ހަނގުރާމަވެރި ހަތިޔާރު ގެންގުޅުނުކަމުގެ ކުށް ސާބިތުވެ 11 އަހަރުގެ ޖަލުހުކުމެއް ތަންފީޒުކުރަމުންދާ ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމް މިރޭ ބޭސްފަރުވާއަށް ސިންގަޕޫރަށް ފުރާވަޑައިގަތުމަށް އިބްރާހިމް ނާސިރު އިންޓަނޭޝަނަލް އެއާޕޯޓަށް ވަޑައިގެންފިއެވެ.
ނާޒިމްގެ އާއިލާގެ ބޭފުޅަކު މިރޭ "އައްޑޫލައިވް"އަށް ބުނީ ނާޒިމް ބޭސްފަރުވާއަށް ފުރާވަޑައިގަތުމަށް ހަމަޖެހިފައިވަނީ މިރޭ 11:30 ގައި އޮންނަ ފްލައިޓަކުންނެވެ.
ނާޒިމް ބޭސްފަރުވާއަށް މިރޭ ފުރާވަޑައިގަންނަވާ އިރު އެމަނިކުފާން މީގެ ކުރިންވެސް ވަނީ ބޭސްފަރުވާއަކަށް ސިންގަޕޫރަށް ވަޑައިގެންފައެވެ.
ކަރެކްޝަނަލް ސާވިސް އިން ބުނީ ނާޒިމްއަށް ބޭސްފަރުވާ ކުރުމަށް 21 ދުވަހުގެ މުއްދަތެއް ދީފައިވާ ކަމަށެވެ.
ނާޒިމްގެ އާއިލާއިން ބުނީ އޭނާއަށް ގިނަ ސިއްހީ މައްސަލަތަކެއް ކުރިމަތިވެފައެވެ. އެ ގޮތުން ހިތުގެ މައްސަލަ އާއި ފައިގެ ފަލަމަސްގަނޑުގެ ނާރެއްގެ މައްސަލައެއްގެ އިތުރުން ލޮލުގެ މައްސަލަތަކެއް ހުރިކަމަށް ނާޒިމްގެ ފަރާތުން ކޯޓުގައި ވަނީ ފާހަގަކޮށްފައެވެ.