ސިވިލް ކޯޓުގެ ގާޒީ ކަމުގައި ހުންނަވައިގެން ގާޒީ މަރިޔަމް ނިހާޔަތު ކަސްޓަމްސް ކޮމިޝަނަ ޖެނެރަލްގެ މަގާމު ހޯއްދެވުމަށް ރައީސުލްޖުމްހޫރިއްޔާގެ އަނބިކަނބަލުން ފާތުމަތު އިބްރާހީމްއާއި ބައްދަލު ކުރެއްވިކަން "އައްޑުލައިވް"އަށް އެނގިއްޖެއެވެ.
"އައްޑޫލައިވް"އަށް ކަށަވަރުވެފައިވާ ގޮތުގައި ނިހާޔަތު މެޑަމްއާއި ބައްދަލު ކުރައްވާފައިވަނީ ކުރިން އެމަގާމުގައި ހުންނެވި އައްބާސް އާދިލް ރިޒާ އެމަގާމުން ވަކި ކުރެއްވުމުންނެވެ.
އައްބާސް އާދިލް ރިޒާ އެމަގާމުން ވަކި ކުރައްވާފައިވަނީ އެމްއެމްޕީއާރުސީއަށް ގަވާއިދާ ހިލާފަށް ބަޑި ބޭސް ކޮންޓެއިނަރެއް ގެނެސް އެ ތަކެއްޗަށް ކަސްޓަމްސްއިން ކްލިއަރެންސް ދިން މައްސަލާގައެވެ.
ކަސްޓަމްސްގައި ކުރިން އިސްމަގާމުތަކެއް ފުރުއްވާފައިވާ ނިހާޔަތު މިހާރު ހުންނެވީ ޕްރޮސެކިއުޓަ ޖެނެރަލް އޮފީހުގެ އެސިސްޓެންޓް ޕްރޮސެކިއުޓަ ޖެނެރަލްގެ މަގާމުގައެވެ. އެމަގާމަށް ނިހާޔަތު އައްޔަން ކުރައްވާފައިވަނީ ފައިސާ ނަގައިގެން ހުކުމެއް ކުރެއްވި ކަމަށް ތުހުމަތު ކުރެވޭ މައްސަލައެއްގައި ނިހާޔަތުގެ މައްޗަށް ސުލޫކީ މައްސަލައެއް ޖުޑިޝަލް ސާވިސް ކޮމިޝަނުން ބަލަމުން ދަނިކޮށެވެ.
ނިހާޔަތު ގާޒީ ކަމުން އިސްތިއުފާ ދެއްވާފައިވަނީ މިދިޔަ ޑިސެމްބަރު މަހުގެ 31 ވަނަ ދުވަހުއެވެ. ސުލޫކީ މައްސަލަ ބަލަމުންދާތީ އޮގަސްޓު މަހުގެ 17 އިން ފެށިގެން ނިހާޔަތު ހުންނެވީ ސަސްޕެންޝަންގައެވެ.
"އައްޑޫލައިވް"އަށް އިތުބާރު ހުރި ގޮތަކަށް އެނގިފައިވާ ގޮތުގައި ގާޒީއަކަށް ހުރެގެން ފައިސާ ނަގައިގެން ހުކުމެއް ކުރެއްވި ކަމަށް ތުހުމަތު ކުރެވޭ މައްސަލާގައި އޭސީސީންވަނީ ނިހާޔަތުގެ ބޭންކު އެކައުންޓުތަކުގެ ސްޓޭޓްމެންޓުތައް ވެސް ހޯދާފައެވެ. އަދި އޭސީސީން ގެންދަނީ އެމައްސަލަ ތަހުގީގު ކުރަމުންނެވެ.
ދަށު ކޯޓުތަކުން ނިންމާ ޖިނާއީ މައްސަލަތަކުގައި އިސްތިއުނާފު ކުރުމާއި މެދު ގޮތް ނިންމުމުގެ މަސްއޫލިއްޔަތު ޕީޖީ ހަވާލުކޮށްފައިވަނީ ނިހާޔަތާއެވެ. އެނގިފައިވާ ގޮތުގައި ސިޔާސީ މައްސަލަތައް ސަރުކާރުން ބުނާ ގޮތަކަށް އިސްތިއުނާފު ކުރުމުގައި ނިހާޔަތުގެ ދައުރު ބޮޑެވެ.