މީގެ މަހެއްހާ ދުވަސް ކުރިން އައްޑޫގައި ހިނގި އެކްސިޑެންޓެއްގެ ޚަބަރު ޝާޢިއުކުރުމާއި އެކު އާންމު ފަރާތަކުން 'އައްޑޫލައިވް'ގެ ހޮޓްލައިން ނަންބަރަށް ގުޅައި ހިތްހަމަނުޖެހުން ފާޅުކުރިއެވެ. އެކްސިޑެންޓް ހިނގަން މެދުވެރިވީ ބާރު ސްޕީޑްގައި ސައިކަލް ދުއްވުމުން ނޫން ކަމަށާއި، އެހެން ލިޔެފައިވާ ތަންކޮޅު އިސްލާޙްކުރުމަށް އެދުނެވެ.
ބާރު ސްޕީޑްގައި ސައިކަލް ދުއްވި ކަމަށް ލިޔުމުން، އޭނާގެ ދަރިފުޅުގެ ނަން "ހަޑި" ވެއްޖެ ކަމަށް ބުނެ ވަރަށް މައްސަލަ ޖެއްސިއެވެ. އިއްތިފާޤަކުން އެކްސިޑެންޓް ހިނގި ސަރަހައްދުގައި 'އައްޑޫލައިވް' ގެ ނޫސްވެރިޔަކު ވެސް ހުއްޓެވެ. އަދި ހަމައެހެންމެ ފުުލުހުން ވެސް މައުލޫމާތު ދިން ގޮތުގައި އެކްސިޑެންޓް ހިނގަން މެދުވެރިވީ ބާރު ސްޕީޑްގައި ސައިކަލް ދުއްވުމުން ކަމަށެވެ.
އެހެން ހާދިސާއެކެވެ. މާރާމާރީއެއްގައި ހައްޔަރުކުރި ޒުވާނެއްގެ ނަން ލިޔެގެން މިފަހަރު ބެލެނިވެރިޔާ ގުޅާފައި ނޫސްވެރިންނަށް އިންޒާރު ދިނީއެވެ. އެ ޚަބަރު ނުނަގައިފި ނަމަ ހޭއަރުވާލާނެ ކަމަށް ބުނެ އިންޒާރުދިނެވެ.
އެކްސިޑެންޓެއްގައި ވިޔަސް ނުވަތަ މާރާމާރީއެއްގައި ވެސް އަމިއްލަ ދަރިޔަކު ނުވަތަ އާއިލާގެ މީހަކަށް އަނިޔާއެއް ިލބިއްޖެނަމަ ކޮންމެ މީހަކަށް ވެސް ފުން އަސަރުތަކެއް ކުރުވާނެއެވެ. އެއީ އިންސާނީ ޠަބީޢަތެވެ. އެއީ މައްސަލައެއް ނޫނެވެ.
މައްސަލައަކަށް ވަނީ، ކަމުގެ ޙަޤީޤަތް ޤަބޫލުކުރަން ދެކޮޅު ހަދާ ހިސާބުންނެވެ. އެހެން މީހުންނާއި ދިމާލަށް އިނގިލި ދިއްކުރުމުގެ ކުރިން ތިމާ އަމިއްލަ ކުށް ޤަބޫލުކުރަން ބޭނުން ނުވާ ހިސާބުންނެވެ.
ލައިސަންސް ނެތީސް ދަރިފުޅު އަތަށް ތިމަންނާ ސައިކަލް ދިނުމަކީ ކުށެއްކަން ޤަބޫލުކުރަން އެބަޖެހެއެވެ. ގެއިން ބޭރުގައި ދަރިން ކުރަނީ ކީއްތޯ ނުބެލޭ ނަމަ އެއީ ހަމަ މައިންބަފައިންގެ އިހުމާލެވެ.
ޤަބޫލުކުރަން ކިތަންމެ ބޭނުން ނުވިޔަސް ކުށްކުރާ ޒުވާނުން ނިސްބަތްވާ ގްރޫޕްތަކަށް ނަޒަރު ހިންގާލާއިރު ފެންނަނީ މައިންބަފައިން އިހުމާލުވެފައިވާ ދަރިންނެވެ. އާއިލާ ރޫޅުމުގެ ސަބަބުން އެކަށީގެންވާ ގޮތުގައި ތަރުބިއްޔަތު ކުރެވިފައި ނުވާ ދަރިންނެވެ.
ސަރުކާރުން ފޯރުކޮށްދޭން ޖެހޭ ޚިދުމަތެއް ފޯރުކޮށްދީފައި ނުވުމަކީ ސަރުކާރުގެ މައްސަލައެކެވެ. ތިމާގެ ދަރިން ރަގަޅަށް ތަރުބިއްޔަތު ނުކުރުމަކީ، ތިމާގެ މައްސަލައެކެވެ.