އެސްޓީއޯ އިން މަރަދޫގައި ހިންގަން ނިންމާފައިވާ ފާމަސީ އިމާރާތްކޮށް ދޭނެ ބަޔަކު ހޯދަން އިއުލާންކޮށްފި އެވެ.
އެ ކުންފުނިން ނެރުނު އިއުލާނެއްގައިވާ ގޮތުން މިކަމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 10 ވަނަ ދުވަހާ ހަމައަށް ވަނީ ހުުޅުވާވާފަ އެވެ. އަދި މިކަމާ ބެހޭ ގޮތުން މައުލޫމާތު ދިނުން އަންނަ މަހުގެ ތިން ވަނަ ދުވަހު ހިތަދޫގައި ހުންނަ އެސްޓީއޯގެ ފާމަސީން ލިބޭނެ އެވެ.
މަރަދޫގައި ފާމަސީ ހިންގާނެ އިމާރާތެއް ހަދަން އެސްޓީއޯ އިން ނިންމާފައިވާ އިރު، އެ އަވަށު ސިއްހީ މަރުކަަޒު މިހާރު ހިންގާ އިމާރާތުގެ ބައެއްގައި ފާމަސީ ހިންގުމަށް ވާން ޖެހޭ ތައްޔާރީތައް ވަނީ ވެފަ އެވެ.
އެހެން ނަމަވެސް އެތަނުން ހިދުމަތް ދޭން ނުފެށިގެން އުޅެނީ ފާމަސިސްޓަކު އަދި ހަމަނުޖެހިގެންނެވެ. އެސްޓީއޯ އިން ވަނީ އެތަނަށް ދެ ފާމަސިސްޓުން ހޯދަން ވެސް އިއުލާންކޮށްފަ އެވެ.
އެ މަގާމުތަަކަށް ކުރިމަތިލުމުގެ ފުރުސަތު ހުޅުވާލާފައި ވަނީ މިއަދު މެންދުރު 12:30 އާ ހަމައަަށެވެ.