ދިވެހި ރައްޔިތުކަން ދޫކޮށްލެވޭގޮތަށް ގާނޫނު އިސްލާހު ކުރުމަށް ސަރުކާރުން ރައްޔިތުންގެ މަޖިލިހަށް ހުށައަޅައިފި އެވެ.
ބިލެތްދޫ ދާއިރާގެ މެމްބަރު އަހުމަދު މުބީން މި އިސްލާހު ހުށައަޅަމުން ބުނެފައިވަނީ ގާނޫނު އަސާސީގައި ކޮންމެ ރައްޔިތަކަށް ދިވެހި ރައްޔިތުކަން ދޫކޮށްލުމުގެ ހައްގު ދީފައިވިނަމަވެސް އެކަން ކުރެވޭނެ އިޖުރާއަތުތަކެއް ނެތް ކަމަށެވެ.
މިބިލުގެ ފުރަތަމަ ކިޔުން އިއްޔެގެ ޖަލްސާގައި އިއްވާފައިވާއިރު މިއަދުގެ ޖަލްސާ ވަނީ މަޖިލީހުގައި ކުރާނެ ކަމެއް ނެތިގެން ކުރުކޮށްލާފައެވެ.
ސިޓިޒެންޝިޕް ގާނޫނަށް ތިން އިސްލާހު ސަރުކާރުގެ ފަރާތުން ބިލެތްދޫ ދާއިރާގެ މެމްބަރު މުބީން ގެންނަވާފައިވާއިރު ރައްޔިތުކަން ދޫކޮށްލަން އެދޭ މީހާ ވަކި އިގުރާރެއްގައި ސޮއި ކުރަން ޖެހޭނެ ކަމަށް ހުށައަޅައިފައިވެއެވެ. އަދި ވަކި ހާލަތްތަކުގައި މިނިސްޓަރަށް އެމީހަކު ރައްޔިތުކަން ދޫކޮށްލުމަށް ނުފެންނަ ކަމުގައިވާނަމަ އިގުރާރު ބަލައިނުގަތުމުގެ ބާރުވެސް މިއިސްލާހުގެ ދަށުން މިނިސްޓަރަށް ލިބެއެވެ.
ތިންވަނަ އިސްލާހަކަށް ސަރުކާރުން ހުށައަޅައިފައިވަނީ، މިގޮތަށް އަމަލުކޮށް ދިވެހި ރައްޔިތުކަން ދޫކޮށްލައި ހަމަސް ދުވަހުގެ ތެރޭގައި އެހެން ގައުމެއްގެ ރައްޔިތަކަށް ވެއްޖެނަމަ ދެން އަނބުރާ ދިވެހި ރައްޔިތަކަށް ނުވެވޭނެކަމަށެވެ.
ދިވެހިންނަކީ މުއްސަނދި ސަގާފަތަކާއި، އަމިއްލަ ބަހެއް އޮތުމުގެ އިތުރުން ޙައްގު ދީން އިސްލާމް ދީނުގެ އަހުލުވެރިންނަށްވެފައި، ދިވެހި ރައްޔިތުކަން ދޫކޮށްލަން އެދޭ ދިވެހި ދަރީން މަދުން ނަމަވެސް އުޅޭ ކަމަކީ ހިތާމަވެރިކަމެކެވެ.