އެންޓި ކޮރަޕްޝަން ކޮމިޝަންގެ ރައީސްގެ މަގާމުގައި މިހާރު ހުންނެވި ސ. ހިތަދޫ، ރަންފަސް، ހަސަން ލުތުފީ އެ ކޮމިޝަނަށް އައްޔަން ކުރެވުނީ ވަރަށް އަރާރުން ބޮޑު ގޮތަކަށް ކަން ގިނަމީހުން މިހާރު ހަނދާން ނެތުމަކީ އެކަށީގެންވާ ކަމެކެވެ.
ނަމަވެސް އެކަން ހިނގާދިޔަގޮތަށް ބަލައިފިނަމަ ހަސަން ލުތުފީ އެމަގާމަށް އައްޔަން ކުރުމަށް ފަހަތުގައި ނުފޫޒުގަދަ ބަޔަކު ކެނޑިނޭޅި މަސައްކަތް ކޮށްފައިވާކަން އެނގޭނެއެވެ.
ގާނޫނު އަސާސީގެ 200 ވަނަ މާއްދާގެ (ށ)، އަދި އޭސީސީގެ ގާނޫނުގެ ހަތަރު ވަނަ މާއްދާގެ (ށ) ގެ ދަށުން އޭސީސީ އަށް މެމްބަރުން އައްޔަން ކުރުމަށްޓަކައި ނަންތައް ފޮނުވަންޖެހެނީ ރައީސުލް ޖުމްހޫރިއްޔާއެވެ.
އެހެންކަމުން އޭރުގެ ރައީސް މުހައްމަދު ނަޝީދު މިހާރު އެކޮމިޝަންގެ ރައީސް ހަސަން ލުތުފީގެ ނަންހިމެނޭ ގޮތަށް ނަންތައް ރައްޔިތުންގެ މަޖިލީހަށް ފޮނުއްވިއެވެ. އެހެން ނަމަވެސް ހަސަން ލުތުފީގެ ނަން ރައީސް ވަނީ ފަހުން އަނބުރާ ގެންދެވުމަށްފަހު އޭނާގެ ބަދަލުގައި އެ ކޮމިޝަނަށް އައްޔަންކުރުމަށް އދ. މާމިގިލީ ރަންގިރިޓީގޭ އިބްރާހީމް ރަޝީދު އަބޫބަކުރުގެ ނަން މަޖިލީހަށް ފޮނުއްވާފައެވެ.
އޭސީސީ އަށް އައްޔަން ކުރުމަށް ރައީސް ފޮނުއްވާ ނަންތައް އަނބުރާ ގެންދެވުމަކީ އެމަނިކުފާނަށް ލިބިވަޑައިގެންފައިވާ އިހްތިޔާރެއް ކަމަށާއި އަދި އެ ނަންތައް އަނބުރާ ގެންދިއުމަށް ވަކި މުއްދަތެއް ނޯންނަ ކަމަށް އޭރު ސަރުކާރުން ބުނެފައިވެއެވެ.
މަޖިލީހުން ލުތުފީގެ ނަމާ މެދު ގޮތެއް ނުނިންމަނީސް އެ ނަން އަނބުރާ ގެންދިއުމަކީ ރައީސަށް ލިބިވަޑައިގެންފައިވާ އިހުތިޔާރުގެ ތެރެއިން ކުރައްވާފައިވާ ކަމަކަށް ވިޔަސް މަޖިލީހުގައި ތިއްބެވި ބޭފުޅުން އޭރު އެކަން ބަލައިނުގަތެވެ. އޭރު މަޖިލީހުގެ މެޖޯރިޓީއޮތް އިދިކޮޅު ފަރާތްތަކުން ވަނީ ހަސަން ލުތުފީގެ ނަން ރައީސް އަނބުރާ ގެންދަވާފައި ވަނިކޮށް ލުތުފީ އޭސީސީ އަށް އައްޔަން ކުރުމަށް ރުހުން ދީފައެވެ.
