ސަރުކާރުގެ ފަރާތުން ބޭނުންވާ ގޮތަށް މައްސަލަތައް ނިންމުމަށް ދެކޮޅު ހަައްދަވާތީ، ހައި ކޯޓުގައި ހުރި އެންމެ ތަޢުލީމީ ފަނޑިޔާރު ޑރ. އަޒްމިރާލްދާ ޒާހިރު މަޤާމުން ވަކިކުރުމަށް ނިންމާފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި، އަޒްމިރަލްދާ ޒާހިރު ހައި ކޯޓު ދެކުނު ގޮތްޕަށް ބަދަލުކޮށްފައި ވަނީ ވެސް، ބައެއް މައްސަލަތަކުގައި ހައި ކޯޓުގެ ފަނޑިޔާރުން ޢަމަލުކުރައްވާ ގޮތުގެ ޝަކުވާ އުފުލަމުން ގެންދާތީ އާއި އަދި އުސޫލުތަކާއި ޚިލާފަށް ނިންމާފައިވާ ޖޭއެސްސީގެ ބައެއް ނިންމުންތަކާއި މެދު ނުރުހުން ފާޅުކުރަމުން ގެންދާތީއެވެ.
ޖޭއެސްސީގެ އޮފިޝަލަކު 'އައްޑޫލައިވް' އާއި ވާހަކަ ދައްކަމުން ބުނި ގޮތުގައި، ޑރ.އަޒްމިރަލްދާގެ ބައްޕާފުޅު ސީނާ ޒާހިރު (މަޖިލީހުގެ ކުރީގެ ރައީސް) ޝަރުޢީ ދާއިރާގައި ހުރި މައްސަލަތަކުގެ ވާހަކަ ފާޅުކަން ބޮޑު ގޮތެއްގައި ދެއްކެވުމަކީ ވެސް އެކަމަނާ މަޤާމުން ވަކިކުރުމަށް ނިންމާފައިވާ އެއް ސަބަބެވެ.
" ހައި ކޯޓުގައި ނެކްސް ބިޒްގެ މައްސަލަ ކުރިއަށްދިޔަ ދުވަސްވަރު، އިސްފަނޑިޔާރު ޤާނޫނާއި ޚިލާފަށް ބައެއް ކަންތައް ކުރެއްވި ގޮތުން އެކަމާއި ހިތްހަމަނުޖެހިގެން އަޒްމިރަލްދާ ވަނީ މައްސަލަ ޖައްސާފައި. "
'އައްޑޫލައިވް' އަށް މައުލޫމާތު ލިބިފައިވާ ގޮތުގައި، ޑރ.އަޒްމިރަލްދާ ވަނީ ސުޕްރީމް ކޯޓާއި ޖޭއެސްސީ އިން ޤާނޫނާއި ޚިލާފަށް ނިންމާފައިވާ ނިންމުންތަކާއި ބެހޭގޮތުން ކަންބޮޑުވުން ފާޅުކޮށް ސިޓީ ފޮނުވާފައެވެ. ނަމަވެސް އެއިން އެއްވެސް ސިޓީއަކަށް ޖަވާބު ލިބިފައި ނުވާކަމަށް ވެއެވެ.
އެހެންވެ އެކަމަނާ ވަނީ، ޙައްޤުތަށް ގެއްލިފައިވާ ކަމަށް ބުނެ އެކަމާއި މެދު ފިޔަވަޅު އަޅައި ދިނުމަށް ރައްޔިތުންގެ މަޖިލީހުގެ މިނިވަން މުއައްސަސާތަކާއާ ބެހޭ ކޮމިޓީއަށް ހުށަހަޅުއްވާފައެވެ.
ޖޭއެސްސީގެ އޮފިޝަލް ބުނި ގޮތުގައި، އަޒްމިރަލްދާ ހައި ކޯޓު ދެކުނު ގޮތްޕަށް ބަދަލު ކުރީވެސް "އަދަބެއް" ދިނުމަށް ކަމަށެވެ.
ޑރ. އަޒްމިރާލްދާ ޒާހިރު ވަނީ ޔުނިވަރސިޓީ އޮފް ކާޑިފް (ޔޫކޭ) އިން، އެލް.އެލް.ބީ އޮނާރސް އާއި، ޔުނިވަރސިޓީ އޮފް ޕޯޓްސްމައުތު (ޔޫކޭ) އިން، އެލް.އެލް.އެމް ޑިގްރީ ޙާޞިލު ކުރެއްވުމަށްފަހު، ބައިނަލް އަޤްވާމީ ފިކުރީ މުދަލާއި ބެހޭ ޤާނޫނުގެ ދާއިރާއިން ޔުނިވަރސިޓީ އޮފް އެގްޒެޓަރ (ޔޫކޭ) އިން ޕީ.އެޗް.ޑީ ޑިގްރީ ޙާޞިލުކުރައްވާފައެވެ.
އެކަމަނާ ހައި ކޯޓުގެ ފަނޑިޔާރުކަމަށް އައްޔަންކޮށްފައި ވަނީ 2011 ވަނަ އަހަރުގެ މާރޗް 26ގައެވެ.