ރާއްޖޭގެ ޝަރުއީ ނިޒާމަށް ރައްޔިތުންގެ އިތުބާރު ގެއްލިފައި ވަނީ އިއްޔެ މިއަދަކު އެއް ނޫނެވެ. މައްސަލަތަކުގެ ޝަރީއަތް ފެށުމުގެ ކުރިން ގާޒީން ތިއްބަނީ "ގޮތެއް ނިންމަވައިގެންނެވެ". ރާއްޖޭގެ އަދުލުގެ ނިޒާމަށް ބަލާލާއިރު މުޅިންވެސް ފެންނަނީ ބޮޑެތި މައްސަލަތަކެވެ. ރާއްޖޭގެ ޝަރުއީ ކޯޓުތަކުގެ އިސް ފަނޑިޔާރުންގެ ނަޒާހާތްތެރިކަން ގެެއްލިފައިވާ ބޮޑެތި މައްސަލަ ތަކެވެ.
ކުރީގެ ޑިފެންސް މިނިސްޓަރ ކާނަލް މުހައްމަދު ނާޒިމްގެ މައްޗަށް ހަނގުރާމަވެރި ހަތިޔާރު ގެންގުޅުނު ކަމުގެ ދައުވާ ކްރިމިނަލް ކޯޓުން ސާބިތުކޮށް 11 އަހަރުގެ ޖަލު ހުކުމެެއް ކުރީ، ހެކިންގެ ހެކި ބަހުގެ ބޮޑެތި ފުށު އެރުންތައް ހުއްޓައެވެ.
ނާޒިމްގެ ފަރާތުން ހެކި ހުށަހެޅުމަށް ފުރުސަތު ނުދީ ކުރިއަށް ގެންދިޔަ ޝަރީއަތުން ނާޒިމްގެ މައްޗަށް ކުރި ހުކުމް މިއަދު އިސްތިއުނާފް ކުރެވިގެން ދިޔަ އިރު މިއަދުވެސް ފެނިގެން ދިޔައީ ހައިކޯޓުން ބޭނުންވާ ގޮތަށް މައްސަލަ ނިންމާލިތަނެވެ.
މިއަދުގެ ޝަރީއަތުގައި ހުކުމް އިއްވަމުން އެ މައްސަލަ ބެލި ފަނޑިޔާރުންގެ ބެންޗުގެ ރިޔާސަތު ބެލެހެއްޓެވި ފަނޑިޔާރު އަބްދުއްރައޫފް އިބްރާހިމް ވިދާޅުވީ، ހަތިޔާރު ފެނިފައިވަނީ ނާޒިމްގެ ކޮޓަރިން ކަމަށްވާއިރު، އެ ތަކެތި އެތަނުން ފެނިފައި ވަނީ ނާޒިމް ވެސް އެ ކޮޓަރީގައި ހުއްޓާ ކަމަށެވެ. އެހެންވެ ނާޒިމްގެ ހިޔާޒަތުގެ ދަށުގައި އެ ހަތިޔާރު ހުރީ ކަމަށް ބެލެވޭނެ ކަމަށް ފަނޑިޔާރު ވިދާޅުވި އެވެ.
ރައޫފް ވިދާޅުވީ، އެ ހަތިޔާރަކީ ނާޒިމްގެ އެއްޗެއް ނޫންކަން ސާބިތުކޮށް ދެވިފައި ނުވާތީ އާއި،އެ ހަތިޔާރުތަކަކީ ނާޒިމަށް ލަނޑެއް ދިނުމުގެ ގޮތުން ބަޔަކު އެތަނުގައި ބެހެއްޓި އެއްޗެއް ކަމަށް ނާޒިމްގެ ފަރާތުން ބުންޏަސް އެކަން ސާބިތުކޮށްދެވިފައި ނުވާ ކަމަށް ވެސް ފަނޑިޔާރު ރައޫފް ވިދާޅުވި އެވެ.
އަދި އެ ތަކެތި އެތަނުގައި ބެހެއްޓީ އެތަނަށް ވަން ފުލުހުން ކަމަށް ނާޒިމްގެ ފަރާތުން ބުންޏަސް އެއްވެސް ހެއްކެއްގެ ބަހުން އެކަން އެނގެން ނެތް ކަމަށް ފަނޑިޔާރު ވިދާޅުވި އެވެ.
ފަނޑިޔާރު މިގޮތަށް ވިދާޅުވި އިރު މިކަމުގައި ހެކިބަސް ދިން ސްވޮޓް ފުލުހުންގެ ހެކި ބަސް ތަފާތުކަން ފާހަގަ ކޮށްލެވެއެވެ.
ކްރިމިނަލް ކޯޓުން ނާޒިމްގެ މައްޗަށް ކޮށްފައިވާ ހުކުމަށް ތާއިދު ކުރަމުން ހައިކޯޓުގެ ފަނޑިޔާރު ވިދާޅުވީ ހަނގުރާމަވެރި ހަތިޔާރެއް މީހެއްގެ އަތުން ފެނިއްޖެ ނަމަ އެ އެއްޗެއް ލިބުނު ގޮތް ސާބިތުކޮށް ދިނުމަކީ އެ މީހެއްގެ ޒިންމާއެއް ކަމަށް ރާއްޖެ ގެނައުން މަނާތަކެތީގެ ގާނޫނުގައި ބުނެފައިވާއިރު އެއީ ކިހިނެތް، ކޮން ގޮތަކުން ލިބުނު އެއްޗެއްކަން ނާޒިމަށް ސާބިތުކޮށްދެވިފައެއް ނުވެ އެވެ.
ނާޒިމްގެ ފަރާތުން މި މައްސަލަ ހައިކޯޓުގައި އިސްތިއުނާފް ކުރުމުންވެސް ގިނަ ބަޔަކު ބުނަމުން ދިޔައީ ހައިކޯޓުންވެސް ކްރިމިނަލް ކޯޓުގެ ހުކުމަށް ތާއިދު ކުރާނެ ކަމަށެވެ. އަދި އެކަމަކީ ޝަރުއީ ދާއިރާގެ ތެރޭގައި ހުރި މައްސަލަ ތަކުގެ ތެރެއިން ފަނޑިޔާރުން މިނިވަން ވެފައި ނެތުން ކަމަށް ގިނަ ބަޔަކު ދިޔައީ ބުނަމުންނެވެ.
ނާޒިމްގެ މައްސަލައަށް ހައިކޯޓުން ކުރި ހުކުމާއި ގުޅިގެން އާއިލާއިން އެމައްސަލަ ސްޕްރީމް ކޯޓުގައި އިސްތިއުނާފް ކުރުމަށް މިހާރު ވަނީ ނިންމާފައެވެ.
ޝަރީއަތްތަކުގެ އަޑުއެހުންތަކާއި، ހުށަހެޅި ހުށަހެޅުމަށް ބަލާއިރު ޝަރުއީ ދާއިރާގެ މައްސަލަތައް މިދަނީ ހާމައަށް ފެންނަމުންވެ. ސުވާލަކީ މިރާއްޖޭގައި އިންސާފުވެރި ޝަރީއަތެއް ކުރެވޭނެ ހެއްޔެވެ. އެފަދަ ޔަގީންކަމެއް ރައްޔިތުންނަށް އެބައޮތް ހެއްޔެވެ.