ހިތަދޫގެ ވިޔަފާރިވެރިޔަކު އަނިޔާވެރި ގޮތަކަށް މަރާލުމަށް ފަހު އެއްލާލާފައި އޮތްވައި ފެނުނު ހިސާބުން ފެށިގެން މުޅި އައްޑޫގެ ރައްޔިތުން ބިރުވެރިކަމުގައި ތިބޭތާ މާދަމާ އަށް ހަފްތާއެއް ވާނެއެވެ.
ވިޔަފާރިވެރިޔާގެ މަރުގެ ހާދިސާގެ އިތުރުން ޓެކްސީ ޑްރައިވަރެއްގެ ގައިގައި ދަތް އެޅި މައްސަލަ އާއި ޒަޚަމްކޮށްލުމަށް ފަހު އެއްލާފައި އޮތް އުމުރުން 15 އަހަރުގެ ފިރިހެން ކުއްޖަކު ފެނުން ވެގެން ދިޔައީ އައްޑޫގެ ރައްޔިތުންގެ ކަންބޮޑުވުންތައް އިތުރުވެގެން ދިޔަ ކަމަކަށެވެ.
އަލީގެ މަރުގެ މައްސަލައާއި އޭގެ ފަހުން އައްޑޫގައި ހިނގާފައިވާ ގިނަ ހަމަނުޖެހުންތަކާއި ގުޅޭ މައްސަލަ ފުލުހުން ބަލަމުން ގެންދާއިރު، ސުވާލަކީ އައްޑޫގެ ރައްޔިތުން ތަމްސީލުކުރުމަށްޓަކައި ރައްޔިތުން އިންތިޙާބުކޮށްފައި ތިބި 7 މެންބަރުން ކޮބައިތޯއެވެ؟
މަޖިލީހުގައި އެވާހަކަ ދެއްކެވީ މިހާތަނަށް، ހިތަދޫ މެދު ދާއިރާގެ މެންބަރު އިބްރާހިމްދީދީ އެކަންޏެވެ. އެބޭފުޅާގެ ވާހަކަ ބޮޑަށް ސިފަވެގެން ދިޔައީ، އެ ޚަބަރު މަޖިލީހުގެ މެންބަރުންނަށް ދިނުމަށް ދެއްކި ވާހަކަ އެއްގެ ގޮތުގައެވެ. ނަމަވެސް ދިވެހި ފުލުހުންނަށް އެފަދަ ކަންތަކުން ރައްޔިތުން ސަލާމަތް ކުރުމަށް އިތުރަށް މަސައްކަތް ކުރުމަށް އެދިވަޑައިގަތެެވެ.
އެހިސާބުން އެވާހަކަ ދައްކަވާނެ "ގަޓް" ހުރި މަޖިލިސް މެންބަރެއް ނެތެވެ. ރައްޔިތުންގެ މަޖިލީހުގެ ޤަވާއިދުގެ 145 ވަނަ މާއްދާގައި ބުނެފައިވާ ފަދަ ކުއްލި މައްސަލަ އެއް އެދުވަހު މަޖިލީހަށް ހުށަހަޅާނެ "ގަޓް" ހުރި މެންބަރެއް އައްޑޫއަށް ނިސްބަތްވާ 7 މެންބަރުންގެ ތެރޭގައި ނެތުމަކީ ހިތާމަކުރަން ޖެހޭ ކަމެކެވެ.
