ހިތަދޫގެ ވިޔަފާރިވެރިޔަކު އަނިޔާވެރިކަމާއި އެކު މަރާލި ހާދިސާއަށް މާދަމާ 3 ހަފްތާ ވެގެން ދާއިރު އަލީ މަރާލުމުގައި ބައިވެރިވި މީހުންނަށް ޙައްޤު އަދަބު ދިނުމަށް ރައްޔިތުން ބޭނުންވެފައި ތިބި މިންވަރު، އަލީގެ މަރުގެ މައްސަލައިގެ ތުހުމަތަށް އޭނާގެ ދައްތަގެ ދަރިފުޅު ހައްޔަރުކޮށްގެން ދިޔަ ދުވަހު ވަނީ ފެނިގެން ގޮސްފައެވެ.
އެދުވަހު އުމުރުން ދުވަސްވީ މީހުންނާއި، އަންހެނުން އަދި ޒުވާނުން އަހްމަދްދީދީ އަރުވާފައި އިން ފުލުހުންގެ ވެހިކަލާއި ދިމާލަށް ދުވެފައި ދިޔަ މަންޒަރަކީ، ރައްޔިތުން އިންސާފު ލިބުމަށް ބޭނުންވަ މިންވަރު ހާމަވެގެންދާ ކަމެކެވެ.
އެހިސާބުން ނިމުނީއެއް ނޫނެވެ. ރައްޔިތުންގެ ކަންބޮޑުވުންތައް އެމީހުން ގެންދަނީ، ސޯޝަލް މީޑިޔާގައި ވެސް ފާޅުކުރަމުންނެވެ. އެހެން ނަމަވެސް ބައެއް ރައްޔިތުން ޤަބޫލުކުރާ ގޮތުގައި އަލީއަށް އިންސާފު ހޯދައި ދިނުމަށް، ރައްޔިތުން މަގުމައްޗަށް ނިކުމެ ހަރަކާތްތަކެއް ހިންގަން މިވަނީ ޖެހިފައެވެ.
" އަހަރުމެން ޤަބޫލެއް ނުކުރަން އެފްބީގައި ލިޔާއެއްޗަކުން އަސަރެއް ކުރާނެ ކަމަށް. އަލިބޭ އަށް އިންސާފު ހޯދުމަށް ފޭސްބުކުން ލޮގައުޓު ވެ އެހެން ގޮތްތަކެއް އިޚްތިޔާރު ކުރަން ޖެހޭ. އެއީ މުޒާހަރާ ވިޔަސް ހިނގާލުމަކަށް ވިޔަސް.". ހިތަދޫގެ ޒުވާނަކު ބުންޏެވެ.
މިއަދު ހިތަދޫގެ ރައްޔިތުންގެ ތެރެއިން ކޮންމެ މީހަކު ވެސް އެންމެ އިސްކަމެއް ދީގެން ފާރަލަމުން އަންނަނީ، އަލީގެ މަރުގެ މައްސަލައިގެ ތަހުގީގަށެވެ. ހޮޅުއަށިތަކުގައި މިއަދު އެންމެ ގިނަބަޔަކު ދައްކަމުން ގެންދަނީ އަލީގެ މަރުގެ މައްސަލައިގެ ތަހުގީގު ލަސްވެފައިވާތީ އެވާހަކައެވެ. ފުލުހުން މައްސަލަ އާއި ބެހޭގޮތުން ނޫސްކޮންފަރެންސެއް ވެސް ބާއްވާފައި ނުވާތީ ފުލުހުން މައްސަލައިގެ ތަހުގީގު ހުއްޓާލީތޯ ބައެއް ރައްޔިތުން ސުވާލު އުފައްދަން މިވަނީ ފަށާފެއެވެ.
'އައްޑޫލައިވް' އާއި ވާހަކަ ދެއްކި ހިތަދޫ ވިޔަފާރިވެރިޔަކު ބުނިގޮތުގައި ރައްޔިތުންގެ ތެރެއިން އެތައް ބަޔަކު ވަނީ އެމީހުން އަމިއްލައަށް ހިތަދޫ ޕޮލިހަށް ހާޒިރުވެ އަދި ވަކިވަކި ފުލުހުންނާއި ބައްދަލުކޮށް އެމީހުންނަށް ފެނިފައިވާ މަންޒަރުތަކާއި، އެމީހުން އަމިއްލައަށް ކުރި "ތަހުގީގުތަކުން" ހޯދިފައިވާ ހޯދުންތަކުގެ ވާހަކަ ހިއްސާކޮށްފައި ކަމަށްވެއެވެ.
ރަށުތެރޭގައި ރައްޔިތުންގެ މެދުގައި ދެކެވޭ ވާހަކަތަކަށް ބަލާއިރު، ފުލުހުންގެ ތަހުގީގަށް ހައްޔަރުކުރި މީހުން އަލީގެ މަރުގެ މައްސަލައިގައި ހިމެނޭ ކަމާއި މެދު އެމީހުން ޝައްކެއް ނުކުރެއެވެ. ރައްޔިތުންގެ މެދުގައި މައްސަލައަކަށް ވަނީ، އަލީ މަރާލުމުގައި ބައިވެރިވި ކަމަށް ރައްޔިތުން "ތުހުމަތު" ކުރާ ބަޔަކު ދޫވެފައި ތިބުމުންނެވެ.
ދިވެހިރާއްޖޭގެ ފުލުހުންގެ މުއައްސަސާއިން ކުރާ ތަހުގީގުތަކަށް ސިޔާސީ ނުފޫޒު ފޯރުވާ މިންވަރަށް ބަލާއިރު، އަލީގެ މަރުގެ މައްސަލައިގެ ތަހުގީގަށް ވެސް ސިޔާސީ ފަރާތްތަކުން ނުފޫޒު ފޯރުވާފާނެ ކަމަށް ބުނެ ގިނަ ބަޔަކު ގެންދަނީ ޝުޢޫރު ފާޅުކުރަމުންނެވެ.
' ތޯތޯ' ވާހަކައަަކަށް ވި ނަމަވެސް އަލީ މަރާލި މައްސަލައިގެ ތަހުގީގަށް ހައްޔަރުކޮށްފައިވާ މީހުންގެ އާއިލާތަކާއި ސަރުކާރާއި ގުޅުން އޮންނަ ސިޔާސީ އެކްޓިވިސްޓުން ބައްދަލުކޮށްފައިވާ ކަމަށް ވެސް ރަށުތެރޭގައި ވަނީ ވާހަކަ ދައްކަން ފަށާފައެވެ.
މައްސަލަތަކުގެ ބާވަތުން ތަހުގީގު ކުރިއަށް ގެންދިއުމުގައި ފުލުހުން ޢަމަލު ކުރާ ގޮތް ތަފާތު ވެދާނެއެވެ. އެހެން ނަމަވެސް ތަހުގީގާއި ބެހޭ މަޢުލޫމާތު އާންމު ނުކުރި ކަމުގައި ވިޔަސް، ފުލުހުންގެ ފަރާތުން އެ މައްސަލައިގެ ތަހުގީގު ކުރިއަށްދާ ކަމުގެ ޔަޤީންކަން ދިނުމަކީ ތަހުޒީބު މުޖުތަމަޢްތަކުގައި ވެސް ޢަމަލުކުރަމުން ގެންދާ އުސޫލެވެ.