ކެންސަރަށް ސްކްރީން ކުރަން އައްޑޫގައި ކުރިއަށް ގެންދަން ނިންމާފައިވާ ކޭމްޕަކަށް ސިންގަޕޫރުގެ ޑޮކްޓަރުންގެ ޓީމެއް އައްޑު އަށް އަންނަ ގޮތަށް ހަމަޖެހިއްޖެ އެވެ.
މި ސްކްރީނިން ޕްރޮގްރާމަކީ އައްޑޫގެ ސިއްހީ ހިދުމަތްދޭ ތަންތަނާއި ކެންސަ ސޮސައިޓީ ގުޅިގެން ކުރިއަށް ގެންދާ ޕްރޮގްރާމެކެވެ.
މަރަދޫ ސިއްހީ މަރުކަޒު ހިންގެވުމާ ހަވާލުވެ ހުންނެވި އިހްތިޝާން ނަޖީބް މިއަދު "އައްޑޫ ލައިވް" އަށް ވިދާޅުވީ އައްޑު އަށް އަންނަ ގޮތަށް ހަމަޖެހިފައި ވަނީ ސިންގަޕޫރުގެ އެންމެ މަޝްހޫރު ހޮސްޕިޓަލްތަކުގެ ތެރޭގައި ހިމެނޭ މައުންޓް އެލިޒަބަތު ހޮސްޕިޓަލްގެ ކެންސަރަށް ހާއްސަ ޑޮކްޓަރުންގެ ޓީމެއް ކަމަށެވެ. އެ ޓީމްގައި ހަ ވަރަަކަށް ޑޮކްޓަރުން ހިމެނޭނެ ކަމަށް އޭނާ ވިދާޅުވި އެވެ.
ކެންސަރަށް ސްކްރީން ކުރަން ކުރިއަށް ގެންދާ ކޭމްޕް ކުރިއަށް ގެންދަން ނިންމާފައި ވަނީ އަންނަ މަހުގެ 27، 28 އަދި 29 ގަ އެވެ. އެގޮތުން ހިތަދޫގައި ސްކްރީނިން ކުރިއަށް ދާނީ ހީތަދޫ ރީޖަނަލް ހޮސްޕިޓަލްގަ އެވެ.
ފޭދޫ، މަރަދޫފޭދޫ އަދި މަރަދޫ ރައްޔިތުންނަށް ސްކްރީންކޮށް ދިނުން އޮންނާނީ މަރަދޫ ސިއްހީ މަރުކަޒުގަ އެވެ. އަދި ހުޅުމީދޫގައި ކޭމްޕް ކުރިއަށް ދާނި އެ އަވަށުގެ ސިއްހީ މަރުކަޒުގަ އެވެ.
އިހްތިޝާމް ވިދާޅުވީ ސްކްރީން ކުރަން ބޭނުންވާ ފަރާތްތަކަށް އެ ތިން ތަނުން ވަަރަށް އަވަހަށް ރަޖިސްޓްރޭޝަން ހުޅުވާނެ ކަމަށެވެ.