މިމަހު 18 ވަނަ ދުވަހު ވަގުތެއްގައި ދެ ގުރޫޕެއްގެ ދެމެދު ހަމަނުޖެހުން ހިނގައި ގިނަ އަދަދެއްގެ ބަޔަކަށް އަނިޔާވި ކަމަށް ފުލުހުން ބުނިއިރު، އެތަނުން އެއް ގްރޫޕުގައި ތިބީ ފުލުހުންގެ ސްޕެޝަލް އޮޕަރޭޝަން ކޮމާންޑް(އެސްއޯ) ގައި މަސައްކަތްކުރާ ފުލުހުންކަން މިހާރުމިވަނީ ކަށަވަރުވެފައެވެ.
މައުލޫމާތު ލިބިފައިވާ ގޮތުގައި މާލޭގެ ގުރޫޕަކަށް ނިސްބަތްވާ ބަޔަކާއި އެސްއޯ ފުލުހުންނާއި ދެމެދު ހިނގި މި ހަމަނުޖެހުން ހިނގަން މެދުވެރިވީ އެސްއޯ ފުލުހަކަށް އެ ގުރޫޕުން ހަމަލާދިން ކަމަށް ބުނެއެވެ.
އެނގިފައިވާގޮތުން އެދުވަހު ހެނދުނުގެ ވަގުތެއްގައި މާފަންނު ސައިހޮޓަލެއްގެ ތެރޭގައި އޮފްޑިއުޓީގައި ހުރި އެސްއޯ ފުލުހަކާއި މާލޭގެ ޒުވާން ގުރޫޕަކާއި ދެމެދުވަނީ ކޮންމެވެސް ވަރެއްގެ ހަމަނުޖެހުންތަކެއް ހިނގާފައެވެ.
މިކަމާއި ގުޅިގެން ފުލުހުންގެ އިދާރާއިން އެކަށީގެންވާ ފިޔަވަޅު އަޅާފައިނުވާކަމަށް ބުނެ، އެސްއޯ ފުލުހުންގެ ސާޅީހަށްވުރެ ގިނަ ފުލުހުން އަމިއްލަ ސައިކަލްތަކުގައި ގޮސް ފުލުސްމީހާއަށް ހަމަލާދިންކަމަށްބުނާ މީހުންނަށް ބޮޑެތި އަނިޔާތަކެއް ދީފައިވެއެވެ.
ނަމަވެސް ފުލުހުންގެ ތެރެއިން "އައްޑޫލައިވް" އަށް މައުލޫމާތު ދިން އިސް އޮފިސަރަކު ވިދާޅުވީ އެދުވަހު ހެނދުނު ހިނގާދިޔަ ހަމަނުޖެހުންތަކާއި ގުޅިގެން ކުރަންޖެހޭ އެންމެހައި މަސައްކަތްތައް ފުލުހުންގެ އިދާރާއިން ދިޔައީ ކުރަމުންނެވެ. މިގޮތުން އެއްކުރަންޖެހޭ އިންޓެލިޖެންސް މައުލޫމާތު އެއްކުރުމާއި، ހައްޔަރު ކުރަންޖެހޭ މީހުންގެ ކޯޓު އަމުރުތައް ހޯދުމާއި، މީހުން ލޮކޭޓް ކުރުމުގެ މަސައްކަތް ކުރަމުން ދަނިކޮށް އެސްއޯ ފުލުހުން އެއްވެސް އޯޑަރެއްނެތި ވަކިންގޮސް ހަމަނުޖެހުން ހިނގާފައިވާކަމަށް އެފަރާތުން މައުލޫމާތުދިނެވެ.
އެރޭ އިރާކޮޅު ވަގުތެއްގައި ހިނގައިދިޔަ މި ހަމަނުޖެހުން ތަކުގައި މަސްއޮޑިގެއަށާއި، މ. ޖޭޑަށްވަދެ އެސްއޯ ފުލުހުންގެ ތެރެއިން ބަޔަކުވަނީ އެދެގޭގައިތިބި މީހުންނަށް ބޮޑެތި އަނިޔާތަކެއްކޮށް، ތަކެއްޗަށް ގެއްލުންދީފައެވެ.
