ވަގު ޔަގީން" ނަމުގައި އެމްޑީޕީން ހުކުރު ދުވަހު ހަވީރު ބޭއްވި ހިނގާލުމުގެ ބައިވެރިން ފަހަތަށް ޖެއްސުމަށް މަސައްކަތްކުރި ފިރިހެން ފުލުހަކު އަންހެން ފުލުހަކަށް "ޖިންސީ ފުރައްސާރަ" ކުރާ ވީޑިއޯ އެއް އާންމު ވެއްޖެއެވެ.
ސޯޝަލް މީޑިއާގައި އާންމުވެފައިވާ އެ ވީޑިއޯގައި ފެންނަނީ އެއްވުމުގެ ބައިވެރިން ފަހަތަށް ޖެއްސުމަށް ފުލުހުން ސަފު ހަދައިގެން ތިބި އިރު ތަކުރާރުކޮށް ފިރިހެން ފުލުހުން އަންހެން ފުލުހުންގެ އަތުގައި ހިފައި އަދި އުނަގަނޑުގައި ބައްދައި ހަދާ މަންޒަރެވެ.
އެގޮތުން އެއްފަހަރު އަންހެން ފުލުހެއްގެ އުނަގަނޑުގައި ފިރިހެން ފުލުހަކު ހިފުމުން އެކަމާ ހިތްހަމަނުޖެހިގެން އޭނާގެ އަތް ފޮޅުވާލުމަށް ފަހު އެ ސަފުން ނުކުމެ ފަހަތަށް ޖެހެއެވެ. އަންހެން ފުލުސްމީހާ ފަހަތަށް ޖެހުމުން އެ ޖާގަ ފޫބެއްދުމަށް ފިރިހެން ފުލުހަކު ސަފަށް ވަންނަ މަންޒަރު ވެސް ވީޑިއޯ އިން ފެނެއެވެ.
މީގެ ކުރިން ވެސް ބައެއް މުޒާހަރާތައް ކޮންޓްރޯލް ކުރުމަށް ފުލުހުން ހަރަކާތްތެރިވާއިރު ދެ ޖިންސުގެ ފުލުހުންގެ މެދުގައި މީގެ ކުރިން ވެސް ތަފާތު ބޭއަދަބީ ސަމާސާތައް ކުރާ މަންޒަރު ބައެއް ފަރާތްތަކުން ވީޑިއޯކޮށް އާންމުކޮށްފައިވެއެވެ.