ނެދަލެންޑްސްގެ ފުޓުބޯޅަތަރި ޖޯހާން ކްރުޔަފް 68 އަހަރުގައި ކެންސަރުގެ ބަލީގައި މަރުވެއްޖެއެވެ. އަޔެކްސް އަދި ބާސެލޯނާ އަށް ކުޅެފައިވާ ކްރުޔަފްގެ މަރާ ގުޅިގެން ފުޓުބޯޅަ ތަރިންނާއި ޓީމު ތަކުން އަންނަނީ ތައުޒިޔާގެ ބަސްތައް ފޮނުވަމުންނެވެ.
ނެދަލެންޑްސްގެ ގައުމީ ފުޓުބޯޅަ ޓީމުން ކޮށްފައިވާ ޓުވީޓެއްގައި ވަނީ މިއީ ވަރަށް ބޮޑު ގެއްލުމެއް ކަމަށާއި ކްރުޔަފް އަކީ ނެދަލެންޑްސް ގެ ފުޓުބޯޅައިގެ ތާރީޚުގައި ފެނިގެންގޮސްފައިވާ އެންމެ މޮޅު އެއްކުޅުންތެރިޔާއެވެ.
ބާސެލޯނާ އިންވެސް ކްރުޔަފް އަށް ތައުޒިޔާގެ ޓުވީޓެއް ކޮށްފައިވެއެވެ.
ތަފާތު 5 ކުލަބަކަށް ޖުމުލަ 521 މެޗު ކުޅެދީފައިވާއިރު ކްރުޔަފް ވަނީ 293 ގޯލު ކާމިޔާބުކޮށްފައެވެ. އަޔެކްސް ގައި ހުރެގެން އެޓީމަށް 18 ތަށި ހޯދާފައިވާއިރު އޭގެތެރޭގައި ޔޫރޮޕިއަން ކަޕުވެސް ހިމެނެއެވެ. ބާސެލޯނާއާއެކުވެސް އޭނާ ޔޫރޮޕިއަން ކަޕު ހޯދާފައިވާއިރު ހަތަރު ލީގު ތަށި ނަގާފައިވެއެވެ.
އޭނާގެ ނެދަލެންޑްސްގެ ފުރަތަމަ މެޗުގައި ގޯލެއް ޖަހާފައިވާއިރު ދެވަނަ މެޗުގައި ވަނީ ރަތް ކާޑެއް ހޯދާފައެވެ. ރިޕޯޓުތައް ބުނާގޮތުގައި މިއީ ނެދަލެންޑްސް ގެ ކުޅުންތެރިޔަކަށް ދެއްކި ފުރަތަމަ ރަތް ކާޑެވެ.
ފުޓުބޯޅައިގެ ދުނިޔެއިން ފަނޑުވެގެން ދިޔަ އަލިގަދަ ތަރިއެއްގެ ގޮތުގައި ކްރުޔެފް ވާނެކަމީ ޝައްކެއް އޮތް ކަމެއް ނޫނެވެ.