ރާއްޖޭގެ ތައުލީމީ ދާއިރާއަށް ހާއްސަކޮށް އައްޑޫގެ ތައުލީމަށް އަގުހުރި މަސައްކަތްތަކެއް ކުރައްވަމުން ގެންދެވި އައްޝައިހް ނާސިރު ޒަކަރިއްޔާ ކެންސަރު ބައްޔަށް ފަރުވާ ހޯއްދަވަމުން ދަނިކޮށް މިރޭ އިރާކޮޅުގެ ވަގުތެއްގައި ނިޔާވެއްޖެއެވެ.
މައުލޫމާތު ލިބިފައިވާ ގޮތުގައި ޝެއިހް ނާސިރު ޒަކަރިއްޔާ ނިޔާވެފައިވަނީ އިންޑިޔާގެ ބެންގަލޫރުގެ މަނިޕާލް ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށް މިއަދު އިރުއޮއްސި 6:30 ގައެވެ. ނިޔާވި އިރު މަރްޙޫމް ނާސިރުގެ އުމުރުފުޅަކީ 58 އަހަރުއެވެ.
ޝަރަފުއްދީން ސްކޫލުގެ ލީޑިން ޓީޗަރެއްގެ މަގާމުގައި ހުންނެވި މަރްޙޫމް ނާސިރު ޒަކަރިއްޔާ އަކީ އައްޑޫގެ ގިނަ ދަރިވަރުން ތަކަކަށް އިސްލާމް ކިޔަވައިދެއްވެވި އުސްތާޒެކެވެ.
މަރްހޫމް ނާސިރު ވަނީ އީޕީއެސް ސްކޫލްގައިވެސް އިސްލާމް ޓީޗަރެއްގެ ގޮތުގައި މަސައްކަތް ކުރައްވާފައެވެ. އެގޮތުން އީޕީއެސް ސްކޫލުގައި އެބޭފުޅާ އިސްލާމް ކިޔަވައިދެއްވި ބައެއް ދަރިވަރުން މިހާރުގެ ކެބިނެޓް މިނިސްޓަރުންގެ ގޮތުގައި މަސައްކަތް ކުރައްވަމުން އެބަގެންދަވައެވެ.
"އައްޑޫލައިވް"އަށް މައުލޫމާތު ލިބިފައިވާ ގޮތުގައި މިހާރުގެ ހޯމް މިނިސްޓަރ އުމަރު ނަސީރު އަކީވެސް މަރްޙޫމް ނާސިރުގެ ދަރިވަރެކެވެ.
ނާސިރު ނިޔާވިއިރު އޭނާގެ 4 ކުދިންނާއި އަންބަކު ދުނިޔޭގައި އެބަތިއްބެވެ.