މިކަމާއި ގުޅިގެން ސަރުކާރުންވަނީ ލުތުފީގެ ނަން ރައީސް ގެންދަވާފައިވަނިކޮށް އެ ނަން ފާސް ކުރުމަކީ ކުރެވޭނެ ކަމެއް ނޫން ކަމަށާއި، އެގޮތަށް ފާސްކޮށްފި ނަމަ އެ ވާނީ ރައީސް ހުށަނާޅުއްވާ ނަމެއް ފާސް ކުރުން ކަމަށްވުމުން ، އެގޮތަށް މަޖިލީހުން ނަމެއް ފާސްކޮށްފި ނަމަ އެމީހަކު ކޮމިޝަނަށް އައްޔަން ކުރަން ނުޖެހޭނެ ކަމަށް ދެކޭތީ އެކަމާ މެދު ގޮތެއް ކަނޑައަޅައިދެއްވުން އެދި ސުޕްރީމް ކޯޓަށްވެސް ހުށަހަޅުއްވާފައެވެ.
ލުތުފީ އޭސީސީއަށް އައްޔަން ކުރުމުގެ މައްސަލަ ދުސްތޫރީ ބޮޑު މައްސަލަގަނޑަކަށްވެފައި ވަނިކޮށްވެސް ފެނިގެން ދިޔައީ މުޅި ނިޒާމު ފުނޑާލައިގެން ނަމަވެސް ލުތުފީ ކޮމިޝަންގެ މެމްބަރު ކަމަށް އައްޔަން ކުރުމަށް އެއްބަޔަކު ކެނޑިނޭޅި މަސައްކަތް ކުރަމުން ދިޔަ މަންޒަރެެވެ. މިކަމުގައި ރައްޔިތުންގެ މަޖިލިސްތެރެއިން އެންމެ ބޮޑު ދައުރެއް އަދާކުރެއްވި އެއް ބޭފުޅަކީ އޭރު މުލަކު ދާއިރާގެ މެމްބަރު އަދި މިހާރުގެ ރައީސް އަބްދުﷲ ޔާމީންއެވެ.
މިހާރު ރައީސް އޮފީހުގެ ލީގަލް އެފެއާޒް މިނިސްޓަރުގެ މަގާމުގައި ހުންނެވި އާޒިމާ ޝުކޫރު ގާނޫނީ ވަކީލެއްގެ ގޮތުގައި ހަމަޖައްސަވައި، ޝަރުޢީ ކޯޓުތައް ބޭނުން ކުރައްވައިގެން އޭސީސީ އަށް ލުތުފީ އައްޔަންކުރަން މަޖުބޫރުކުރުވީ ސީދާ ރައީސް ޔާމީން ކަމަށް ގިނަބަޔަކު ތުހުމަތުކުރެއެވެ. އަދި އެނގިފައިވާ ގޮތުން އާަޒިމާ ޝުކޫރު ވަކާލާތު ކުރުމުގެ އުޖޫރަވެސް ދެއްވީ ހުދުޔާމީންގެ އަމިއްލަ ފާއިސާއިންނެވެ.
ކޮންމެއަކަސް މިހާ އަރާރުން ބޮޑުވެގެން ދިޔައިރުވެސް ލުތުފީ އޭސީސީއަށް އައްޔަން ކުރުމުގެ މަސައްކަތް ދޫދިނުމެއްނެތި ސީދާ ރައީސް ޔާމީންގެ ބެއްލެވުމުގެ ދަށުން ކުރައްވަމުން ގެންދެވީ ބޭނުމެއް ނެތިއެއްނޫނެވެ. ރާއްޖޭގައި ކޮރަޕްޝަނާއި ދެކޮޅަށް މަސައްކަތްކުރަން އޮތް މިނިވަން ކޮމިޝަނަކީ ލުތުފީ އައްޔަންކުރެވޭ ކޮމިޝަން ކަމަށްވާއިރު ، ރާއްޖޭގައި ހުރި އެންމެ ކޮރަޕްޓް މީހަކީ ރައީސް ޔާމީން ކަމަށް ވަރަށް ގިނަ ފަރާތްތަކަކުން އޭރުވެސް ތުހުމަތުކުރެއެވެ.
