" ކުއްލިއަކަށް އިވުނު އަޑުފަތްގަޑާއި އެކު ދޮރުވައްޓާލާފައި ވަދެގަތީ މޫނު ނިވާކޮށްގެން ތިބި ބައެކެވެ. އެމީހުންގެ އަތުގައި ފިސްތޯލަ ހުއްޓެވެ. އަނިޔާވެރިކަމާއި އެކު އަހަރެން ދަމައިގަނެގެން ގޮސް އެރުވީ ކަޅު ކުލައިގެ ޖިޕަކަށެވެ. ކުރަން އުޅެނީ ކީއްކަމެއް ވެގެން އުޅެނީ ކީއްތޯ އެހުމުގެ ފުރުސަތެއް ވެސް އަހަރެންނަކަށް ނުދެއެވެ.
ސުވާލުކުރާ ކޮންމެ ފަހަރަކު އަހަރެންނާއި އެންމެ ގާތުގައި ހުރި މީހާ އަހަރެން ކަންފަތް މަތީގައި އެތިފަހަރެއް ޖަހައެވެ. އެހެންވެ އަހަރެން ދެތިން ފަހަރަކު ސުވާލު ކުރުމަށް ފަހު އަނގައިން ވެސް ނުބުނެ އިނީއެވެ.
ޖުމްހޫރީ މައިދާނާއި ދިމާލަށް އަހަރެން ގޮވައިގެން ދިޔަ ޖިޕު މަޑު ކުރި އިރު އެތަނުގައި ލޯންޗެއް އެޮތެވެ. އެއީ އަހަރެން އާންމު ގޮތެއްގައި ދަތުރުކުރާ ލޯންޗެއް ނޫނެވެ. ލޯންޗަށް އެރުވުމުގެ ކުރިން އަހަރެންގެ ލޯބިވާ އަނބިމީހާ އާއި ދަރި ކޮބައިތޯ ސުވާލުކުރުމުން ލިބުނު ޖަވާބާއި އެކު އަހަންނަށް ރޮވުނެވެ. މޫނު ނިވާކޮށްގެން ހުރި މީހާ އަހަންނާ ދިމާލަށް ބުނީ، "އެމީހުން މިހާރު ކަނޑުފައްތާފައިވާ" ކަމަށެވެ.
އަހަރެން ގޮވައިގެން ދިޔަ ލޯންޗް ގޮސް ދޫނިދޫ ޖެޓީއަށް ގާތްކުރުމާއި އެކު އިތުރު ބަޔަކު ލޯންޗަށް އަރައިފިއެވެ. އެމީހުންގެ ތެރެއިން އެކަކު އަހަރެންގެ ކަރުގައި ހިފައިގެން ދަމާފައި ގެންދިޔައީ ހައްޔަރުގައި މީހުން ބައިތިއްބާ ގޮޅިތައް ހުންނަ ދިމާލަށެވެ.
9 ނަންބަރު ގޮޅިއަށް އަހަރެން ވެއްދުމުގެ ކުރިން އެގޮޅިން މީހަކު ނެރުނެވެ. އެއީ އަހަރެންގެ ކުރީގެ އެކުވެރިޔާ ބަދީއު އެވެ. ވެގެން އުޅެނީ ކީއްކަން އަހަންނަށް ވިސްނާލެވުނީ އެހިސާބުންނެވެ. ބަދީޢުގެ ކަރުގައި ހިފައިގަނެ އޭނާ އަށް ހަމަލާދޭން މަސައްކަތް ކުރީމެވެ. އެހެން ނަމަވެސް ޅަބުޅަލެއް ހޫރާލާހެން ކޮންމެ ފަހަރަކުވެސް އޭނާ އަހަރެން ހޫރާލަނީއެވެ.
