ސްވަޓް ފުލުހުންނަކީ ދުނިޔޭގެ ހުރިހާ ކަންކޮޅުތަކެއްގައި ވެސް ވަރަށް ޚާއްސަ ތަމްރީނުތަކެއް ދީފައިވާ، ކުޅަދާނަ ބައެކެވެ. ނުރައްކާތެރި ޙާލަތްތަކުގައި މަސައްކަތް ކުރާނެ ގޮތުގެ ފުރިހަމަ ތަމްރީނު ދީފައިވާ ސްވަޓް ފުލުހުންގެ ސޮކޮޑެއް ދިވެހިރާއްޖޭގެ ފުލުހުންގެ މުއައްސަސާގައި ވެސް ހިމެނެއެވެ.
އެހެން ނަމަވެސް ރާއްޖޭގައި ސްވަޓް ފުލުހުން މަޝްހޫރުވެފައިވަނީ، ބޮޑެތި ތުހުމަތުތަކެއް ކުރެވޭ ބައެއްގެ ގޮތުގައެވެ. އޭގެ ތެރޭގައި 2014 ވަނަ އަހަރުގެ ތެރޭގައި މާލޭގެ މަގުތަކުގައި ހުރި ފެންފޯއް ރުށްތަކެއް ކަނޑާލި ކަމުގެ ތުހުމަތު ވެސް ބައެއް ސްވަޓް ފުލުހުންގެ މައްޗަށް ކުރެވިފައިވެއެވެ. އެ މައްސަލައިގައި ބައެއް ސްވަޓް ފުލުހުންނާއި މެދު ފުލުހުންގެ ޕްރޮފެޝެނަލް ސްޓޭންޑާޑް ކޮމާންޑުން ފިޔަވަޅު އަޅާފައިވާ ކަމަށް ވެސް ވެއެވެ.
އިއްޔެ އަކީ ވެސް ސްވަޓް ފުލުހުންގެ ފަރާތުން އާދަޔާ ޚިލާފު ކަމެއް ފާހަގަ ކުރެވިގެން ދިޔަ ދުވަހެކެވެ. ކުރީގެ ޑިފެންސް މިނިސްޓަރ ކާނަލް ނާޒިމްގެ އިސްތިއުނާފް ޝަރީޢަތުގައި ހެކި ބަސްދެމުން ސްވަޓް ފުލުހުން ވަނީ، ކިތަންމެ އުސް އިމާރާތެއްގައި ވެސް އެންމެ މައްޗަކީ އިމާރާތުގެ 8 ވަނަ ފަންގިފިލާ ކަމަށް ބުނެ ވާހަކަ ދައްކާފައެވެ.
ހައި ކޯޓުގެ ޝަރީޢަތުގެ މަޖިލީހުގައި ވާހަކަ ދެއްކި ސްވަޓް ފުލުހަކު ބުނި ގޮތުގައި އިމާރާތްތައް ބަލައި ފާސްކުރުމަށް ގެންގުޅޭ އުސޫލަކީ އަބަދުވެސް އިމާރާތެއް ނަމަ އެންމެ މަތިން ފަށައިގެން ފާސްކުރުން ކަމަށެވެ.
ހައި ކޯޓުގައި ފުލުހުން ބުނެފައިވާ ގޮތުގައި ގ.އެނިފް ބަލައި ފާސްކުރުމުގެ އަމުރު ހޯދާފައި ވަނީ އެގޭގެ 9 ވަނަ ފަންގިފިލާ އާއި 8 ވަނަ ފަންގިފިލާ ބެލުމަށް ކަމަށް ވިޔަސް ފުލުހުން ބަލާފައި ވަނީ ހަމައެކަނި ގ.އެނިފްގެ 8 ވަނަ ފަންގިފިލާއެވެ.
ނަމަވެސް ކްރިމިނަލް ކޯޓުގައި ކުރިއަށް ދިޔަ ކާނަލް ނާޒިމްގެ ޝަރީޢަތުގައި ހެކި ބަސް ދިން ފުލުހުން ބުނެފައިވަނީ ކޯޓު އަމުރު ހޯދާފައި ވަނީ ގ.އެނިފްގެ 7 ވަނަ ފަންގިފިލާ އާއި 8 ވަނަ ފަންގިފިލާ ބެލުމަށް ކަމަށެވެ.
ގ.އެނިފްގައި ފުލުހުން ހިންގި އޮޕަރޭޝަން ވީޑިއޯ ކޮށްފައި ނުވާއިރު، ޖުމްލަ 10 ފަންގިފިލާ ހިމެނޭގޮތަށް އިމާރާތްކޮށްފައިވާ ގ.އެނިފް އަށް ގޮސް ސްވަޓް ފުލުހުން ބަލާ ފާސްކޮށްފައި ވަނީ ނާޒިމް ދިރިއުޅުއްވާ 8 ވަނަ ފަންގިފިލާ އެކަންޏެވެ.
އެކަން ފާހަގަކޮށް ނާޒިމްގެ ވަކީލުން ސުވާލުކުރުމުން އަބަދުވެސް އިމާރާތްތައް ބަލާ ފާސްކުރުމަށް ގެންގުޅޭ އުސޫލަކީ، އަބަދުވެސް އެންމެ މަތިން ފަށައިގެން ބެލުން ކަމަށް ސްވަޓް ފުލުސް މީހާ ވަނީ ތަކުރާރުކޮށްފައެވެ.
ސުވާލަކީ، ވަކި ޚާއްސަ ތަމްރީނުތަކެއް ލިބިފައިވާ ސްވަޓް ފުލުހުންނަށް ދީފައިވާ ތަމްރީންތަކުން އެމީހުން އިމާރާތެއްގެ އެންމެ މަތީ ފަންގިފިލާ ކަމުގައި 8 ވަނަ ފަންގިފިލާ ބަލާ ނަމަ، އިމާރާތެއްގެ 10 ވަނަ ފަންގިފިލާގައި މީހަކު ކުށެއްކޮށްފި ނަމަ ޢަމަލު ކުރާނި ކިހިނަކުން ބާއެވެ؟