އެހެންކަމުން އެފަދަ މަގާމެއްގައި ހުންނަ މީހަކަށް ނުފޫޒު ފޯރުވޭނެ އިންތިޒާމް ހަމަޖައްސާފައި ބޭއްވުމަކީ އެމަނިކުފާނު އޭރުއްސުރެ ރާވާފައިވާ އޮތް ސިޔާސީ މުސްތަގްބަލަށް ނުހަނު ބޭނުންތެރި ކަމެކެވެ.
"އައްޑޫލައިވް" އަށް މައުލޫމާތު ހިއްސާކުރި ލުތުފީގެ އަރިސް ބޭފުޅަކު ވިދާޅުވީ ލުތުފީ އަކީ ކުރިން ރައީސް ޔާމީންގެ މާލީ ހިސާބުތައް ބަލަހައްޓަވަމުން ގެންދެވި ފަރާތެވެ. އެހެންކަމުން މިދެބޭފުޅުންގެ ގުޅުން ބަދަހިވެފައި އޮންނާނެވަރު ކޮންމެ ބޭފުޅަކަށްވެސް އަންދާޒާކޮށްލަން އުނދަގުލެއްނުވާނެއެވެ.
ރައީސް ޔާމީނުގެ އެންގުމަށް ކުރީގެ ރައީސް ނަޝީދުގެ ސަރުކާރުގައި ލުތުފީގެ ދައުރު ވަރަށް ފުރިހަމައަށް އަދާކޮށްފައިވެއެވެ. އެގޮތުން ސަރުކާރުގެ ބައެއް ވެރިންގެ މައްޗަށް ތުހުމަތު ކުރެވުނު ކޮރަޕްޝަނުގެ އަމަލުތައް ބަލައި ފިޔަވަޅު އަޅަމުން ގޮސްފައިވެއެވެ.
ނަމަވެސް ރާއްޖޭގެ ރައީސުލް ޖުމްހޫރިއްޔާ ކަމުގެ މަގާމަށް ޔާމީން ޢަބްދުލް ޤައްޔޫމް އިންތިހާބު ކުރެވިގެން ދިޔަ ހިސާބުން ދެން އެސީސީއިން ބަލަންޖެހޭ ސަރުކާރުގެ ކޮރަޕްޝަނުގެ މައްސަލައެއް ނެތްކަހަލައެވެ.
ރާއްޖޭގެ ތާރީޚުގައި ނުދެކޭފަދަ ބޮޑެތި ކޮރަޕްޝަނުގެ މައްސަލަތައް ރައީސް ޔާމީނުގެ ސަރުކާރުގައި ފެންމަތިވުމުންވެސް އޭސީސީ އޮތީ ނިދާފައެވެ. ދައުލަތުގެ ފާއިސާއިން އެތައް ބިލިޔަން ރުފިޔާގެ ހިޔާނާތް ވެފައިވާއިރުވެސް އޭސީސީ ފެނިގެން ދިޔައީ ވަރަށް ލޮނު މަޑުގޮތަކަށެވެ.
ބޮޑެތި ސީރިއަސް މައްލަތަކެއްގެ ތަހުގީގު އޭސީސީއިން ތަހުގީގު ކުރަމުންދާކަަމަށް އެއްދުވަހު ބުނާއިރު ، ޖެހިގެން އަންނަދުވަހު އޭސީސީގެ ރައީސް ފެނިގެން ދަނީ ތުހުމަތުކުރެވޭ ސަރުކާރުގެ ވެރިންނާއި އެކު ފަރީއްކުޅުއްވަން އިންނަ މަންޒަރެވެ. އެމްއެމްޕީއާރްސީ ގެ ހިޔާނާތުގެ މައްސަލަ ތަހުގީގު ކުރަމުން ދިޔައިރު ލުތުފީ ހުންނެވީ އައްޑޫގައި ރައީސް ޔާމީނާއި އެކު ފުޓްބޯޅަ މެޗް ބެއްލެވުމަށެވެ.
