އިނގިރޭސި އެފް އޭ ކަޕުގެ ހަތަރު ވަނަ ބުރުގައި އާސެނަލް އަދި ހަލް ސިޓީ ބައްދަލު ކުރި މެޗު ފަސޭހަ ކަމާއެކު ކާމިޔާބުކޮށް މުބާރާތުގެ ކުއާޓާ ފައިނަލުން ޖާގައެއް ހޯދައިފިއެވެ.
ހަލް ސިޓީ އާއި ދެކޮޅަށް ކުޅުނު މި މެޗް އާސެނަލް އިން ކާމިޔާބުކޮށްފައިވަނީ 0-4 ގެ ނަތީޖާ އަކުންނެވެ.
އާސެނަލްގެ ފުރަތަމަ ގޯލު 41 ވަނަ މިނެޓުގައި ކާމިޔާބުކޮށްދިނީ އޮލިވިއާ ޖިރޫޑް އެވެ.
މެޗްގެ ދެވަނަ ހާފް ފަށައިގެން ވެސް އާސެނަލް އިން ރަގަޅަށް ކުޅުނު ނަމަވެސް ގޯލެއް ފެނިގެން ގޮސްފައިވަނީ މެޗްގެ 72 ވަނަ މިނެޓުގައެވެ. އެ ގޯލް އާސެނަލް އަށް ކާމިޔާބުކޮށްދިނީ ވެސް ޖިރޫޑެވެ.
ޖިރޫޑްގެ ގޯލް ޖެހިތާ 5 މިނިޓް ފަހުން އާސެނަލްގެ 3 ވަނަ ލަނޑު އެ ޓީމަށް ކާމިޔާބު ކޮށްދިނީ ތިއޯ ވޮލްކޮޓްއެވެ. މެޗްގައި އާސެނަލްގެ 4 ވަނަ ގޯލް ވެސް ކާމިޔާބުކޮށްދިނީ ވެސް ވޮލްކޮޓްއެވެ.
މެޗުން މޮޅުވެ މުބާރާތުގެ ކުއާޓާ ފައިނަލަށް ގޮސްފައިވި ނަމަވެސް އާސެނަލް އަށް ވަނީ އަނިޔާގެ މައްސަލަތަކާ ދިމާވެފައެވެ. އެގޮތުން ރޭގެ މެޗްގައި އާސެނަލްގެ ކުޅުންތެރިންގެ ތެރެއިން ރަމްސީ، މޮންރިއާލް، މާޓެސަކާގެ އިތުރުން ގެބްރިއަލް އަށް ވެސް ވަނީ އިންޖަރީވެފައެވެ.
އާސެނަލްގެ މުހިއްމު ގިނަ ކުޅުންތެރިންނަށް އަނިޔާގެ މައްސަލަތަކެއް ކުރިމަތިވެފައިވާއިރު އިނގިރޭސި ލީގުގައި އެޓީމަށް ކުރިއަށް ހުރީ ވަރަށް މުހިއްމު މެޗްތަކެކެވެ.