ހިތަދޫގައި މަރާލާފާ އޮތްވާ ފެނުނު އަލީ އަބްދުﷲގެ މަރުގެ މައްސަލާގައި، ފުލުހުން ކުރިއަށްގެންދާ ތަހްގީގުގައި މިރޭ އިތުރު ތަނެއް ފާސްކޮށް ގިނަ އަދަދެއްގެ ތަކެތި ފުލުހުން ނަގަމުން އެބަދެއެވެ.
ހިތަދޫ ބޮޑު މަގުގައި ހުންނަ "ޓޫވޭވް" ފިހާރަ ހިމެނޭ ސަރަހައްދު ބަންދުކޮށް މިއަދު ހަވީރުން ފެށިގެން ފުލުހުން ދަނީ ތަންތަން ފާސްކޮށް، ތަހްގީގަށް ބޭނުންވާ ސާމާން ނަގަމުންނެވެ.
އެގޮތުން މިއަދު ހަވީރު ކޯޓު އަމުރެއްގެ ދަށުން ހިތަދޫ، ހެޕީ ފިއުޗާރަ ބަލައި ފާސްކޮށް، އެގޭ އަހްމަދު އިބްރާހިމް ވަނީ ފުލުހުންގެ ބެލުމުގެ ދަށައް ގެންގޮސްފައެވެ.
ފުލުހުން ބަލަމުންދާ ގެ ހިމެނޭ ސަރަހައްދުގައި ހުރި މީހަކު ބުނީ ފުލުހުން މިހާރު ޗެކް ކުރަމުންދަނީ މި މަރުގެ ހާދިސާގައި އެންމެ ފުރަތަމަ ހައްޔަރު ކުރި 24 އަހަރުގެ މީހާ ދިރިއުޅޭ ގޭގެ ތެރެއެވެ. އެތަނުން ބައެއް ތަކެތި އަޅާފައިވާ ކޮތަޅުތައް ފުލުހުންގެ ވެހިކަލަކަށް އެރުވި މަންޒަރު ފެނުނު ކަމަށެވެ.
އަލީ އަބްދުﷲގެ މަރުގެ މައްސަލަ ތަހްގީގު ކުރުމަށް ފުލުހުންގެ އޯގަނައިޒް ކްރައިމް ފުލުހުންގެ ހާއްސަ ޓީމެއް ދަނީ އައްޑޫގައި ހަރަކާތްތެރިވަމުންނެވެ.
އަލީ މަރާލާފައިވަނީ ކަރުގައި އެއްޗެެއް އަޅުވައި ނޭވާ ހާސް ކޮށްލައިގެން ކަމަށް އޭނާ ބެއްލެވި ޑޮކްޓަރު ވަނީ ބުނެފައެވެ.
ފުލުހުން މިހާރު ކުރިއަށް ގެންދާ މި މައްސަލައިގެ އިތުރު ތަފްސީލެއް އަދި މީޑިއާއަކަށް ހިއްސާކޮށްފައި ނުވެއެވެ.