މިފަހަކަށް އައިސް ޔާމީން މާގިނައިން ދައްކަވާ ވާހަކަފުޅަކީ އެބޭފުޅާ ކޯޓުތަކަށް ނުފޫޒު ނުފޯރު ވާކަމަށެވެ. ހަމައެއްގޮތަކަށްވެސް ނުފޫޒެއް ނުފޯރުވާ ކަމަށެވެ.
އެބޭފުޅާ ވިދާޅުވަމުން ގެންދަވަނީ ކޯޓުތަކަކީ މިނިވަން ތަންތަން ކަމުގައެވެ. އެބޭފުޅާގެ ވަޒީރުން ވެސް ބުނަނީ ކޯޓުތަކަކީ މިނިވަން ތަންތަން ކަމުގައެވެ. އަޑަށް ބާރުލާފައި ކިތަންމެ ވަރަކަށް އެހެން ކިޔެއްކަމަކު އެއީ ތެދަކަށް ވާނެ ހެއްޔެވެ؟
ސިޔާސީ އެއްވުންތަކުން ސުޕްރީމު ކޯޓުގެ ފަނޑިޔާރުން ފެނުމާއި، ކޯޓުތަކުން ސިޔާސީ ނިންމުންތައް ނިންމުމާއި ފާޅުގައި އަދުލުވެރިކަމާއި ދެކޮޅަށް މަސައްކަތްކުރުމާއި، ސަރުކާރުގެ ބޭނުންތަކަށް ފަނޑިޔާރުން ޢަދުލު ވެރިކަން ވިއްކަމުން ދާމަންޒަރު ފެނުމުން ޔާމީން އެވިދާޅުވާ ޖޯކު މިހާރު މިދަނީ ހާމައަށް ފެންނަމުންނެވެ.
ޔާމީން ވެރިކަމަށް އައުމުގެ ކުރި!
ޔާމީން ވެރިކަމަށް އައުމުގެ ކުރީގައި ކޯޓުތަކަށް ޔާމީންގެ ފަރާތުން ނުފޫޒު ފޯރުވާ ކަމަށް ބެލެވެނީ އެބޭފުޅާގެ ގާތް އެކުވެރިޔާ އަހުމަދު ނާޒިމު މެދުވެރިކޮށް ކަމުގައި ގިނަ ސިޔާސީ މީހުން ގަބޫލު ކުރެއެވެ. ނާޒިމަށްވުރެ އެކަން ފާޅުގައި ކުރެވޭނެ ފޯމިއުލާއެއް ހޯދުމުގެ ގޮތުން ނެރުނު މީހަކީ އަހުމަދު އަދީބެވެ.
އަދީބަކީ ޕީއޭއިން ސިޔާސީ ކަންކަމަށް ނިކުތް، ޔާމީންގެ އަރިސް މީހެކެވެ. 2013 ވަނަ އަހަރުގެ ރިޔާސީ އިންތިޚާބުގެ ކުރިން، އޭރުގެ ރައީސް މުޙައްމަދު ވަހީދުގެ ވެރިކަމުގައި އަދީބު ދިޔައީ މަޑުމަޑުން ދައުލަތުގެ މުވައްސަސާތަކުގައި ވަކި ހިއްޕަމުންނެވެ. އޭނާއަކީ އޭރު ޓޫރިޒަމް މިނިސްޓަރެވެ.
އޭރު އަދީބު ސިޔާސީ ގޮތުން ޖަވާބުދާރީވާ އެކަކަށް ޔާމީންވާނެއެވެ. ވަހީދުގެ ހިޔަނީގައި އަދީބު އެންމެ ބޮޑަށް ގުޅުން އުފެއްދީ މިނިވަން މުވައްސަސާތަކާއި ކޯޓުތަކުގައެވެ. ޚާއްޞަ ގޮތެއްގައި ސުޕްރީމް ކޯޓުގެ ފަނޑިޔާރު އަލީ ހަމީދާއި، އުއްތަމަ ފަނޑިޔާރުކަމަށް ފެންބޮވައިގެން އުޅުނު ޢަބްދުﷲ ސައީދެވެ.
