މިމަހުގެ 2 ވަނަ ދުވަހު އަނިޔާވެރި ގޮތަކަށް މަރާލާފައި އޮތްވާ ފެނުނު ހިތަދޫ، ބުރުނީގެ، އަލީ އަބްދުﷲގެ މަރުގެ މައްސަލާގައި އޭނާގެ އާއިލާގެ މީހަކު މީގެ ކުޑައިރުކޮޅެއް ކުރިން ފުލުހުން ހައްޔަރުކޮށްފިއެވެ.
"އައްޑޫލައިވް" މައުލޫމާތު ލިބިފައިވާ ގޮތުގައި މިއަދު މެންދުރު 3:45ހާ އިރު ހިތަދޫ ލިންކް ރޯޑުގައި ހުންނަ ރޯޔަލް ޕްލަސް ރެސްޓޯރެންޓް ކުރިމަތިން ހައްޔަރުކޮށްފައިވަނީ، ހިތަދޫ، ހެޕީފިއުޗަރ، އަހްމަދު އިބްރާހިމް ދީދީއެވެ. އޭނާ އަކީ މަރާލާފައި އޮތްވާ ފެނުނު އަލީ އަބްދުﷲއަށް ބޮޑު ބޭބެ ކިޔާ މީހެކެވެ.
އަހްމަދު އިބްރާހިމް ދީދީ ހައްޔަރުކޮށް ފުރަގަހަށް ބިޑި އަޅުވައިގެން އޭނާ މިހާރު ވަނީ ޓޫވޭވް ފިހާރަ ހުންނަ އޭނާގެ ގެ، ހެޕީ ފިއުޗާރަ އަށް ގެންގޮސްފައެވެ. އަދި އެސަރަހައްދު ފުލުހުން ބަންދުކޮށް އެހިސާބަށް މީހުން ވަނުންވަނީ މަނާކޮށްފައެވެ.
އަހްމަދު ހައްޔަރުކޮށްގެން ގެންދަނިކޮށް ފޮޓޯ ނެގި މީހަކުވެސް ފުލުހުން ހައްޔަރު ކުރި ތަން އެ ސަރަހައްދުގައި ހުރި "އައްޑޫލައިވް" ނޫސްވެރިއާ ބުންޏެވެ.
މައުލޫމާތު ލިބޭ ގޮތުގައި އަހްމަދު އާއި އެކު ފުލުހުންގެ ފޮރެންސިކް ޓީމެއް މިވަގުތު ހެޕީ ފިއުޗާރ ގޭގެ ތެރޭގައި ދަނީ ހަރަކާތް ތެރިވަމުންނެވެ.
އެސަރަހައްދުގައި ގިނަ އަދަދެއްގެ ފުލުހުން ހަރަކާތްތެރިވަމުން އެބަދެއެވެ.
ފުލުހުންގެ މީޑިއާ އޮފިޝަލް ދެންމެ ވިދާޅުވީ ކޯޓު އަމުރެއްގެ ދަށުން 39 އަހަރުގެ ފިރިހެނަކު ހައްޔަރުކޮށް ގެއެއް ފާސް ކުރަމުން އަންނަ ކަމަށެވެ. އަދި ހައްޔަރު ކުރި މީހަކީ އަލީ އަބްދުﷲގެ މަރުގެ މައްސަލާގައި ހައްޔަރު ކުރި މީހެއް ކަމަށެވެ.
އަލީ އަބްދުﷲގެ މަރުގެ މައްސާލައި ހެކި ހޯދުމަށް އޭނާ މަރާލާފައި އެއްލާލާފައިވާ ސަރަހައްދު އިއްޔެ ހަވީރުން ފެށިގެން ބަންދުކޮށް، އެސަރަހައްދު ފުލުހުން ކޮނެ، ބައެއް ސާމާންތައް ވަނީ ކޮތަޅަކަށް އަޅައިގެން ގެންގޮސްފައެވެ.
އަލީ ފެނުނު ސަރަހައްދުގެ ގެއެއްގެ މީހަކު "އައްޑޫލައިވް"އަށް ބުނީ އެސަރަހައްދުގައި ހުރި ގަހަކުން، ނަރުގަނޑެއް ކަހަލަ އެއްޗެއް ފުލުހުން ގެންދިޔަތަން ފެނުނު ކަމަށެވެ.
އަލީގެ މަރުގެ މައްސަލާގައި 24 އަހަރުގެ މީހަކު ހައްޔަރުކޮށް ތަހްގީގު ކުރަމުން އަންނަ އިރު، މިއަދު ހައްޔަރު ކުރި އަހްމަދު މީގެ ދެ ރޭ ކުރިންވެސް ފުލުހުން ހައްޔަރު ކުރިއެވެ. ނަމަވެސް ގަޑިއެއްހާ އިރު ފަހުން ވަނީ ދޫކޮށްލާފައެވެ.
އަހްމަދު އެރޭ ބުނީ ފުލުހުން އޭނާ ގެންދިޔައީ ތޫނު އެއްޗެހި ގެންގުޅޭ ކަމަށް މައުލޫމާތު ލިބިގެން ކަމަށާއި، ބައެއް ސާމްޕަލްތައް ނެގުމަށްފަހު ދޫކޮށްލީކަމަށެވެ.