ރޭ މާލޭގައި ގޭންގުތަކަށް ނިސްބަތްވާ ބަޔަކަށް އެކިވަރުގެ ހަމަލާތަށް ދީ ޒަޚަމް ކޮށްފައިވާއިރު ފުލުހުންނަށް އެއީ ކޮން ބައެއްކަން ހޯދިފައިނުވާ ކަމަށް ފުލުހުންގެ އިންފޮމޭޝަން އޮފިސަރު އިސްމާއިލް އަލީ ވިދާޅުވެއްޖެއެވެ.
ބަޔަކު މާރާމާރީ ހިންގާ ކަމުގެ މައުލޫމާތު ލިބިގެން ފުލުހުން އެތަނަށް ގޮސްފައިވާ ކަމަށާއި ނަމަވެސް އަނިޔާވި ފަރާތްތަކުންވެސް ފުލުހުންނަށް އެއްބާރުލުން ދީފައިނުވާ ކަމަށާއި އެހެންވެ ފުލުހުން މައުލޫމާތު ނަގާފައި ނުވާ ކަމަށް އިސްމާއިލް ވިދާޅުވިއެވެ.
ހެންވޭރުގެ ގްރޫޕަކަށް ނިސްބަތްވާ ބަޔަކަށާއި މަސްއޮޑިގޭގެ ތިބި ބަޔަކަށް އަނިޔާ ލިބިފައިވާއިރު ބައެއް މީހުންވަނީ އަނިޔާ ކޮށްފައިވަނީ ފުލުހުން ކަމަށްވެސް ތުހުމަތު ކޮށްފައެވެ.
'އައްޑޫލައިވް' އަށް މައުލޫމާތު ދިން ފަރާތަކުން ބުނެފައިވަނީ މަސްއޮޑިގެއަށް ވަދެ އެގޭތެރޭގައި ތިބި ބަޔަކަށް ހަމަލާދިނީ ފުލުހުންގެ އެސް އޯ ޔުނީފޯމުގައި ތިބި ބައެއް ކަމަށެވެ.
ނަމަވެސް ފުލުހުންގެ އިންފޮމޭޝަން އޮފިސާ އިސްމާއިލް އަލީ ވަނީ މިކަން ދޮގުކޮށްފައެވެ.
ސޯޝަލް މީޑީއާގައި އާންމު ވެފައިވާ ސީސީޓީވީ ފުޓޭޖް އިން ފެންނަ ގޮތުގައި އެސްއޯ ޔުނީފޯމުގައި ހުރި ފުލުހަކު މަސްއޮޑި ގެއިން ނިކުމެ ދުވެފައިގޮސް ސައިކަލަކަށް އަރައި އެސަރަހައްދު ދޫކޮށްލާފައިވެއެވެ.
އަނިޔާވެފައިވަނީ ކިތަށް މީހުންނަށް ކަން އަދި އެނގިފައެއް ނުވެއެވެ. ފުލުހުންގެ މައުލޫމާތުން އެނގޭ ގޮތުގައި އޭޑީކޭ ހޮސްޕިޓަލަށް އަނިޔާއަށް ފަރުވާ ހޯދަން ބަޔަކު ގޮސްފައިވެއެވެ. ނަމަވެސް އެއްބާރުލުން ނުލިބިގެން އެމީހުންގެ މައުލޫމާތު ނަގާފައި ނުވާތީ އިތުރު ތަފްސީލެއް ލިބޭގޮތެއްވަނީ ނުވެފައެވެ.
މިހާދިސާ އާ ގުޅިގެން އޭޑީކޭ އަދި އައިޖީއެމްއެޗްގެ ބަހެއްވެސް ވަނީ ލިބޭގޮތެއްނުވެފައެވެ. ރޭގައި މާލޭގެ އަމާންކަން ގެއްލުމުގެ ސަބަބުން ގައުމީ ދިފާއީ ބާރު، އެމްއެންޑީއެފް ގެ ސިފައިންވަނީ ހަތިޔާރާ އެކު މާލޭގެ ބައެއް މަގުތަކުގައި ހަރަކާތްތެރިވެފައެވެ.
އަދި ފުލުހުން މައުލޫމާތު ދީފައިވާ ގޮތުން 13 ބަޔަކު މިމައްސަލައިގައި ރޭ ހައްޔަރުކޮށްފައިވެއެވެ.