މަރަދޫގައި އިމާރާތްކޮށްފައިވާ ސިއްހީ މަރުކަޒުގެ އާ އިމާރާތަށް އަންނަ މަހުން ފެށިގެން ހުރިހާ ހިދުމަތެއް ބަދަލުކޮށް، އެތަނުން ހިދުމަތް ދޭން ފަށާނެ ކަމަށް އެ މަރުކަޒުން ބުނެފި އެވެ.
މަރަދޫ ސިއްހީ މަރުކަޒު ހިންގެވުމާ ހަވާލުވެ ހުންނެވި އިހްތިޝާމް ނަޖީބް މިއަދު "އައްޑޫ ލައިވް" އަށް ވިދާޅުވީ އާ އިމާރާތުގެ މަސައްކަތް މިހާރު ހުރީ ނިމިފައި ކަމަށެވެ. އޭނާ ވިދާޅުވީ މިހާރު ކުރަން ހުރީ ކުދިކުދި ބައެއް މަސައްކަތްތައް ކަމަށެވެ.
"އާ އިމާރާތަށް ބަދަލުވާން ޖެހޭ ތައްޔާރީތައް މިހާރު މި އަންނަނީވަމުން. އަންނަ ހަފުތާގެ ތެރޭގައި އެތަނަށް އެއްކޮށް ބަދަލުވެވޭނެ،" އޭނާ ވިދާޅުވި އެވެ. "އޭރުން ކުރިން ދިމާވެފައި ހުރި ހުރިހާ މައްސަލަތަކަށް ވެސް ހައްލުވެގެން ދާނެ. އެންމެ ބޮޑު ފަަސޭހައަކަށް ވާނީ ޖާގައިގެ ތަނަަވަސްކަން އޮތުން."
އާ އިމާރާތަށް ހިދުމަތްތައް އެއްކޮށް އަންނަ ހަފުތާގައި ބަދަލުވި ނަމަވެސް، މިހާރު ވެސް ޑޮކްޓަރު ބަލި މީހުން ބަލަނީ އާ އިމާރާތުގެ ކޮންސަލްޓޭޝަން ރޫމްގަ އެވެ.
މަރަދޫ ސިއްހީ މަރުކަޒަށް ދިމާވެފައިވާ ޖާގައިގެ ދަތިކަން ހައްލު ކުރަން އިމާރާތް، އާ ސިއްހީ މަރުކަޒާ އެކު އެތަނުގެ އެނދުގެ ޖާގަ މިހާރު ވަނީ 11 އަށް އިތުރުވެފަ އެވެ.
ލިންކް ރޯޑުން މަރަދޫ ބަނދަރާ ދިމާއަށް މޫނުމަތިވާ ގޮތަށް ހަދާފައިވާ އާ ސިއްހީ މަރުކަޒާއި ކުރީގެ އިމާރާތް މިހާރު ހުރީ ގުުޅުވާލާފަ އެވެ. އެހެންވެ ދެ އިމާރާތް ވެސް ބޭނުން ކުރަމުން ގެންދާނެ އެވެ.