އަހަރެން ގޮޅިއަށް ވެއްދުމަށް ފަހު ބަދީޢު ވެސް މޫނު ނިވާކޮށްގެން ތިބި މީހުންނާއި އެކު ދިޔައީއެވެ. މާލޭގައި ތިބި އަހަރެންގެ އެކުވެރިޔަކާއި ގުޅޭނެ ގޮތެއް ވޭތޯ ގޮޅީގެ ސެކިއުރިޓީ އޮފިސަރަށް ގޮވާލީމެވެ. އޭނާ އައިސް ހުއްޓުމާއި އެކު އަހަންނަށް ލިބުނީ ކުއްލި ޝޮކެކެވެ. އެއީ އަހަރެންގެ ކުރީގެ އެކުވެރިއެއް ކަމުގައިވާ ކާނަލް ޒާނިމެވެ.
ޒާނިމް ހިނިތުންވެފައި ހުރެ ވާހަކަ ދެއްކި ކޮންމެ ފަހަރަކު އަހަރެން ބޭނުންވީ އޭނާގެ މޫނު މަތީގައި ޖަހާށެވެ. އެހެން ނަމަވެސް އަހަރެންގެ ކުރިމަތީގައި ހުރި ދަގަނޑު ހޮޅިތައް އެކަމަށް ހުރަސް އަޅައެވެ. ހެނދުނު 8 ޖެހުމާއި އެކު ސެކިއުރިޓީ އޮފިސަރުން އައިސް އަހަރެން ގޮވައިގެން އަނެއްކާވެސް ގޮސް ލޯންޗަށް އަރުވައިފިއެވެ. އެމީހުންގެ އިސް މީހަކަށް ހުރީ ޒާނިމެވެ.
އަހަރެން ގޮވައިގެން ލޯންޗް ގޮސް މާލޭ ފަޅުތެރެއަށް ވަން އިރު، އެތައް ހާސް ރައްޔިތުންނެއް ޖުމްހޫރީ މައިދާނަށް އެއްވެ ތިއްބެވެ. އެމީހުން ގޮވަމުން ދިޔައީ، "އޭނާ މަރާލާ، ކަނޑުފައްތާލާ" މިފަދައިންނެވެ. ނޫސްވެރިން ފޮޓޯ ނަގަން ފެށުމާއި އެކު އަހަރެން ހިނިތުންވެލާފައި އެމީހުންނަށް ދެތިން ފަހަރަކު ހަނާ އެޅީމެވެ.
އަހަރެން ގޮވައިގެން މިދަނީ ކޮންތަނަކަށް ތޯ ސުވާލުކުރުމުން އަހަރެން ގޮވައިގެން ދިޔަ ވެހިކަލްގައި ތިބި މީހުން ހޭން ފެށިއެވެ.އަދި އޭގެ ތެރެއިން އެކަކު އަހަރެން މޫނުމަތީގައި ޖެހިއެވެ. މިފަހަރު އެމަންޒަރު ނޫސްވެރިންނާއި އާންމު ރައްޔިތުންގެ ވެސް ކުރިމަތީގައެވެ. ކަޅު ކުލައިގެ ޖިޕަކަށް ލައިގެން އަހަރެން ގޮވައިގެން ދިޔައީ، ހިލިހިލާގެއާއި ޖެހިގެން ހުރި ކުށްވެރިންގެ ކޯޓަށެވެ."
ކުށްވެރިންގެ ކޯޓުގެ ޝަރީޢަތުގެ މަޖިލީހަށް އަހަރެން ވެއްދިއިރު އެތަނުގައި ފަނޑިޔާރަކަށް ހުރީ އަހަރެންގެ އެކުވެރި ބާރީއެވެ. އޭނާ ފެނުމާއި އެކު އަހަރެން ބާރީ އޭ ބުނެ ގޮވައިލީމެވެ. އެނގޭ ކަމަށް ވެސް ނެހެދިއެވެ. އިރުކޮޅެއް ފަހުން އަހަންނަށް ފެނުނީ ކުރީގެ ރައީސް ނާޝިދު އާއި އިމްރާމު އައިސް ބާރީ އާއި އެކު ފަނޑިޔާރުގެ މޭޒުކޮޅުގެ އެއް ފަރާތުގައި ޖައްސާލި މަންޒަރެވެ.