ނިމި ދިޔަ ރިޔާސީ އިންތިޚާބުގައި ޔާމީންއަށްޓަކައި ސުޕްރީމް ކޯޓުގެ ފަނޑިޔާރުން ހޭވި ހަޑިއަކީ ދިވެހިރާއްޖޭގެ ދޫސްތޫރީ ހަޔާތުގައި ހިނގި އެންމެ ބޮޑު އެއް ޖަރީމާއެވެ. އެކަން ކުރެވުނީ ޔާމީނަށްޓަކައި މިހާރު އެކޯޓުގައި ތިބި ފަނޑިޔާރުންނާއި އޭރު ތިބި ފަޑިޔާރުން މިގައުމަށް ގައްދާރުވުމުންނެވެ.
އެކަން އެގޮތުގައި ފަސޭހަކަމާއިއެކު ކުރެވުމުގައި އަދީބު އޭރު އެތަނުގެ މައްޗަށް އޮތް ވަރުގަދަ ނުފޫޒު ވަރަށް ބޮޑު ދައުރެއް ކުޅުނެވެ. އަދި އެކަމަކީ ދުރާލާ ރާވައިގެން އަލީ ހަމީދު އުއްތަމަ ފަނޑިޔާރަށް އައުމަށް ކުރެވުނު ކަމެކެވެ. ނަމަވެސް ފަހުން ސިޔާސީ ބައެއް މައްސަލަތަކުގެ ތެރެއިން އެމަގާމު އަތުލީ އަބްދުﷲ ސައީދެވެ.
އަލީ ހަމީދުގެ ވީޑިޔޯގެ މައްސަލަ އޮއްބާލުން
އަލީ ހަމީދުގެ އޮރިޔާން ވީޑިއޯއެއް ލީކުވެ، އަބުރު ގެއްލި މުޅި ގައުމުގައި އެބޭފުޅާގެ ގާނޫނީ ވާޖިބު އަދާކުރުމުގެ އަޚްލާގާއި ނަޒާހާތްތެރިކަން ނެތްކަން ގަބޫލުކުރިއިރު، އޭރުގެ ޖުޑީޝަލް ސާވިސް ކަމިޝަނުން ނިންމީ އެވީޑިއޯ ނެގީ އަލީ ހަމީދު އަށް އެނގިގެން ކަމުގައި ނުވާތީ އެއީ ޣައިރު ގާނޫނީ ވީޑިއޯއެއް ކަަމަށެވެ.
އެހެން ބަހުރުވަޔަކުން ބުނާނަމަ އެވީޑިޔޯގައި ހިމެނޭ އަމަލަކީ ފަނޑިޔާރެއްގެ އަޚުލާގު ގެއްލޭ، ފަނޑިޔާރުންގެ މަސައްކަތާއި ނުބައްދަލު ކަމެއް ނޫންކަމަށެވެ. އެކަންވެސް ކުރީ ނުވަތުންނެވެ. އެމައްސަލަ ބަލައި ނިންމުން ނިންމުމަށްޓަކައި އޭރު އެކޮމިޝަނުގެ ރައީސްގެ މެންބަރުކަމުގައި ހުރި ޝަމުސުލް ފަލާހު ވަކިކޮށް ރައީސްގެ މެންބަރަކަށް ސިޔާސީ އެކްޓިވިސްޓެއްކަމަށްވާ ފައިސަލް އައްޔަން ކުރެވުނެވެ.
އިސާހިތަކު އަލީ ހަމީދު ބޭނުންވާގޮތަށް އެކަން ނިމި އެބޭފުޅާ ވައުދުވިގޮތަށް، ޔާމީން ބޭނުންވާ ގޮތަށް، ހުރިހާ ކަމެއް ތަރުތީބު ކުރުމުގެ މަސައްކަތް ފެށިއެވެ. މިކަންކަމުގައި އޭނާގެ އަޚެއް ކަމުގައިވީ އަބްދުﷲ ސައީދެވެ. މިދެމީހުންގެ މައިގަނޑު މަސައްކަތަކީ އަދީބުއާއި ޔާމީނު ބޭނުންވާގޮތަށް ޖުޑީޝަރީ ކޮށާ މަށާލުމެވެ.
ދެ ފަނޑިޔާރަކު މަގާމަށް ގާބިލު ނޫންކަމަށް ނިންމުން
ފުރަތަމަ މައިގަނޑު މަސައްކަތަކަށްވީ އަބްދުﷲ ސައީދަށް އުއްތަމަ ފަނޑިޔާރުކަން ދިނުމެވެ. އެގޮތުން ކޯޓުތަކާއި ބެހޭ ގާނޫނަށް ވަރުގަދަ އިސްލާހެއް ޕީޕީއެމްގެ މެންބަރުން ގެނައެވެ. ރޭވުމަކީ އެކޯޓުގެ 2 ފަޑިޔާރުން ވަކި ކުރުމާއި އަދި އެދެމީހަކު އެތަނުން ނެރެލުމެވެ.
