"ވައްކަން ޔަގީން" ނަމުގައި އެމްޑީޕީން މިދިޔަ ހުކުރު ދުވަހު މާލޭގައި ކުރިއަށް ގެންދިޔަ ހިގާލުން ނިންމާލާފައި މިސްކިތެއްގެ ތެރޭގއަި ހުއްޓާ ފުލުހުން ހައްޔަރުކޮށް ގޭބަންދު ކުރި ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފު ދޫކޮށްލައިފިއެވެ.
މަހްލޫފް ދޫކޮށްލާފައި ވަނީ މިއަދު މުއްދަތު އިތުރު ކުރުމަށް ކޯޓަށް ހާޒިރު ކުރުމުން އޭނާ މުޖުތަމައުއަށް ނުރައްކާ ފަރާތެއްގެ ގޮތުގައި ނުބެލެވޭ ކަމަށް ބުނެއެވެ.
ފުލުހުން ބުނީ މަހްލޫފު ހައްޔަރު ކޮށްފައި ވަނީ ވައްކަން ޔަގީން މުޒާހަރާއަށްފަހު ހިގި ހަމަނުޖެހުމުގައި ފުލުހަކަށް ހަމަލާދިނުމާއި ގުޅިގެން ކަމަށެވެ.
ހިނގާލުމަށްފަހު ޖަލާލުއްދީން މިސްކިތް ކައިރިން މަހުލޫފު ހައްޔަރު ކުރި އިރު ފުލުހުންވަނީ ބާރުގެ ބޭނުންކޮށްފައެވެ. އެވަގުތު އެސަރަހައްދަށް އެއްވެ ތިބި ބައެއް މީހުންގެ މޫނަށް ފުލުހުންވަނީ ޕެޕަ ސްޕްރޭ ޖަހާފައެވެ.
ފުލުހުން ވަނީ މީގެ ކުރިން ވެސް އެތައް ފަހަރަކު މަހްލޫފު ފުލުހުންގެ އިދާރާއަށް ހާޒިރުކޮށްފައެވެ. އެގޮތުން ގ.ދޫވެހި ކައިރިއަށް ޑޮލަރު އެޅި މައްސަލާގައި ވެސް ބިރު ދެއްކި ކަމަށް ބުނެ މަހްލޫފު ހާޒިރުކޮށްގެން ފުލުހުން ވަނީ އޭނާއާއި ސުވާލުކޮށްފައެވެ.
މަހްލޫފު ހައްޔަރުކޮށްފައި ވަނީ ގާނޫނާއި ހިލާފަށް ކަމަށްބުނެ، އޭނާ ދޫކޮށްލުމަށް އެމްޑީޕީންވެސް ވަނީ ގޮވާލާފައެވެ.