ރާއްޖޭގެ ސިއްހީ ދާއިރާގެ ހާލަތު މިދަނީ ދުވަހަކަށް ފަހު ދުވަހެއް ނާޒުކު ވަމުންނެވެ. ކޮންމެ ދުވަހަކުވެސް އަޑު އިވެނީ ހިތްދަތި، ހިތާމަވެރި ހަބަރުތަކެވެ.
ލ. ގަމު ރީޖަނަލް ހޮސްޕިޓަލުން ހޭނެއްތި މީހަކު އަދިވެސް ހޭނާރައެވެ. އޭނާއަށް އައިޖީއެމްއެޗްގައި ފަރުވާ ދެމުންދާއިރު ހާލު ވަރަށް ސީރިއަސްއެވެ. އެކަމުގައި ހޮސްޕިޓަލްގެ އިހްމާލެއް އޮތްތޯ ބަލަމުންދާ ކަމަށް ހެލްތު މިނިސްޓްރީން ވަނީ ބުނެފައެވެ.
ލ. ގަމު ހޮސްޕިޓަލުން ހޭނެއްތި މީހަކު ހޭނާރާ އުޅެނިކޮށް މިއަދު ގއ. ވިލިނގިލީގައި ސިޒޭރިއަން ހެދި އަންހެނެއްގެ ހާލު ސީރިއަސްވެ، އޭނާއަށް ގދ. ތިނަދޫ ޑރ. އަބްދުއް ސަމަދު މެމޯރިއަލް ހޮސްޕިޓަލުގެ އައިސީޔޫގައި ފަރުވާ ދެމުން އެބަދެ އެވެ.
އޭނާގެ ހާލު ސީރިއަސް ކަމަށާއި، މިހާރު ވެސް ނޭވާ ލަމުން އަންނަނީ ވެންޓިލޭޓަރުގެ އެހީގައި ކަމަށް ހޮސްޕިޓަލުން މައުލޫމާތު ދެއެވެ.
މީގެ ދެމަހެއްހާ ދުވަސް ކުރިން ހދ. ކުޅުދުއްފުށީގައި ސިޒޭރިއަން ހެދި އަންހެނަކު ލޭ މަނާ ނުވެ، ނިޔާވެފައިވާ އިރު ސިޒޭރިއަން ހެދި ޑޮކްޓަރު ފުރައިގެން ގޮސްފައިވަނީ އައިޖީއެމްއެޗްގައި މަސައްކަތް ކުރުމަށްފަހު، ކޮންޓްރެކްޓް މުއްދަތު ހަމަވެގެންނެވެ.
ސީރިއަސް ބޮޑެތި މައްސަލަތަކެއް ކުރިމަތިވަމުން އަންނަ އިރު މިފަހުން ރާއްޖެ އައިސްފައިވާ ގިނަ ޑޮކްޓަރުންނާއި ބެހޭ ގޮތުން ބޮޑެތި ތުހުމަތުތަކެއް ވަނީ ކުރެވިފައެވެ.
ބަންގްލަދޭޝްއިން ރާއްޖެ ގެނެސްފައިވާ ބައެއް ޑޮކްޓަރުންނަކީ އެކަށީގެންވާ ތަޖްރިބާ ލިބިފައި ނުވާ މީހުންނާއި، ރަނގަޅަށް އިނގިރޭސި ބަހުން ލިޔަން ކިޔަން ނުދަންނަ މީހުންކަމަށް، ސިއްހީ ދާއިރާގައި މަސައްކަތް ކުރާ ފަރާތްތަކުން ދަނީ ބުނަމުންނެވެ.
މިފަދަ ބައެއް މައްސަލަތައް ފެންމަތިވެ، ބައެއް ޑޮކްޓަރުން ރާއްޖެއިން ދަނީ ފުރުވާލަމުންނެވެ.
ސިއްހީ ދާއިރާގެ ހާލަތު ބޮއްސުން ލައިގެން ގޮސް، އާސަންދަ އާއި، އެންސްޕާގެ އިސްވެރިން ހެލްތު މިނިސްޓަރަށް ހުތުރު ބަހުން މުއާމަލާތް ކޮށް، ބޭއަދަބީ ބަހުން، ހަޅޭލައްވައި، ހަދާފައިވުމުން ހެލްތު މިނިސްޓްރީގައި ހުރި މައްސަލަތައް މިވަނީ މާ ބޮޑަށްވެސް ރައްޔިތުންނަށް ހާމަވެފައެވެ.
ހާދިސާއަކަށް ފަހު ހާދިސާއެއް ކުރިމަތިވެ، ބައެއް ފަރާތްތަކުގެ ފުރާނައަށް ނުރައްކާވާއިރުވެސް އަދި ވެސް މިކަމަށް ސަރުކާރުން އަޅާލާ މަންޒަރެއް ނުފެނެއެވެ.
ވާނީވެސް އެހެންތާއެވެ. ރާއްޖޭގެ ހުރިހާކަމެއް ސިޔާސީވެ، ގައުމުގެ ބައިތުލް މާލުން ވައްކަން ކުރަމުން އަންނަ އިރު އަދިވެސް މަސައްކަތް ކުރެވެނީ އެކަންކަން މަތި އެޅުވޭތޯއެވެ. ރައްޔިތަކާއި މެދު ވިސްނާނެ ވަގުތެއް ސަރުކާރުގެ ވުޒާރާއަކަށް، ރައީސަކަށް ލިބިވަޑައި ނުގަންނަވައެވެ.