އެމްއެމްޕީއާރްސީގެ ބޮޑު ކޮރަޕްޝަނުގެ ތުހުމަތުގެ ވާހަކަ ދައްކަވަމުން އެކަމާއި އެއްބަޔަކު ކަންބޮޑުވުން ފާޅުކުރަމުން ދާއިރު އަނެއް ބަޔަކު ގެންދަނީ އެ ކޮރަޕްޝަނުގެ ވާހަކަ ފަޚުރުވެރިކަމާއި އެކު ދައްކަވަމުންނެވެ.
އެގޮތުން މިމަހުގެ 9 ވަނަ ދުވަހު މަޖިލީހުގެ ޖަލްސާގައި ވާހަކަ ދައްކަވަމުން، ހޯރަފުށީ ދާއިރާގެ މަޖިލިސް މެންބަރު ވަނީ، ކޮރަޕްޝަނުގެ ފައިސާ ހިފައިގެން މެންބަރުން ގާތަށް ވަޑައިގެންނެވި ކަމަށް ޢިއުތިރާފްވެވަޑައިގެންފައެވެ.
އެވާހަކަ ދެއްކެވުމާއި ގިނަ ބަޔަކު ކަންބޮޑުވުން ފާޅުކޮށް ވާހަކަ ދައްކަން ފެށި ނަމަވެސް، މަޖިލިސް މެންބަރު އެވާހަކަ ދެއްކެވީ މަޖިލީހުގެ ޖަލްސާގައި ކަމަށް ވެފައި، ޤާނޫނު އަސާސީގެ 90 ވަނަ މާއްދާ އިން މެންބަރަށް އާދަޔާއި ޚިލާފު "ރައްކާތެރިކަމުގެ" ސަބަބުން ފިޔަވަޅެއް އެޅުމަކީ ޤާނޫނުގެ ލަފްޒީ މާނައަށް ބަލާއިރު ކުރެވޭނެ ކަމެއް ނޫނެވެ.
"ރައްޔިތުންގެ މަޖިލީހުގެ ޖަލްސާއެއްގައި، ނުވަތަ އެ މަޖިލީހުގެ ކޮމިޓީއެއްގައި މަޖިލީހުގެ މެންބަރަކު ނުވަތަ އެ ނޫން ވެސް މީހަކު އިސްލާމް ދީނުގެ އަސްލަކާ ހިލާފް ނުވާ ގޮތުގެ މަތީން ދެއްކި ވާހަކައެއް ނުވަތަ ހުށަހެޅި ހުށަހެޅުމެއްގެ ސަބަބުން، ކޯޓަކަށް އެ މީހަކު ހާޒިރުކޮށް ނުވަތަ އެ މީހަކާ މެދު އެއްވެސް ތަހުގީގެއް ހިންގައި ނުވަތަ ހައްޔަރުކޮށް ނުވަތަ ބަންދެއް ކޮށް ނުވަތަ އެ މީހަކާ މެދު ދައުވާއެއްކޮށް ހަދައިގެން ނުވާނެ އެވެ." [ޤާނޫނު އަސާސީގެ 90 ވަނަ މާއްދާ]
'އައްޑޫލައިވް' އާއި ވާހަކަ ދެއްކި ޤާނޫނީ ވަކީލަކު ބުނި ގޮތުގައި، ގާނޫނު އަސާސީން މެންބަރުންނަށް ކަށަވަރުކޮށްދޭ އިމްތިޔާޒަކީ މެންބަރު ކުރި ކުށަށް ފިޔަވަޅު އެޅުމަށް އޮތް ހުރަހަކަށް ވެގެން ނުވާނެ ކަމަށެވެ.
" 90 ވަނަ މާއްދާގަައި ބަޔާންކޮށްފައި މިވަނީ މެންބަރުން މަޖިލީހުގައި ކުރައްވަންޖެހޭ މަސައްކަތާ ގުޅޭ ގޮތުން ކޮންމެހެން ދައްކަވަންޖެހޭ ވާހަކަތަކާ ގުޅިގެން އެ ބޭފުޅުންނާ މެދު ފިޔަވަޅެއް ނޭޅޭނެ ވާހަކަ. ކުށްކުރުމަށް ދިން ޓިކެޓެއްގެ ވާހަކައެއް ނޫން."
އެހެން ނަމަވެސް، މަޖިލީހުގައި އެވާހަކަ ދެއްކެވުމަށް ފަހު، ޓީވީ ޗެނަލަކަށް އަރާވަޑައިގެން ހަމަ އެމެންބަރު ވަނީ ކަޅު ފައިސާ ހިފައިގެން ރިޝްވަތު ދިނުމަށް ހިނގުމަކީ، ޖިހާދެއް ކަމުގައި ސިފަކޮށް ފަޚުރުވެރިކަމާއި އެކު އެ ވާހަކަ ދައްކަވާފައެވެ.
ސުވާލަކީ، އެހިސާބުން މެންބަރު ހިމާޔަތްކުރަން މަޖިލީހުގެ މެންބަރަށް ލިބިފައިވާ އިމްތިޔާޒެއް ވެސް ނެތީސް ފިޔަވަޅު އެޅުމަށް ދައުލަތުގެ މުއައްސަސާތައް ނުކުޅެދިގެން އުޅެނީ ކީއްވެގެން ހެއްޔެވެ؟ ކޮރަޕްޝަނާއި ރިޝްވަތުގެ މުޢާމަލާތްތައް ހުއްޓުވުމުގައި ދައުލަތުގެ މުއައްސަސާތައް ފެއިލްވީ ހެއްޔެވެ؟
ކޮރަޕްޝަނާއި، ކަޅުފައިސާގެ މުޢާމަލާތް ކުރާ މީހުންނާއި ދެކޮޅު ހަދައި އެވާހަކަ ދައްކާ ފަރާތްތައް ބޭއިންސާފުން ޖަލަށް ލަމުން ގެންދާއިރު، އެފަދަ މުޢާމަލާތްތަކުގައި ބައިވެރިވާ ފަރާތްތަކަށް މުޖްތަމަޢްގައި ފަޚުރުވެރިކަމާއި އެކު އެވާހަކަ ދައްކަން ފުރުސަތު ލިބުމަކީ ހިތާމަކުރަންޖެހޭ ކަމެކެވެ.
ދިވެހިރާއްޖޭގެ ކޮންމެ ދަރިޔަކު ވެސް، ސިޔާސީ ގޮތުން ތިމާ ކޮންމެ ފިކުރެއްގެ މީހަކަށް ވިޔަސް މިކަމާއި މެދު ފުންކޮށް ވިސްނަންޖެހެއެވެ. އެމްއެމްޕީއާރްސީ ކޮރަޕްޝަނުގެ މައްސަލައިގެ ތެރެއިން، ޚިޔާނާތްތެރިވީ ދިވެހި ލޮބުވެތި ރައްޔިތުން ފައިސާއެެވެ.