ކޮންމެއަކަސް އެކަން ފާސްކުރުމާއި ޔާމީނު ބިލް ތަސްދީގުވުމާއި ގާތްގަނޑަކަށް ދިޔައީ އެކު އެކީގައެވެ. އިސާހިތަކު އުއްތަމަ ފަޑިޔާރު ފާއިޒާ ފަނޑިޔާރު މުއުތަސިމު މަގާމަށް ގާބިލު ނޫންކަމަށް ޖޭއެސްސީއިން ކަޑައެޅިއެވެ.
ޖޭއެއްސީގެ މިނިންމުން ގާނޫނު އަސާސީއާއި ގާނޫނުތަކާއި ޚިލާފުކަމަށް ދެކިގެން އެމްޑީޕީއިން ކޯޓަށް ހުށަހެޅިއެވެ.
ނަމަވެސް ޕީޕީއެމްގެ މެންބަރުން ބުނަމުން ދިޔައީ އެމައްސަލަ ސުޕްރީމު ކޯޓުން މައްޗަށް އުފުލުގައި ބާތިލުކޮށް އަދީބު ރާވާފައިވާގޮތަށް ފާއިޒު ވަކިކޮށް އެމަގާމަށް އަލީ ހަމީދުގެ ބާރު ފޯރުވޭގޮތަށް އަބްދުﷲ ސައީދު މަގާމަށް އައްޔަން ކުރެވޭނެ ކަމަށެވެ.
އަދީބު ބުނީ ރަނގަޅަށެވެ. ޖޭއެސްސީއިން އުސްތާޛު ފާއިޒުއާއި އުސްތާޛު މުއުތަސިމު މަގާމަށް ގާބިލު ނޫން ކަމަށް ނިންމިއެވެ. އެނިންމުން ނިންމީ ގާނޫނު އަސާސީ އާއި ޚިލާފަށެވެ. އެނިންމުން ނިންމި ސަބަބެއް ބަޔާންކުރުމެއްވެސް ނެތިއެވެ.
ޖޭއެސްސީގެ މިބުނި ނިންމުން ބާތިލު ކުރުމަށް ކޯޓަށް ހުށަހެޅި މައްސަލަ ބެލިޔަނުދީ އޮބި އަޅައި ބެހެއްޓިކަމަށް ވަކީލުން މައުލޫމާތު ދެއެވެ. ސިވިލް ކޯޓުގެ އިސްގާޒީއަށް ސުޕްރީމު ކޯޓުގެ އަމުރުކުރީ މައްސަލަ ބަލާ ފަނޑިޔާރު އަތުން މަައްސަލަ އަތުލައި އޭތި ބޭއްވުމަށްކަމަށްވެއެވެ. ނަމަވެސް އޭނާއަށް އެކަން ނުކުރެވުމުން ސުޕްރީމުކޯޓުން މައްސަލަ މައްޗަށް އުފުލިއެވެ.
އެހިސާބުން އެމައްސަލަ އެކޯޓުން ބާތިލުކުރިއެވެ. އަދި އެރޭ އުއްތަމަ ފަނޑިޔާރުކަމުގެ ހުވާ އަބްދުﷲ ސައީދު ކުރިއެވެ. މިނުބައި ނުލަފާ ގާނޫނާ ހިލާފު ރޭވުން ރޭވުމާއި ތަންފީޒު ކުރުމުގައި އިސްވެ ހުރީ ޔާމީނުގެ އޭރުގެ ނައިބު އަދީބެއެވެ. ސުޕްރީމް ކޯޓުގެ ރޭވުންތަކާއި ޖޭއެސްސީގެ ސީދާ ކޮންޓްރޯލް އޮތީ އޭނާ އަތުގައެވެ. އަލީ ހަމީދުގެ ބްރޯ އަތުގައެވެ.
