމަ އެއްވެސް ބަޔަކު ނުބުހޭނެއެވެ. (މީހަކު ގޯނާއެއް ވެސް ނުކުރާނެއެވެ)"
މިއީ މިދިޔަ ބުދަަ ދުވަހުގެ ހެނދުނާއި ހަމައަށް، އައްޑޫގެ ގިނަ ބަޔަކު ޤަބޫލުކުރަމުން ދިޔަ ގޮތެވެ. ނަމަވެސް އަނިޔާވެރިގޮތެއްގައި ހިތަދޫގެ ވިޔަފާރިވެރިއެއް ކަމުގައިވާ އަލީ އަބްދުﷲ މަރާލި ހިސާބުން އެކަން އެގޮތަށް ޤަބޫލުކޮށްގެން ފަރުޖައްސާލެވެން ނެތްކަން މިވަނީ ހާމަވެގެން ގޮސްފައެވެ.
އަނިޔާވެރި ގޮތަކަށް މަރާލުމަށް ފަހު އޮޅެއްގެ ތެރެއަށް އެއްލާލާފައި އޮތްވައި ފެނުނު އަލީ އަބްދުﷲ އަކީ، ސ.ގަމުން ފެށިގެން ހިތަދޫ އާއި ހަމައަށް ހުރިހާ އެންމެން ވެސް މަޑުމައިތިރި މީހެއްގެ ލަޤަބު ދީފައިވާ ވިޔަފާރިވެރިއެކެވެ.
ވިޔަފާރިވެރިންގެ މެދުގައި ކުރާ ބަހުސްތައް ކިތަންމެ ހޫނުވިޔަސް އޭނާ ހަމަ ހިނިތުން ވުމަކާއި އެކު ހުންނަ ހުރުމަކީ އައްޑޫގެ ގިނަ ވިޔަފާރިވެރިންގެ ހިތުން ދުވަހަކުވެސް ފިލައިގެން ދާނެ ކަމެއް ނޫނެވެ.
" ވިޔަފާރީގެ ކަންކަމުގައި މިހެން އުޅޭ އިރު ދެން އަހަރުމެން ތަކެތީގެ އަގާއި ބެހޭގޮތުން ބަހުސް ކުރާނެ. އެކަމަކު އެކަހަލަ ބަހުސެއްގައި ވެސް މަށެއް އަޑެއް ނާހަން ރުޅިއައިސްގެން ބާރަށް އެއްޗެއް ބުނި އަޑެއް" ހިތަދޫގެ ވިޔަފާރިވެރިޔަކު ބުންޏެވެ.
އަލީ އަބްދުﷲ ދަންނަ މީހުން ބުނާ ގޮތުގައި އޭނާ އަކީ ހަމައެކަނި ވިޔަފާރިވެރިއެއް ނޫނެވެ. އޭނާ އަކީ އެތައް ބަޔަކަށް ބޭބެ އެއް ފަދަ މީހެކެވެ. ގާތް ރައްޓެއްސެކެވެ. އެންމެންގެ "އަލިބޭ" އެވެ. ހިތްހަމަ ނުޖެހުނަސް ހުތުރު ބަހުން ވާހަކަ ދައްކާ މީހެއް ނޫނެވެ.
މީގެ 15 އަހަރު ކުރިން، އައްޑޫގައި 'ޓޫވޭވް' ނަމުގައި ފިހާރައެއް ހިންގަން ފެށި ހިސާބުން އަލީ އަބްދުﷲ އަކީ، އައްޑޫގެ ގުޅިފައިވާ ރަށްތަކުގެ ހުރިހާ ވިޔަފާރިވެރިން ވެސް ދަންނަ މީހެކެވެ. ސ.ގަމުން ފެށިގެން ހިތަދޫ އާއި ހަމައަށް ޓޫވޭވް އަލީ އޭ ބުނުމުން ނޭނގޭނެ ވިޔަފާރި ވެރިޔަކު ނުހުންނާނެއެވެ.
ކޮންމެހެން ޓޫވޭވް ފިހާރައަކީ، މާ ބޮޑު ފިހާރައަކަށް ވީމައެއް ނޫނެވެ. ފިހާރައިގެ ސޭޓަކީ ހުރިހާ ވިޔަފާރިވެރިންނާއި ގާތް ގުޅުމެއް ބާއްވާ މީހަކަށް ވީމައެވެ. މީހުންނާއި ގުޅޭ އަދި އަބަދުވެސް މަޑުމައިތިރި މިޒާޖެއްގެ މީހެއް ކަމަށް ވީމައެވެ.
"އަހަރެންނާއި އަލީ އާދި އެންމެ ފުރަތަމަ ދިމާވީ މީގެ 10 އަހަރު ކުރިން. ވަރަށް މަޑުމައިތިރި މީހެއް. ހިތްހަމަ ނުޖެހޭ ކަންކަމުގައި ހަޅޭއްލަވައި ޒުވާބު ނުކުރާނެ. ރީތި ބަހުން ވާހަކަ ދައްކާ މީހެއް އެއީ" ، ހިތަދޫގައި ފިހާރައެއް ހިންގާ މީހަކު ބުންޏެވެ.
އަނިޔާވެރި ގޮތަކަށް އަލީ މަރާލީ ކީއްވެގެން ކަން ހޯދުމަށް ބޭނުންވެފައި ތިބީ އޭނާގެ ގާތްތިމާގެ މީހުން އެކަންޏެއް ނޫނެވެ. އަލީގެ މަރުގެ މައްސަލައިގެ ހަޤީގަތް ހޯދުމަކީ މިއަދު އައްޑޫގެ ކޮންމެ ވިޔަފާރިވެރިއަކު ވެސް އެންމެ ބޭނުންވާ ކަމެވެ. އައްޑޫގެ ކޮންމެ ރައްޔިތެއްގެ މުސްތަޤްބަލަށް ޓަކައި، ކޮންމެހެން ވެސް މުހިއްމު ކަމެކެވެ.
އަލީގެ މަރުގެ ފަހަތުގައި ވަނީ މުދަލަށް ދަހިވެތިވުން ކަމުގައި ވިޔަސް ނުވަތަ ކޮންމެ ކަމެއް ކަމުގައި ވިޔަސް އޭގެ ހަގީގަތް އެނގެން ޖެހެއެވެ.