ޓޫރިޒަމް ދާއިރާ އަށް ޒުވާނުން ބިނާ ތަމްރީނުކޮށް ބިނާ ކުރުމަށް ޝަންގްރިއްލާ ވިިލިގިލި ރިސޯޓް އެންޑް ސްޕާ އިން މި އަހަރު ހިންގަން ނިންމާފައިވާ އެޕްރެންޓިސްޝިޕް ޕްރޮގްރާމަށް ކުދިން ނެގުމަށް ބާއްވާ އޯޕަންޑޭ އަންނަ މަހު ބާއްވަން ނިންމައިފި އެވެ.
އޯޕަންޑޭ އޮންނާނީ އަންނަ މަހުގެ 19 އާއި 20 ދުވަހު އެވެ.
ރާއްޖޭގައި ހިންގާ އެންމެ މަތީ ފެންވަރުގެ ރިސޯޓްތަކުގެ ތެރޭގައި ހިމެނޭ ޝަންގްރިއްލާ އިން ބުނީ އޯޕަންޑޭ ބާއްވަން ނިންމާފައި ވަނީ ހިތަދު އާއި ހުޅުމީދޫގައި ކަމަށެވެ. އެގޮތުން އައްޑޫގެ ގުޅިފައިވާ އަވަށްތަކުގެ ޒުވާނުންނަށް ހާއްސަކޮށްގެން އޯޕަން ޑޭ އޮންނާނީ 19 ވަނަ ދުވަހު އައްޑޫ ސިޓީ ކައުންސިލް އިދާރާގެ ހޯލްގަ އެވެ.
އެ ދުވަހު އޯޕަން ޑޭ ކުރިއަށް ދާނީ ހެނދުނު 9:00 އިން ހަވީރު 5:00 އާ ހަމައަށެވެ.
ހުޅުމީދޫގެ ޒުވާނުންނަށް ބާއްވާ އޯޕަންޑޭ އޮންނާނީ 20 ވަނަ ދުވަހު ސ. އަތޮޅު މަދަރުސާގަ އެވެ. ކުރިއަށް ދާނީ ހެނދުނު 9:00 އިން މެންދުރު 12:00 އާ ހަމައަށެެވެ.
ޝަންގްރިއްލާ އިން ބުނީ އޯޕަން ޑޭ އާ ދާއިރު ސީވީ ފަދަ ތަކެތި ހިފައިގެން ދިއުމުން އިންޓަވިއުގައި ފަސޭހަކަމާ އެކު ބައިވެރިވެވޭނެ ކަމަށެވެ. މިކަމާ ބެހޭ އިތުރު މައުލޫމާތު 6897888 އިން ލިބޭނެ އެވެ.
ޝަންގްރިއްލާ އިން ހިންގަމުން އަންނަ އެޕްރެންޓިސްޝިޕް ޕްރޮގްރާމްގައި ބައިވެރިވާ ކުދިންނަށް ރިސޯޓްގެ މައިގަނޑު ހުރިހާ ދާއިރާއަކުން އަހަރު ދުވަހުގެ ތަމްރީނު ދެ އެވެ. އަދި އެ މުއްދަތުގެ ތެރޭގައި ބައިވެރިންނަަށް ޕޮކެޓް މަނީ ވެސް ދެ އެެވެ.