އަނިޔާލިބުނީ ފުލުހުން ހިންގި އޮޕަރޭޝަނެއްގައި ކަމަށް ފުލުހުންގެ މީޑިޔާ އަދި ރާއްޖޭގެ ބައެއް މީޑިޔާ ތަކުން ރިޕޯޓް ކޮށްފައިވީނަމަވެސް، އެގަޑީގައި ފުލުހުންގެ އިދާރާއިން ރަސްމީކޮށް އެއްވެސް އޮޕަރޭޝަނެއް ހިންގާފައިނުވާކަން ނަންހާމަނުކުރުމަށް ޝަރުޠުކޮށް ފުލުހުންގެ އިދާރާއިން "އައްޑޫލައިވް" އަށް މައުލޫމާތުދިން ފަރާތުންވަނީ ކަށަވަރުކޮށްދީފައެވެ. އަދި ފުލުހުންގެ ތެރެއިން ބަޔަކު އަމިއްލަ ހައިސިއްޔަތުން ހިންގި މި ހަރަކާތުގައި ފުލުހުންގެ ޔުނިފޯމާއި ހަތިޔާރު ބޭނުންކޮށްފައިވާކަން އެނގިފައިވާކަމަށްވެސް އެފަރާތުން މައުލޫމާތު ދިނެވެ.
އެސްއޯ ފުލުހުންގެ ތެރެއިން ބަޔަކު ނިކުމެ މިފަދަ އަމަލެއް ހިންގާފައިވުމާއި ގުޅިގެން އެރޭ ވަގުތެއްގައި އެސްއޯ ފުލުހުންނާއި ފުލުހުންގެ ބައެއް އިސްވެރިންވަނީ ބައްދަލުކޮށްފައެވެ. މިބައްދަލު ކުރުމުގައި ފުލުހުންގެ އިދާރާއަށް ނޭނގި ޢައިރުޤާނޫނީ މިފަދަ ހަރަކާތެއް ހިންގުމާއި ގުޅިގެން އެފަރާތްތަކުގެ ކަންބޮޑުވުން ފާޅުކުރިއެވެ. ނަމަވެސް އެސްއޯގެ ބައެއް ފުލުހުން ވަނީ ފުލުހުންގެ އިދާރާ އަދި ޝަރުޢީ ދާއިރާއިން ފުލުހުންނަށް ކުރާ އަނިޔާތަކަށް އިންސާފު ލިބިފައިނުވާކަން ފާހަނގަކޮށް ކުރިން ދިމާވެފައިވާ ބައެއް ހާދިސާތައް ފާހަނގަކޮށްފައެވެ. މި ބައްދަލުވުން ނިންމާލެވުނީ އިތުރަށް އެފަދަ ކަމެއް ނުހިންގުމަށް ވެރިންގެ ފަރާތުން އެދުމަށްފަހުގައެވެ.
މާލޭގެ ދެ ގެއަކަށް ފުލުހުންގެ ތެރެއިން ބަޔަކުވަދެ މީހުންނަށާއި ތަކެއްޗަށް ބޮޑެތި ގެއްލުންތަކެއް ދީފައިވާއިރު މިކަމުގައި ބައިވެރިވި އެއްވެސް ފުލުހަކާއިމެދު މިހާތަނަށް ފިޔަވަޅު އަޅާފައެއްނުވެއެވެ.
ނަމަވެސް ފުލުހުންގެ ޤާނޫނާއި، ޤާނޫނުގެ ދަށުން ހެދިފައިވާ ޤަވާއިދުތައް، އަދި ފުލުހުންގެ ކޯޑް އޮފް ކޮންޑަކްޓް އާއި ހިލާފަށް އަމަލުކުރާ ފުލުހުންނާއި މެދު މީގެކުރިން ހަރުކަށި ފިޔަވަޅު އަޅާފައިވެއެވެ. މިގޮތުން ޑިއުޓީގައި ބޯން ބޭނުންކުރުމަށް ދޭ ފެންފުޅި ގެއަށް ގެންދިއުން ފަދަ ކުދި މައްސަލަ ތަކުގައިވެސް ފުލުހުންގެ ޕްރޮފެޝަނަލް ކޮމާންޑުން ފިޔަވަޅުއަޅާފައިވެއެވެ.