އެއާއި އެކު ބާރީ ފެށީ އަހަރެންގެ މައްޗަށް އިއްވަން ހަމަޖެހިފައިވާ ހުކުމް ކުރުމަށެވެ. " ކަލޭ މިތަނަށް މިގެނައީ، ނާޝިދު އާއި އިމްރާމު އަދި އަހަރެންނަށް ކަލޭ ޖަލަށް ލާން ފެންނާތީ، އެކަން ކަލެއަށް އެންގުމަށް. މިހިސާބުން ޝަރީޢަތް ނިމުނީ. "
އަހަންނަށް ދިފާޢުވުމުގެ ފުރުސަތު ދޭށޭ ކިޔާފައި ހަޅޭއްލަވަން ފެށި ނަމަވެސް ހުކުމް އިއްވުމަށް ފަހު ބާރީ ކޯޓް ރޫމުން ނިކުމެގެން ދިޔައީއެވެ. "
މިއީ އަހަރެންނަށް ކޮންމެ ރެއަކު ހެން މިހާރު ފެންނަ ހުވަފެނެވެ. މި ހުވަފެނަކާއި ހުރެ އަހަންނަކަށް ނިދޭ ވަރެއް ނުވެއެވެ. ހީވަނީ ދެންމެ އަކު ކޯޓަށް ގެންގޮސްދާނެ ހެންނެވެ. މިކަމާއި ހަދާނެ ގޮތަކާއި ބެހޭގޮތުން އެތައް ބަޔަކާއި ވާހަކަ ދެއްކިއްޖެއެވެ. އެންމެން ވެސް ބުނަނީ އަހަރެން މާބޮޑަށް ކަންކަމާ ވިސްނަނީ ކަމަށެވެ.
އަހަރެންގެ ބާރުވެރިކަން އެހެން މީހުން އަހަންނަށް ވިސްނައިދޭން އުޅުނަސް، އަހަރެންގެ އަމިއްލަ ނަފްސު ނިކަމެތިވެފައިވާ މިންވަރު އެނގޭނީ އަހަރެންނަށެވެ.
ދިވެހިރާއްޖޭގެ ތާރީޚުގައި ޤައުމަށް ލިބުނު ހުރިހާ ފައިސާއެއް ބަންޑުންކޮށްގެން ތަރައްޤީކުރި، ވެރިރަށް މާލޭގައި އަމިއްލަ ބިމެއް އޮވެފައި ފައިސާވެރިއަކަށް ވުމަކީ މީހުން ހީކުރަނީ ވަރަށް ބޮޑު ހިތްހަމަޖެހުމެއް ކަމަށެވެ. އެހެން ނަމަވެސް މިއަދު އަހަރެންނަށް އެ ބިން ވެފައިވަނީ، ބޮލު ރިހުމަކަށެވެ.
ސުވިސް ބޭންކުގެ އެކައުންޓްތަކުގައި ހުރި ފައިސާގެ މަތިން ހަނދާން ކުރުމަކުން ވެސް ހިތްހަމަނުޖެހުމެއް ނުލިބުނެވެ. އެހެންވެ ވަޒީފާގެ ގޮތުން އަހަންނަށް ލިބިފައިވާ ބާރުގެ ބޭނުން ކޮށްގެން ކުށްވެރިންގެ ކޯޓު އެހެން ތަނަކަށް ވެސް ބަދަލުކުރުމަށް އަންގައިފީމެވެ.
އއެހެން ނަމަވެސް އަދިވެސް އަހަރެންނަކަށް ނުނިދެއެވެ. ހިތްހަމަ ޖެހުމެއް ނުލިބެއެވެ. ކޮންމެ ރެއަކު ހޭލެވެނީ ކޯޓަށް ގެންދަން ބަޔަކު އައިސް އަހަރެންނަށް ގޮވާހެން ހީވެގެންނެވެ.