ދައުލަތުގެ ފާއިސާއަށް ހިޔާނާތް ވުމުގައި ރައީސް ޔާމީންގެ އަތެއްވާކަމަށް އެތައް ރައްޔިތުންނެއް ތުހުމަތު ކުރަމުން ދިޔައިރު ، އެމައްސަލަ ތަހުގީގު ކުރާ އިދާރާގެ ރައީސް ތުހުމަތު ކުރެވޭ ފަރާތާއި އެކު ހިނވަޑުވަން ހުންނެވި މަންޒަރު ފެނުމުން އެކުރައްވަނީ ރައްޔިތުންނަށް މަލާމާތް ނޫން ދެން ކޮންކަމެއްތޯއެވެ.
ލުތުފީގެ ކުރީގެ "ބޮސް" ރައީސުލް ޖުމްހޫރިއްޔާ ކަމުގެ މަގާމަށް އައުމުން ލުތުފީއަށް ލިބުނު ހަދިޔާތައްވެސް ވަކި ދެރައެއް ނޫނެއެވެ. ރައްޔިތުންނަށް ބޯހިޔާވަހިކަން ފޯރުކޮށްދިނުމަށް ހިންގުނު މަޝްރޫއެއް ކަމުގައިވާ ރެހެންދި ފްލެޓުން ފްލެޓެއް ލުތުފީއަށް ދީފައިވުމުން ސަރުކާރުން ކުރާ ގޯސް ކަންތައް ނުފެންނަނީ ކަމަށްވެސް ވެދާނެއެވެ.
މަޖިލިސް މެމްބަރުންނާއި ސަރުކާރުގެ އިސްފަރާތްތަކުން ކޮރަޕްޝަނުގެ އަމަލުތަކަށް ރޯމާދުވާލުގައި ރައްޔިތުންގެ ކުރިމަތީގައި ޖެހިލުމެއްނެތި އިއުތިރާފުވުމުންވެސް އޭސީސީ އަކަށް އަޑެއް ނީވެއެވެ. އެއްބަޔަކު ކޮރަޕްޝަނުގެ ފާއިސާ ބަހަމުން، އަނެއްބަޔަކު ފާއިސާ ބަހާނެ ކަމަށް ބުނެ ދާއިރުވެސް އޭސީސީ އަކަށް އަޑެއް ނީވުނެވެ.
ބުނެލާހާވެސް އެއްޗަކީ ތަހުގީގު ކުރިއަށްދާވަހަކައެވެ. ތަހުގީގު ކުރިޔަސް ނަތީޖާއެއް ނުފެނެއެވެ. ކުރުގޮތަކަށް ދަންނަވަނީނަމަ ސަރުކާރުގެ ކޮރަޕްޝަނުގެ އަމަލުތައް އޭސީސީ އިން ބަލަނީ ކަނު ލޮލަކުންނެވެ. އަޑުއަހަނީ ބީރު ކަންފަތަކުންނެވެ. ކޮރަޕްޝަނުގެ އަމަލެއް ހިންގުމަށް ރައީސް ޔާމީނަށް އެއްވެސް ބިރެއް މިގައުމަކު ނެތެވެ. ވާނީވެސް އެހެންނެވެ. ކޮރަޕްޝަނުގެ އަމަލުތައް ބަލައި ފިޔަވަޅު އަޅަން އެންމެ އިސްކޮށް ހުންނެވީ އެމަނިކުފާނުގެ ކުރީގެ އެކައުންޓެންޓެވެ.