ހިތަދޫ ރީޖަނަލް ހޮސްޕިޓަލްގައި މަސައްކަތް ކުރުމަށް ރާއްޖެއައި ބަންގްލަދޭޝްގެ ޑޮކްޓަރަކު ވަޒީފާއިން ވަކިކޮށް ފޮނުވާލާފައިވާ އިރު "ފޭކް" ލިއުންތަކާއި އެކު ނަރުހަކަށް މަސައްކަތް ކުރި ބަންގްލަދޭޝްގެ ނަރުހަކުވެސް ވަޒީފާއިން ވަކިކޮށް ރާއްޖޭން ފުރުވާލައިފިއެވެ.
"އައްޑޫލައިވް" އާއި ވާހަކަ ދެއްކި މިނިސްޓްރީ އޮފް ހެލްތުގެ އިސް އޮފިޝަލަކު ވިދާޅުވީ، ރާއްޖެއަށް ގިނަ އަދަދެއްްގެ ޑޮކްޓަރުންތައް ބަންގްލަދޭޝްއިން އެތެރެ ކޮށްފައިވާ އިރު ގިނަ މީހުންނަކީ "ފޭކް" ލިއުންތަކާއި އެކު ޑޮކްޓަރުންގެ ގޮތުގައި އައިސްފައިވާ މީހުންކަން މިނިސްޓްރީއަށް އެނގިގެން އެފަރާތްތައް ވަޒީފާއިން ވަކިކޮށް ރާއްޖޭން ފުރުވަމުންދާ ކަމަށެވެ.
ހިތަދޫ ރީޖަނަލް ހޮސްޕިޓަލުން ބަންގްލަދޭޝް ޑޮކްޓަރަކު ވަޒީފާއިން ވަކިކޮށްފައިވާ އިރު ނިމިގެން ދިޔަ ހަފްތާ ތެރޭގައި އައިޖީއެމްއެޗްއިންވެސް ދެ ޑޮކްޓަރަކު ވަޒީފާއިން ވަނީ ވަކިކޮށްފައެވެ. އަދި ޑޮކްޓަރުންނަށް ވެގެން ރާއްޖެ އެތެރެވެފައިވާ ބައެއް ފަރާތްތަކުން އަމިއްލައަށް ރާއްޖެއިން ފިލައިގެން ގޮސްފައިވެއެވެ.
އިތުބާރު ހުރި ގޮތަކަށް "އައްޑޫލައިވް"އަށް މައުލޫމާތު ލިބިފައިވާ ގޮތުގައި މިފަހުން ރާއްޖެއެތެރެވެފައިވާ ގިނަ ބަންގްލަދޭޝް ޑޮކްޓަރުން އެތެރެވެފައިވަނީ ޑޮކްޓަރުން ރާއްޖެ ގެނައުމަށް ހުއްދަދީފައިވާ ފަރާތްތަކަށް 1000 ޑޮލަރުގެ ކަމިޝަނަކާއި އެކުއެވެ.
ރާއްޖޭގެ އެކި ކަންކޮޅުތަކުގައި ކޮލިފައި ނޫން ޑޮކްޓަރުން ތިބި ކަމުގެ ޝަކުވާ ރައްޔިތުން ކުރަމުންދާ އިރު އެކަމަށް ހެލްތު މިނިސްޓްރީން އެދެވޭ މަސައްކަތެއް ކުރާތަނެއް ނުފެނެއެވެ.
ފާއިތުވި ދުވަސްތަކަށް ބަލާއިރު ޑޮކްޓަރުންގެ އިހްމާލުން ސީރިއަސް މައްސަލަތަކެއް ވަނީ ދިމާވެފައެވެ. އެގޮތުން ހދ. ކުޅުދެއްފުށީގައި މާބަޑު އަންހެނަކު ސިޒޭރިއަން ހެދުމަށްފަހު ލޭ މަނާ ނުވެ، އަންހެން މީހާ ވަނީ ނިޔާވެފައެވެ. އަދި މިމަހުގެ 14 ވަނަ ދުވަހު ލ. ގަމު ރީޖަނަލް ހޮސްޕިޓަލްގައި އޮޕަރޭޝަނެއް ކުރަން ހޭނެއްތި މީހަކު ހޭނާރައިގެން ވަނީ މާލެ އައިޖީއެމްއެޗްއަށް ގެނެސްފައެވެ.
ރާއްޖޭގައި މަސައްކަތް ކުރުމަށް އިންޑިއާ، ޕާކިސްތާނުން ޑޮކްޓަރުން ނުލިބޭއިރު، މިހާރު މުޅިންވެސް ޑޮކްޓަރުން އެތެރެ ކުރަނީ ބަންގްލަދޭޝްއިންނެވެ.