ރާއްޖޭގެ ޝަރުއީ ކޯޓުތަކެކޭ ސަދޫމްގެ ކޯޓުތަކެކޭ އެއްފަދަ ކަމަށާއި، ކޯޓުގައި ކިތަންމެ ވަރަކަށް ކުށެއް ނުކުރާކަން ސާބިތުކޮށް ދިނަސް ހުކުމް ކުރާނީ ކްރިމިނަލް ކޯޓުގެ އިސް ގާޒީ އަބްދުލް ބާރީ ޔޫސުފް ބޭނުންވާ ގޮތަށް ކަމަށް ގަލޮޅު ދެކުނު ދާއިރާގެ މެމްބަރު އަހްމަދު މަހްލޫފް ވިދާޅުވެއްޖެއެވެ.
"ވައްކަން ޔަގީން" ނަމުގައި އިދިކޮޅު ފަރާތްތަކުން މިދިޔަ ހުކުރު ދުވަހު މާލޭގައި ބޭއްވި މުޒާހަރާއަށް ފަހު މިސްކިތުގައި ހުންނަވަނިކޮށް ހައްޔަރުކޮށް ގޭބަންދު ކުރުމަށްފަހު މިއަދު ދޫކޮށްލުމުން މަހްލޫފް ވިދާޅުވީ އޭނާ ހައްޔަރު ކުރީ އިދިކޮޅު ފަރާތްތަކުގެ އަޑު ކަނޑުވާލުމަށް ކަމަށާއި، ނަމަވެސް އެކަން އެގޮތަށް ނުވާނެ ކަމަށެވެ.
މަހްލޫފް ވިދާޅުވީ ކިތަންމެ ވަރަކަށް ބަންދުކޮށް އަނިޔާކުރި ނަމަވެސް އިދިކޮޅު ފަރާތްތަކުގެ އަޑެއް ކަނޑުވައެއް ނުލެވޭނެކަމަށެވެ.
މަހްލޫފް ވިދާޅުވީ ރައީސް ޔާމީން މަސައްކަތް ކުރައްވަނީ 2018ގެ އިންތިހާބް އަންނަން ވާ އިރަށް އިދިކޮޅު ހުރިހާ ފަރާތްތަށް ޖަލަށް ލުމަށް ކަމަށެވެ. އަދި މިހާރު ޕީޕީއެމް ބާއްވަން ތައްޔާރުވަމުން އަންނަ މަހާސިންތާއަށް ފަހު އުއްތަމަ ފަނޑިޔާރު ކުރިފުޅުމަތީގައި 2018 ގެ ރައީސްކަމުގެ ހުވާވެސް ކުރައްވަން ވީ ކަމަށެވެ.
މަހްލޫފް ދަނީ ރައީސް ޔާމީން އާއި ކްރިމިނަލް ކޯޓުގެ ގާޒީ ބާރީއަށް ފާޅުގައި ފާޑު ކިޔަމުންނެވެ.