މަޖިލީހުގެ ޤަވާއިދުގެ 145 ވަނަ މާއްދާގައި ބުނެފައި ވަނީ، ޖަލްސާއެއް ހިނގަމުންދަނިކޮށް، ޖަލްސާއެއްގެ އެޖެންޑާގައިވާ ކަންކަން ހުއްޓުމަކަށް ގެނެސް، ރައްޔިތުންގެ ނުވަތަ ޤައުމުގެ މަޞްލަޙަތު ހިމެނިގެންވާ މުހިންމު ކަމެއް، ކުއްލި މައްސަލައެއްގެ ގޮތުގައި، ޖަލްސާއަކަށް ހުށަހެޅުމުގެ ފުރުޞަތު ކޮންމެ މެންބަރަކަށްވެސް ލިބިގެންވާ ކަމަށެވެ. އެ ފުރުސަތުގެ ބޭނުން އެއްވެސް މެންބަރަކު ނުހިފީ ކީއްވެ ހެއްޔެވެ؟
ސިޔާސީ ލީޑަރުންނާއި ގުޅުން ހުރި މައްސަލަތަކުގައި އާއި ތަފާތު އެހެނިހެން ކަންކަމުގައި މަޖިލީހުގެ ތަޅުމުގައި އައްޑޫއަށް ނިސްބަތްވާ 7 މެންބަރުން ވެސް "ގަޓު" ދައްކަވާފައި ވާއިރު، އައްޑޫގެ ރައްޔިތުން ތިބި ބިރުވެރިކަމުގެ ތެރެއިން އެ ރައްޔިތުން އަމާންވެއްޓަކަށް ގެންގޮސް ދިނުމަށް ނުކެރުމަކީ ހިތާމަކުރަން ޖެހޭ ކަމެކެވެ.
އަލީ އަބްދުﷲގެ މަރަށް ހަފްތާއެއް ވާއިރު އަދިވެސް އެކަން ކުރި ބަޔަކު ނުހޯދި، އިތުރު ނުތަނަވަސްކަމާއި ނާމާންކަން މިވަނީ އައްޑޫގެ ރައްޔިތުން ވަށާލާފައެވެ.
ކުއްލި މައްސަލައަކީ، ރައްޔިތުންގެ ނުވަތަ ޤައުމުގެ މަޞްލަޙަތަށް ސީދާ އަސަރުކުރާފަދަ ބޮޑުކަމެއް ކުއްލިއަކަށް ދިމާވުމުން، އެ ކަމެއް ސަރުކާރުގެ ސަމާލުކަމަށް ގެނައުމަށާއި، ސަރުކާރުން އެކަމާމެދު އަޅާފައިވާ ނުވަތަ އަޅާފައިނުވާ ފިޔަވަޅަކަށް ފާޑުކިޔުމުގެ ގޮތުން، އަދި، މައްސަލަ ހުށަހެޅުމަށް މި ގަވާއިދުގައި އޮންނަ އުސޫލުން ހުށަހަޅައިފިނަމަ، އެކަމުގެ މުޢާލާތް ކެނޑިދާނެތީ، ނުވަތަ ވަގުތު ފާއިތުވެދާނެތީ، ހުށަހަޅާ މައްސަލައެކެވެ.
ދަތް އެޅުމާއި، މާރާމާރީ އާއި ވައްކަން ކުރުން އިތުރުވެ އައްޑޫގެ ރައްޔިތުން ބިރުވެރިކަމުގައި ތިބެން ޖެހުމަކީ، މަޖިލީހުގެ މެންބަރުން ކުއްލި މައްސަލަ ހުށަހަޅަން ޖެހޭ ވަރުގެ ކަމަކަށް ނުވާ ނަމަ ތިމަންނާ އަކީ، ރައްޔިތުންގެ މަންދޫބޭ ވިދާޅުވުން ހުއްޓާލަން ޖެހެއެވެ.
ފިނިކޮޓަރި ކޮޅުގައި ރަށާއި އެތައް މޭލެއް ދުރުގައި "ގްރޭޓާރ މާލޭ" ގައި ތިއްބަވާ މަޖިލިސް މެންބަރުންނަށް މިއަދު އަލްމަރްޙޫމް އަލީ އަބްދުﷲގެ އާއިލާ އާއި އައްޑޫގެ ރައްޔިތުންނަށް ދިމާވެފައިވާ މައްސަލަތައް ހައްލުކުރުމަށް މަޖިލީހަށް ކުއްލި މައްސަލައެއް ހުށަނޭޅީ ކީއްވެކަން އެނގިލައްވާނީ ހަމަ އެ މެންބަރުންނަށެވެ.