އައްޑޫގެ މޭޔަރ އަބްދުﷲ ސޯދިގް (ސޯބެ) އަތުން 2 މިލިއަނަށް ވުރެ ގިނަ ރުފިޔާ ހޯދުމަށް އޭސީސީން ޕްރޮސެކިއުޓަރ ޖެނެރަލް އޮފީހަށް ފޮނުވައިފިއެވެ.
ސޯބެ އަތުން ދެމިލިއަނަށް ވުރެ ގިނަ ރުފިޔާ ހޯދަނީ 17 ވަނަ ސާކް ސަމިޓަށް އައްޑޫ ޒިނަތްތެރިކުރުމަށް 1000 ގަސް މުށި ހެދުމުގައި، މަގާމާއި ނުފޫޒު ބޭނުންކޮށްގެން ވަކި ބަޔަކަށް މަސައްކަތް ހަވާލުކޮށްފަވާތީ، އާއި މަސައްކަތުގެ ކަންކަން ކުރިއަށް ގޮސްފައިވަނީ ކަރަޕްޝަނަށް މަގުފަހިވާ ގޮތަކަށް ކަމަށް އެސީސީން ތަހްގީގު ކުރުމަށްފަހުއެވެ.
ސާކް ސަމިޓްގެ ތައްޔާރީ ތަކުގެ ތެރެއިން، ހެދި ގަސް މުށިތައް ހެދުމަށް ހަވާލުކޮށްފައިވަނީ ހިތަދޫ، ފަލަކް އެންތަޕްރައިޒަސް އާއި ފޭދޫ ޓްވިގް ކޮންސްޓަކްޝަން އާއިއެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި އޭސީސީން ކުރިއަށް ގެންދިޔަ ތަހްގީގަށް ކައުންސިލް އިދާރާގައި އޭރު މަސައްކަތް ކުރި 3 މުވައްޒަފަކު ވަނީ ބަޔާން ދީފައެވެ.
ފަލަކް އެންޓަޕްރައިޒަސްއަށް މި މަސައްކަތަށް 1،307،020 ރުފިޔާ ދީފައިވާ އިރު ޓްވިގަށް ދީފައިވަނީ 1،148،190 ރުފިޔާއެވެ. މުޅި މަސައްކަތަށް 2،455،210 ރުފިޔާ ހަރަދުކޮށްފައިވާ ކަމަށް އޭސީސީގެ ތަހްގީގުގައި ވެއެވެ.
މީގެ އިތުރުން އީސީސީގެ އިންޓީރިއާ ޑިޒައިންގެ މަސައްކަތެއް ކޮރަޕްޝަނަށް މަގުފަހިވާ ގޮތަށް ބަޔަކާ ހަވާލުކުރި މައްސަލައެއްގައި ވެސް ސޯބެގެ މައްޗަށް ޖިނާއީ ދައުވާ ކޮށްދިނުމަށް އެދި ވެސް މީގެ ކުރިން އޭސީސީން ވަނީ ޕީޖީ އޮފީހަށް ފޮނުވައިފަ އެވެ
ސޯބެގެ މައްޗަށް ކަރަޕްޝަން ދައުވާ އުފުލުމާއި ގުޅިގެން އެމްޑީޕީން ވަނީ ސޯބެއަށް ފުރައްސާރަ ކުރުން ހުއްޓާލުމަށް ސަރުކާރަށް ގޮވާލާފައެވެ.
އައްޑޫގެ މޭޔަރ އާއި ގުޅުން ހުރި ކަރަޕްޝަން މައްސަލަތައް ކުއްލިގޮތަކަށް އޭސީސީން ޕީޖީއަށް ފޮނުވަމުންދަނީ ރާއްޖޭގައި މިހާތަނަށް ފެންމަތިވި އެންމެ ބޮޑު ކަރަޕްޝަން މައްސަލަ ތަހްގީގު ކުރަމުންދާ ދަނޑިވަޅެއްގައެވެ.
އަދި މި ކަރަޕްޝަންގައި ރައީސް އަބްދުﷲ ޔާމީން އާއި އެބޭފުޅާގެ އަނބިކަބަލުން ފާޠިމަތު އިބްރާހިމްގެ އިތުރުން ސަރުކާރުގެ އިސް ބައެއް ފަރާތް ހިމެނޭ ކަމަށް އިދިކޮޅު ފަރާތްތަކުން ދަނީ ބުނަމުންނެވެ.