ސީޒަނުގެ ދެވަނަ ހާފު ފެށިގެން އައިއިރު ފޭވަރިޓުންގެ ގޮތުގައި ގިނަ ބަޔަކު ދެކެމުން އައި އާސެނަލް އެފް އޭ ކަޕުގެ ކުއާޓާ ފައިނަލުގައި ވަޓްފޮޑް އަތުން ބަލިވެ ކަޓައިފިއެވެ. އެފް އޭ ކަޕުން ކަޓާފައިވާއިރު ޕްރިމިއާ ލީގު ލިބުމުގެ ފުރުސަތުވެސް އާސެނަލް އަށް ވަނީ ވަރަށް ހަނިވެފައެވެ.
އަނިޔާގެ ސަބަބުން ގިނަ ކުޅުންތެރިން ކުޅުމާ ދުރުގައި ތިބެން ޖެހުމުގެ ސަބަބުން ފާއިތުވެދިޔަ މެޗުތަކުން ލިބިފައިވަނީ ދަށް ނަތީޖާތަކެވެ.
އެންމެ ފަހަކަށް ކުޅުނު އެފް އޭ ކަޕުގެ 5 ވަނަ ރައުންޑުގެ ރިޕްލޭ މެޗުގައި ހަލްސިޓީ އަތުން 0-4 ގެ ނަތީޖާ އަކުން މޮޅުވި މެޗުގައި ބައެއް ސަޕޯޓަރުން ވަނީ މެނޭޖަރު ވެންގާގެ އިސްތިއުފާއަށްވެސް ގޮވާފައެވެ.
ރޭގެ މެޗުން ބަލިވެ އެފް އޭ ކަޕުން ކަޓައި ގިނަ އަދަދެއްގެ ސަޕޯޓަރުން ރުޅިގަދަވެ އަނެއްކާވެސް ވެންގާގެ އިސްތިއުފާއަށް ގޮވަން ފަށައިފިއެވެ.
ކުރިއަށް އޮތީ ސްޕެއިންގައި ބާސެލޯނާ އާ ދެކޮޅަށް ކުޅެން ޖެހޭ މެޗެވެ. ޗެމްޕިއަންސް ލީގުގެ ރައުންޑް އޮފް 16 ގެ ދެވަނަ ލެގު ބާސެލޯނާގައި ކުޅެން ޖެހޭ އިރު ފުރަތަމަ ލެގު ލަންޑަނުގައި ކުޅެ، އާސެނަލް ވަނީ 0-2 ގެ ނަތީޖާ އަކުން ބަލިވެފައެވެ.
އެފް އޭ ކަޕު އަތުން ދޫވެ ޗެމްޕިއަންސް ލީގު ބޯމަތީގައި އޮތް އިރު އަނިޔާގެ މައްސަލަ އިންތިހާ އަށް ކުރިމަތިވެފައި ވަނިކޮށް ވެސް ސްޕެއިންގައި ބާސެލޯނާ ކޮޅަށް 4 ލަނޑު ޖަހައި އިތުރަށް ކުރިއަށް ދިއުމުގެ ފޮނި ހުވަފެން ދެކޭ ސަޕޯޓަރުން މަދެއް ނޫނެވެ.