ދެން ފެނިގެން ދިޔައީ ޖޭއެސްސީގެ ރައީސް ކަމަށް ބަރަހަނާވި އަލީ ހަމީދު ހަމަޖެއްސި ތަނެވެ. އެހިސާބުން އޭނާ ފަނޑިޔާރުންނަށް ބިރު ދައްކައި ފަނޑިޔާރުންނަށް މައްސަލަ ނިންމަންވީގޮތާއި ބެހޭ ގޮތުން ގުޅައި އަމުރު ކުރަމުން ގެންދިޔައެވެ. ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން ސީދާ އަލީ ހަމީދާއި، އަބްދުﷲ ސައީދުގެ ބެލުމުގެ ދަށުން ހިންގަން ފެށިއެވެ.ޖުޑީޝަލް ސާވިސް ކަމިޝަނުންގެ ބައެއް މެންބަރުން ހިމެނޭ މައްސަލަތަކުގަޔާއި، ސުޕްރީމު ކޯޓާއި ޖޭއެސްސީގެ މެންބަރުންނާއި ގާތް ވަކީލުން ހިމެނޭ މައްސަލަތަކުގައި ހާއްސަ ގޮތްތަކެއް ގެންގުޅެން ފެށިއެވެ.ގާނޫނީ ދާއިރާ ދުވަހަކުވެސް ނުދެކޭ ދަށު ދަރަޖައަކަށް ވެއްޓުނެވެ.
ގާނޫނާއި ޚިލާފަށް އުއްތަމަ ފަނޑިޔާރާއި މުއުތަސިމު ވަކިކުރި ސަބަބަކީ އަދީބު ރާވާފައިވާގޮތަށް މުޅި ޖުޑިޝަރީ އެކުގައި ސަރުކާރަށް ފައިދާވާގޮތަށް ކޮންޓްރޯލް ކުރުމެވެ. އެކަން ދިޔައީވެސް އެބީދައިން ބުނެވިދިޔަ ގޮތަށެވެ. ޔާމީނުގެ ސިޔާސީ ދޯސްތު ނާޒިމް 25 އަހަރަށް ޖަލަށް ލާން ކުރި ހުކުމަކީ ސީދާ ޔާމީނާއި އަދީބުގެ ސިޔާސީ ފަސޭހައަށްޓަކައި ކުރެވުނު ކަމެކެވެ.
އެއީ މުއްދަތު ހަމަވެފައިވަނިކޮަށް ޕީޖީ މައްސަލަ ހުށަހަޅައި، ދަށުކޯޓެއްގެ ގޮތުގައި ސުޕްރީމް ކޯޓުން މައްސަލަ ބަލައި އަދީބު ބުނި މުއްދަތަށް ނާޒިމު ޖަލަށް ލުމުން ފާޅުކަން ބޮޑުގޮތެއްގައި އެގެން އޮތް ކަމެކެވެ. އެހުކުމް ކުރުމުގައި އަދީބާއި އަލީ ހަމީދުއާއި އެހެންވެސް ފަނޑީޔާރުންނާއި ދެމެދު ކުރެވުނު މުއާމަލާތުގެ ހެކި އަދީބު އަތުގައި އޭރު ހުރިކަމަށް އަދީބުގެ ރައްޓެހިން އެދަނީ ބުނަމުންނެވެ.
މީގެ އިތުރުންވެސް ސިޔާސީ ފަރާތްތައް ޖަލަށް ލުމާއި، ބައެއް ގާޒީން މަގާމުން ސަސްޕެންޑް ކުރުމާއި، ކޯޓު ބަދަލު ކުރުމާއި، ކޯޓުގެ ތަކުގެ އިދާރީ އަދި ޝަރުއީ ކަންކަން ނިންމަންވާގޮތް ސީދާ ސުޕްރީމް ކޯޓުގެ ވަކި ވަކި ފަނޑިޔާރުން ސަރުކާރުން ބޭނުން ވާގޮތަށް ގެންދިއުމަށް ބުނުމާއި، ސީދާ ގާޒީންގެ ފޯނުތަކަށް ޔާމީނާއި ސަރުކާރުގެ ފަރާތްތަކުން ގުޅައި ކަންކަން ނިންމަންވީގޮތް އަންގަމުން ދިއުމުން އެނގެނީ ނުފޫޒު ނުފޯރުވައި ސީދާ އަޅުވެތި ކޮށްފައިވާ ކަމެވެ. މިއީ ޖުޑީޝަރީ އަޅުވެރިވެފައިވާ ވަރެވެ.